PONGAOPEIYU 10
10
Rakivamaina ea Larübvü Ataina
1Süthaisü Enou kukhe khouchihyu rakivamai ali raki vanou takouyu ngaoe. Puhye sü teihaonou zükhaitoue ea puh peiva hisü rüraipao ali haopfüa bue, alia puh pahsü teinghi kue ea puh phisü meikatao kue. 2Puh bah hisü hapakhai touyu larübvü ataili bue. Alia puh phi zhoulosü zai hi ea puh phi nalosü deithe hi tai-a bue. 3Alia puhnou souveotao nou rayu kua paikushoa shapae. Puhnou sübüa shapayu kisü teisüyu vei pai anai nou puh hi chila peie. 4Alia teisüyuvei pai sütaonou chi paocheyu thaibü hisü Esü rüthoulai tea bure, ana raki hinou pai alinou haibüa paoyu sü Enou choue, “Teisüyu anaitao nou paoyu sü khei-a khailou baio; alia süsü rüthouwuso!”
5Sükisü zai ea deithe hinou la-a bua Enou ngaoyu rakivamai sünanou puh bah zhoulosü raki hilo lakhe loure, 6alia raki, deiphao, zai ea sütaohi buyu na teiteiye soupeiyu, teisanou hria buyu Ramai puh zhih sü kua puhnou chachouli soue. Rakivamai sünanou haibüa paoe, “Sühisü chaopuyu soukhai laimoe! 7Ana rakivamai anai chenanou puh be houngyu teithe kisü Ramai nou puhvei kilai rachi paolamaitao hi paosü peiyu kua puhnou khei-a soudakhai touyu nasü souvetewulai.”
8Süthaisü Enou raki hinou choulouyu pai sünanou Ahi ve paopu peikhaia haibüa paoe, “Ne taloua zai ea deithe hinou la-a buyu rakivamai süna bah hinou buyu hakhai touyu larübvü sünasü poloukhaio.”
9Südonou Enou rakivamai sünahi taloua puh hinou larübvü atainasü Ahi peire donou khoe, sühinou puhnou Ahi paoe, “Haisü polouwo ea touwo; haisü nepou hinou lou khataolai, ana ne mü hi louzü laivoudzü kua dzüvei sholai.”
10Alia Enou puh bah hinou larübvü atainasü poloua toue, alia süsü Amü hiwo laivoudzü kua dzüveishoe. Ana süsü Enou toulouyu thaisü, Apou hinou lou khatao loure. 11Sühinou haibüa Ahi paopeie, “Nenou maikhemai alao vanou tahrüh, la, alia vemaitao vanou Ramai chipaosü paodoupu vuzülai.”
Currently Selected:
PONGAOPEIYU 10: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
