PONGAOPEIYU 9
9
Khahzü nou Souveayu
1Süthaisü rakivamai angou chenanou puh besü houng-e. Alia Enou ratei vanou teivuh ali deiphao hi dekouyu sü ngaoe, alia akhai hayu raobvüvei khareih sü puh hi peire. 2Teivuh sünanou akhai hayu raobvü sünavei müsü hapae, alia sühinou meifü aduhi meikhao kua mei khaopae; teinghi ea rateisü raobvü sünahi meikhao süna vanou zhitei loure. 3Alia meikhao süna hinou khahzü alaosou deiphao hi veloure, alia khahzü sütao hisü kei pfüyu hairakhao hi buyu khoukotya peire. 4Puletao hisü deiphao hi poudai, poube moa kukhe süübe taliye soushiwu more, ana puletao puhi Ramai vei paoshee hayu mai sütaoye likheithe soushi peire donou paopeire. 5Khahzütao hisü maikhemai sütaoye southeawu moa puletaoye khou angou donou likhei souvea peiloure aetou peire. Puletao nou souveayu sü kei pfüyu hairakhao nou maiye keipeiyu ki souyu kuwe. 6Khou angou sütao hisü maikhe mainou athaiye sü phoulai, ana süsü puletao nou ngaolou laimoe; puletao nou thainülai, ana athai nanou puletao hinou tutalou bailai.
7Khahzü sütao zhusü reih donou soudayu rheitao kue; puletao peiva hisü sana veo peirü kua rüpfüe, alia puletao pahsü emai pah kue. 8Puletao peishusü naotumai peishu kue ea puletao huhsü souveo huh kue. 9Puletao khaova hisü hu khaokha kuyu alinou zükhaitoue, alia puletao vei shouh khosü reih mühi zhaohoyu rheiluki alaovei kho kue. 10Alia kei pfüyu hairakhao kua puletao vei mee ea kei bue, alia puletao nou maikhe maiye khou angou souvea peilaiyu khoukosü puletao vei meehi bue. 11Puletao pei hisü akhai hayu raobvü sünaye khoyu rakivamai sünanou veo soua bue. Puh zhihsü Ebriamai la hinou Abaddon toue; alia Greekmai la hinou puh zhihsu Apollion toue (sünavei kowo louzü “Souha peiyuna” toue).
12Ngaopiyu araikha nasü pachere; zhukhaio, haithai-a ngaopiyu ahai vepure buhie.
13Süthaisü rakivamai arou chenanou puh besü houng-e, alia Enou Ramai nghojünou buyu sana sheela buh hi kai adaitao hinou paili choue. 14Pai sünanou rakivamai arou chenahi haibüa paoe, “Euphratis reiduna hinou phukhaitoua khaikhai touyu rakivamai adaitaoye sü phapeio!” 15Südonou teilecho haina, teithe haina, khou haina ea po haina donou deiphao hi maihrü zha asü hinou aliye southea loure donou khaidakhai touyu rakivamai adaitaoye sü phapeire. 16Rhei reihmaitao vei maipei kazhousa touyu sü Ahi paongao peie; süsü zzü thehaie. 17Alia Enou zhokounou rheitao ea sütao phao vahi buyutaoye haibüa ngaoe: rhei phaovahi buyu puletao vei khaokha sü meibüa hoe, sapphir chuh kua daizüzüe, alia meichuh kua pah-e. Alia rheitao peisü souveo pei kue, alia puletao mü hi nou mei, meikhao ea meichuh pae. 18Puletao mü hinou payu mei, meikhao ea meichuh haitao asünou souvea peiyu sünanou emaihrü zha asü hinou aliye sü southeare. 19Daiolouzü rhei sütaovei khoukosü puletao vei mü ea meehi bue. Puletao meesü nghou kua pei pfüe, alia sütaonou maikhe maiye souzhu peiwe.
20Veahoyu haitaonou southealou moyu kukhe maikhe maitao nou rashitao, alia ngao-a ngaomoyu, chou-a choumoyu, ta-a talou hoyu, puletao bahnou soukhai touyu sana, shahu, baosa hu, chuh ea süünou soukhai touyu bashara taoye thoyu hinou puletao lesü daloumoe. 21Moa puletao nou maiye southeayu, puletao vei khei-khupado, puletao vei khulou vah moa puletao vei vaoyu vah sütao hinou le dalou moe.
Currently Selected:
PONGAOPEIYU 9: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
