PONGAOPEIYU 11
11
Zhopaohmai Ahai
1Süthaisü Ahisü sa-zha doure süda kuyu süpo ali peiwu-a haibüa paoe, “Tashuloua Rathoki ea sheelabuh nasü doukhaio, alia sühinou ratho-a buyu maitaopei chokhaio. 2Ana Rathoki vakou kijütaowo louzü thaowuwo, douso; daiolouzü sütaosü tahrüh kukhe maitaohi thoupeire. Puletao nou Mashee Nuhdu süsü khou raidai ahai phinou taitoulai. 3Enou lousahnou bahnouyu Avei zhopaohmai ahaiye seivelai, alia puhai nou teithe 1,260 phasü Ramai chipao paodoulai.”
4Zhopaohmai sühaisü deiphao Mapaowo nghojünou la-a buyu Oliv be ahai ea meibvü dzükhaiyu buh ahai nasüe. 5Alia maitalinou puhaiye souhare te-a bulouzü, puhai mü hinou mei paloua puhaivei ngaoba maiye souhawu baiwe, alia sübüa puhaiye souha nüyu maitalisü thai vuzülai. 6Puhai nou rachi paola payu phaki hi tei panou rüwu more donou rateiye nuloure puhaivei khouko bue, alia puhai nou züpasasü dzütaoye panou zhe dalouyu ea veahoyu taliye panou deiphaoye souvealou süyu puhaivei khouko bue.
7Puhai nou puhaivei zhopaoh soucheyu kisü, akhai hayu raobvü hinou tapayu khaosou sünanou puhai pei hi reih souloua ea puhaiye koloua southealai. 8Puhai vei athai pfüphaosü puhai Mapaoye kros vanou veatheayu dushoyu nuhdu sünavei ludu hi nou bulai. Nuhdu süna zhihsü nada la hinou Sodom molouzü Ejipt toue. 9Alia teidei veishi hinou maikhemai, tahrüh khemai, la tyali ea mai tyalinou puhai vei athai pfüphaosü teithe asü-a pohli zhulai ea puhai vei athai pfüphao sü khüh hi pothou vuyu sü aetou peilai moe. 10Deiphao hinou hrüa buyu maikhe maitao nou puhai thaiyu donou salai, alia nühnüa alinou lihi sa-a doh seilai, daiolouzü rachi paolamai hai hainou deiphao hi hrüa buyu maikhemai pei hi alaosou veahoyu pove peie. 11Ana teithe asü-a pohli thaisü Ramai hinou ahri ssü nasü puhaihi ve louloua puhaisü lashu loure; alia puhaiye ngaolouyu maikhemai hrülaisü ngaopiso loure. 12Sükisü rachi paolayu puhai nou raki nou kushoyu pai alinou puhai hi haibüa paoyu sü choue, “Haihi tapalo!” Puhai vei ngaobamai taonou zhua buyu hinou puhaisü teihao hinou raki hi khetare. 13Süphabü hinou sühisü nü süshisho loure; alia nuhdu süsü zha kiruo hinou alisü souhare ea nü süyu süna vanou mai thenaiye southeare; alia maikukhe taosü ngaopisho loua rakibu Ramai vei adushosü paosho loure.
14Ngaopishoyu ahai chenasü pachere; ana zhukhaio, ngaopiyu asü chenasü thala-a velaire!
Be Anai Chena
15Süthaisü rakivamai anai chenanou puh besü houng-e alia sühisü rakivanou pai kushoyu alaosou pai paloua haibüa paoe, “Deiphao vedei hai Eletao Mapao ea puhvei Khrista vedei souloure, alia puhnou teisa nou veo soua bulai!” 16Sükisü Ramai nghojünou puletao vei vebuh hinou chobua buyu tsümai kaidai taonou puletao pahsü deiphihi pfüna kouloua Ramaiye thoa, 17haibüa paoe:
“Chuchu buyu ea raikinou buyu khoukhoulai Ramai Mapao!
Ehnou neye kalo paowe, süolouzü nenou nevei khouko adu nasü poloua veo soushu loure!
18Tahrüh kukhe maitao nou lekha rarou loure,
daiolouzü nevei rarouyu phasü veloure;
alia thaimaiye chiku laiyu teilesü vere.
Ne kilaitao, rachi paolamaitao ea sheeyu maitaoye alia nezhihye tsükhouyu tai du hrülaiye buu peilaiyu teilesü veloure,
Alia deiphaoye souhayu maitaoye souhare teilesü veloure!”
19Sükisü Ramai vei Rathokisü houpare, alia sühinou puhvei Vo Bvü nasü zhingaoe. Alia sühisü tei peivavayu, pai bvüroyu, tei süyu pai, nü süyu ea rei thou kousho eloure.
Currently Selected:
PONGAOPEIYU 11: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
