MARK 5

Jisu nou Mai ali hinou Rashi Hupa Peiyu

(Mt 8.28-34; Lk 8.26-39)

1Jisu ea puh rozümai taosü Galilee zaipe polo dova Gerasa teidei hi veloure. 2Jisu nou sakhao hinou tapa loukhaie, khüh hinou payu mai alinou puhye sü daoe. Mai süna hisü rashinou louwe, 3alia khüh hrohinou bubaie. Mailinoua puhye sü hurainou phukhailou hore; 4lüh taoli puh phibah hurainou khakhaie, ana teisanou puh baoraisü teadelou baiwe ea phihi hurai sü sousasawu baibaiwe. Puh hai khouleyu vanou mailinoua puhye sü khangilou hore. 5Khei hea puh sü khüh hrohi ea deichitao hrohinou lah puhye sü chuh nou zhee deisasa pa-a ea shusou rao-a ta-a bue.

6Alia puhnou Jisu ye kaa-a nou zhingaobu kinou tukou puhye khurüe; 7alia shusou shaloua paoe, “Aku-kulai Ramai Nahpoutu Jisu, ne Eye koa dai soure bue? Ramai zhih kua Enou nehi paowe, Eye souvea peiso.” 8(Puh nou haibüa paoyu hai Jisu nou puh hi, “Rashina, mai haina hinou tapalouwo!” tea paoyu donoue.)

9Südonou Jisu nou puh hi noue, “Ne zhih thaohtoue?”

Mai nanou chila peie, “Azhih ‘Maisou’ toue; daiolouzü Eletao hai mai alaoe!” 10Alia puh nou Jisu hinou puletaoye teidei süna hinou huta peiwuso tea khokhai khokhaire.

11Chuo sühisü deichi pe hinou vo khome aduli to phoutoua bue. 12Südonou rashitao nou Jisu hi khoe, “Eletaoye votaohi seikou thoupeio, alia Ehye panou sütaohi loulouwo.” 13Südonou puhnou puletaoye sü aetou peire, alia rashitao sü tapaloua votao hi kouloure. Vokhome teitei sü vo thehai phae, sütao teitei sü shaobeiyu lea hi polouloua zai hinou lou maothea khaire.

14Vo khomaitao nou tuho süko sü nuhdu hi ea nuhmai taohi paotare. Alia maikhe mainou dai paresa touyu zhure donou tahore, 15alia puletao nou Jisu hi taveyu kisü, puletao nou raichoki rashi menou louyu mainaye sü ngaoe. Puh sü sühinou sabanüh banoua ea tsüpeia chobua bue; alia puletao sü ngaopi sholoure. 16Alia rashitao nou louyu mainahi ea vo taohi dai paresa touyu ko hai raia ngaobu mainou maikhemai hi paongao peie.

17Südonou puletao nou Jisu ye nou puletao teidei hinou tapeibaio tea khore.

18Alia Jisu nou sakhaohi taloukhaie, raiki rashitao nou louyu mainanou puh hi khoe, “Eye panou neye koa takhe!”

19Sütoukhaia Jisu nou puhye aetou peimoe. Alia Jisu nou puh hi paoe, “Ne kihi khaiveo, alia Mapaowo nou nehi daizhozhou duyu vah soupeisa ea neye daizhozhou khuleshi peisa touyu hai ne samai taohi paongaokhaio.”

20Südonou maisünanou taho Jisu nou puhye donou dai soupeisa touyu teitei sü Dekapoli teidei hi buyu mai hrülai hi paongao tare. Alia ko süna choulouyu mai hrülaisü khupa loure.

Jairas Nah naotupai ea Jisu Sah Deiyu Naotupai

(Mt 9.18-26; Lk 8.40-56)

21Alia Jisu nou sakhao hinou tapoa zai polo dovahi khaita khaire, alia puhnou zaipe hinou buloua mai alaonou tave puhye sühao-a buloure. 22Süthaisü Jairas tea kuyu rathobuh hi vahdumai alisü taveloure, alia puhnou Jisu ye ngaolouyu kisü puh phinou kou duloure 23ea puh hinou khoa paoe, “Anah nakhapaitou soushishoa bure. Leshia puhye panou veiloure ea hriloure donou ne tave puh pei hi nebah khaipeio!”

24Süthaisü Jisu nou puhye koa tare. Alia maikhemai alaonou puhye haopoa puhthai fütare.

25Sühisü po kiahai zhe küa soua buyu naotumai ali bue. 26Puhnou kini alao do-a pou-apeimai alao hinou zhukhaima veiyu moanou shipulailai tare. 27Naotu süpainou Jisu ko choulouyu kisü, maisouko hinou Jisu thailo hi takoue, 28alia puh lahnou haibüa paoe, “Enou puh sah deikho louzü, Ehai veilou süe.”

29Sübüa puhnou takou Jisu sah deiloue, alia sübü hinou puh zhe küyu nasü sore; alia puh souhai veiloure touyu hai lah puh lekhe hinou süloure. 30Sübü hinou Jisu nou puhva hinou khouko tapare touyu sü shiloure, südonou puhnou maisou hilo reiveloua noue, “Thaohnou Asah deie?”

31Puh rozümai taonou chila peie, “Mai alaonou nehilo khaotsütsü poa kouwe touyu sü nenou süwe, ne daidonou thaohnou Eye deie tea nouwe?”

32Ana Jisu nou thaohnou puhye deisa touyu sü zhusühaoe. 33Naotupainou puh hi dai paresa touyu süloua, puhnou pi-nguloua takou Jisu phihinou khou khüloua payu acheche teitei vanou puh hi paongaoe. 34Jisu nou puh hi paoe, “Anahpai, ne lünou neye souvei peire, kaona-a tawo, alia ne sousü veilouo.”

35Jisu nou sübüa paoyu phahinou Jairas kihinou chipaoh paomai kamainou taveloua puh hi paoe, “Ne nahpaisü thaire. Dou-apeioye souvea pupoa dailai?”

36Puletao nou paoa buyu hisü halia chopei khaimoa, Jisu nou rathobuh peicha nahi paoe, “Pikhaiso, lütoulo.” 37Süthaisü puhnou Pitar, Jems ea puh thaihou Johan baideinou kukhemai taliye panou puhthai fükhai bare. 38Puletao nou Jairas kihi veloukhaie, maikhe mainou po-vu sümoa krapoa ea kouli li-a buyu sü Jisu nou ngaoloure. 39Alia puhnou kikhahi talouloua puletao hi paoe, “Neletao daidonou povu sümoa raoa ea kra-a bue? Nahpaisü thaimoe, puhwo zhibaiwe!”

40Puletao nou puhye konüe. Ana puhnou puletao hrülaiye panou vakouhi pakhaire, alia puhnou nahpaina pfüpuo ea puh rozümai asütaoye saloua nahpainou züa buyu kide nahi loure. 41Puhnou nahpaiye bah hinou kou süthailoua puh hi paoe, “Talitha, Koum,” süvei kowo louzü, “Nahpai, Enou nehi paowe, kaishulouwo!”

42Sübü hinou loumaina paisünou shuloua tasühao tare. (Puh sü po kiahai pare.) Haibüa payu kisü, puletaosü khupanou phouloure. 43Ana Jisu nou puletao hi maikumai talihia ko süsü paongao khaiso tea tukhatsü peire, alia puhnou puletao hi, “Nahpaihi ha toure daotu peio” tea paoe.

Currently Selected:

MARK 5: POUMBSI

Highlight

Copy