MARK 4
4
Thoutai Vuyu Nada
(Mt 13.1-9; Lk 8.4-8)
1Jisu nou Galilee zaipenou doupei puta khaire. Alia puhye sühaoa buyu maitaosü pouleyu vanou puhnou sakhao alihi talouloua sühinou lou buloure; alia sakhao nasü zai hinou bue, anou maisouwo louzü zaipe vakou deithe hinou bue. 2Alia puhnou nadanou puletao hi ko alaosou doupeie; alia puhnou doupeia haibüa puletao hi paoe:
3“Keilo! Teile lihi mailinou thoutai vure donou tapae. 4Alia puhnou thoutai vuyu kisü, thoutai kamaisü luduhi dekoure, alia raohou taonou zhaoveloua süsü kotou loure. 5Kamaisü dei veimoyu chuhrao hrohi dekou loure, alia thoutai taosü deifü shoumoyu vanou thalasou paopare. 6Süthaisü teinghinou pakhaie roube taoye sü deire; alia maa thoua chülou moyu vanou thalasou süsü thaitare. 7Thoutai kamai sü raishu hrohi deloure ea raishu sütaonou dupaloua roube sütaoye bouloure, alia sütaosü thoushi more. 8Ana thoutai kamaisü dei avei hi deloure, alia roube sütaosü paopaloua dushu loure ea thoushi loure; kamainou thou shirou, kamainou rairou ea kukhetao nou kaih shiloure.”
9Alia Jisu nou akhai soua paoe, “Keiloure nou pfüa buyu puhnou keilo!”
Thoutai Vuyu Nada vei Ko
(Mt 13.10-17; Lk 8.9-10)
10Alia Jisu nou puh lah buyu phahinou, puhnou paoyu keia buyu mai kamainou rozümai kiahaiye koa puh hi ve-e ea puh hinou nada sütao vei kosü paoshee ngaopeio tea khoe. 11Alia puhnou puletao hi paoe, “Neletao hiwo louzü Ramai Vedei vei kheitsü nasü peiwure, ana kukhemai hiwo louzü hateitei hai nada hinou paopei baie; 12sübüa,
‘Puletao nou zhukhai zhukhailai,
sütoukhaia ngaolaimoe;
Puletao nou keikhai keikhailai,
sütoukhaia sülaimoe.
Sükumo louzü puletao nou dakhai veloua
Ramai nou puletao mah khaipeiwu shulai.’ ”
Thoutai Vuyu Nada Paoshee Peiyu
(Mt 13.18-23; Lk 8.11-15)
13Süthaisü Jisu nou puletao hi noue, “Neletao nada haina hai sümowu? Sükulouzü kabüa neletao nou nada kukhe talihai süloulai? 14Thoutai vuyu nanou Ramai chipao sü vuthouwe. 15Mai kamaisü ludu hi dekouyu thoutaitao büe; puletao nou thalasoua chipao nasü choulouyu kisü Saitan nou tave puletao hi vuthou khaitouyu chipao nasü potare. 16Kukhemai taosü chuhrao hi delouyu thoutaitao büe. Puletao nou chipao nasü choulou bükhaie sashoa poloure. 17Ana sünanou lekhehi maa chülou moyu vanou phajü bubaire. Südonou chipaona vanou souchoyu moa souveayu vekhaie puletao sü thalasou kaotare. 18Mai kukhetao nou raishu hrohi vuthouwuyu thoutaitao büe. Puletao sü chipao süna choulouyu maitaoe, 19ana deiphao hrü haina vanou doyu, kiniye leshiyu, alia kukhe ha taliye züpayu sütaonou ve phouloua chipao sünaye boutheare, alia sütaosü shithou shikhai more. 20Ana mai kukhetaowo deivei buh hi vuthou khaitouyu thoutaitao kue. Puletao nou chipao nasü chouloua süsü poloure ea shithou shiloure: kamainou shirou, kamainou rairou, alia kamainou kaih shiloue.”
Sülainou Hokhaiyu Meibvü
(Lk 8.16-18)
21Alia Jisu nou puletao hi paoe, “Maitalinou meibvü hai taoloua süsü sülai moa züh khehi pothou khaiwu? Puhnou süsü meibvü dzükhaiyu buh hi khailai mowu? 22Kheia khaikhai touyu talisü dua popa ngaowulai, alia hokhai touyu talisü hapawulai. 23Keiloure nou pfüa buyu puhnou keilo!”
24Süthaia puhnou puletao hi paoe, “Neletao nou choulouyutao hisü leikeilo! Neletao nou kukhe maiye chikuyu süna zhai hinou Ramai nou neletaoye chikulai, ana choulouyu neletaoye louzü khoupua chikulai. 25Daiolouzü buyu puh hinou puhvei daotu buyuna koutea potawu bailai.”
Kheia dupayu thoutai vei nada
26Alia Jisu nou thaomoa paoe, “Ramai Vedei sü haibüe. Mai alinou puh douhi thoutai vuthoue. 27Alia puhnou kheihea zhia, kaia bue, alia pha sütao hinou thoutai taosü paopaloua dupaloure. Sütoukhaia puhnou süsü kabüa palousa touyu sümoe. 28Deinou thoutai sütaoye panou paopaloua shithou shiloue; raikaia jü lapae, süthainou nghou ea akhai hinou rouko pae. 29Ana rou nasü meiyu kisü, mai nanou kainou vatare, daiolouzü cha chiyu phasü veloure.”
Javu Thoutai vei Nada
(Mt 13.31-32,34; Lk 13.18-19)
30Alia puhnou paoe, “Eletao nou Ramai Vedei hai daiye pao khalai, moa Eletao nou süna vanou paosheengao peire dai nada seilai? 31Süsü javu thoutai ali kheihaoe, süolouzü mailinou thoutai süsü deihi vuthouyu phakisü, süsü deiphao nou thoutai kukhe teitei jünou taikayu thoutai nasüe. 32Ana phajü thaisü sünanou dupaloua deiphao nou dukayu vupoube souloure ea dushoyu bo lapaloua tei raohoutao nou ve sünavei khu hrohinou puletao phe souloure.”
33Jisu nou haibüyu nadataonou seia puh chipao sü maikhe mai hi paodoupeie; alia maikhe mainou soutaosoua sülou süyu hinou puhnou puletaoye doupeie. 34Puhnou nada seimoanou chilia paomoe, ana puhnou lah puh rozümaitaoye koa buyu hinou, puhnou sheetoua ha teitei hai doupeie.
Jisu nou Teikhai Teirüshi Souna Peiyu
(Mt 8.23-27; Lk 8.22-25)
35Süzhou koukhe hisü Jisu nou puh rozümaitao hi paoe, “Eletao zaipe polo dovahi talaikhe.” 36Südonou puletao nou maisouye thaowu-a tare; alia rozümaitao nou Jisu ye saloua puhnou raia lou buyu sakhao nahi sü louloure. Sühisü sakhao kukhe-a bue. 37Alia sükhaimoa chihshoyu teikhai teirü vere, alia dzü-akhüh nou sakhaoye sü shore, südonou sakhaosü dzünou houngpaloua phoulou laire. 38Jisu sü sakhao thailo nou peikhü khüpfüa zhia bue. Rozümai taonou puhye kaishuloua paoe, “Dou-apeio, Eletao thaiyu lai-a ne domowu?”
39Jisu nou tashu laloua teikhai teirüye kharochi peie, “Ngasou buwo!” Alia puhnou dzü-akhüh hi paoe, “Kao nalo!” Alia teikhaisü khailoure ea sühisü kaonasei tare. 40Süthaisü Jisu nou puh rozümai taohi paoe, “Daisoua neletao piwe? Neletao chu koutea lü hahiwu?”
41Ana puletao sü ngaopi sholoua linou lihi paoe, “Mai haina hai thaoh-e? Teikhai ea dzü-akhüh koutenoua puh chi züwe!”
Currently Selected:
MARK 4: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
