MARK 3

Bah Pothaimai Aliye Soteithezhou Souvei Peiyu

(Mt 12.9-14; Lk 6.6-11)

1Süthaia Jisu nou rathobuh hi khailou khaire, alia sühisü bah pothaimai ali bue. 2Sühisü Jisu pei hi mah dukhai nüyu kamaia bue; südonou puletao nou soutaosoua Jisu nou Soteithezhou mai sünaye souvei peilaiho mosa tea choh-a bue. 3Alia Jisu nou mai nahi paoe, “Nghojülo takoulo.” 4Sükisü puhnou maikhemai hi paoe, “Soteithe zhou avei souyu zhaiho ashi souyu zhaie? Maihrirai khaipei laiho southealai?”

Ana puletao nou hachilia paomoe. 5Jisu nou lekhanoupu maikhemai hi zhuloua ea puletao le khouleyu vanou levealoua mai sünahi paoe, “Nebah topalo.” Alia puhnou puh bah sü topae, alia süsü veiloure. 6Südonou Pharisee maitaosü rathobuh hinou tapare, alia puhye kabüa souhaloulai touyu vanou thalasou Herod memaitaoye koa chikhaitare.

Zaipenou Jisu nou Mai alaoye Souvei Peiyu

7Jisu nou puh rozümaitaoye koa Galilee zaihi tare, alia maisoudu nou puhthai fütare. Puletao sü Galilee, Judea, 8Jerusalem, Idumea teidei, Jordan teinghi palova teidei hinou alia Tair ea Sidon nuhdu pehao teideitao hinou ve-e. Mai hrülai haitaonou Jisu nou soupfüyu teitei sü choulouyu vanou puh hi tave-e. 9Maikhe mainou pouleyu vanou puhye kou khaokhao more donou Jisu nou puh rozümai taohi sakhaoli puhye donou souda peio tea paoe; 10daiolouzü puhnou mai alaoye souvei peie, alia sounoumai hrülainou puhye kou deiloure donou puh hilo khaova koure. 11Alia rashinou louyu maitao nou Jisu ye ngaoloukhaie, puletao sü puh nghojünou kou duloua, “Nehai Ramai Nahpoutue,” tea shusoua shaloure.

12Alia Jisu nou rashitaohi puh hai thaoh-e touyu vanou maitalihia paokhaiso tea tukhatsü peire.

Jisu nou Sei-atamai Kiahaiye Dolouyu

(Mt 10.1-4; Lk 6.12-16)

13Süthaisü Jisu nou deichi alivahi tapaloua puhnou züpayu maitaoye sü puh hi kuve loure. Puletao nou puh hi tave, 14alia puhnou sei-atamai tea zhih sapeiyu kiahai taoye panou puhye koa bure donou, vakouhi seiho ko paodoure donou 15alia rashitaoye hupare soulousü zü nasü buloure donou doloure.

16Puhnou dolouyu mai kiahai taosü haitaore: Simon, (Jisu nou puh zhih sü Pitar tea sada peire); 17Zebedee nahpoutu Jems ea puh thaihou Johan (Jisu nou puhai zhih hai Boanerges tea sapeie, süvei kowo louzü “Teisüyu nahai” toue); 18Andrew, Philip, Bartholomew, Mathiu, Thomas, Alphia nahpoutu Jems, Thadia, Kanaan pouna Simon, 19alia Jisu ye shoh soupeiyu Judas Iskariot.

Jisu ea Beelzebul

(Mt 12.22-32; Lk 11.14-23; 12.10)

20Süthaisü Jisu hai kihi vetare; alia mai alaonou tave dzüpulou khaire, süvanou Jisu ea puh rozümai taosü tou-shoyu teile koute-a ngaolou hore. 21Puh kihikhamai nou ko süsü chouloukhaie, puhye niloure donou puletao sü tapare, daiolouzü maikhe mainou, “Puh hai votare!” tea paoe.

22Jerusalem hinou veyu razhai dou-apeimai kamainou paoe, “Puh hi Beelzebul bue! Rashitao pei aduwo nou puh hi rashitaoye hulai palou sü khouko hai peibaie.”

23Südonou Jisu nou puletaoye puh hi kukouloua puletao hi nadanou paoe: “Kabüa Saitan nou Saitan ye hupalou süe? 24Vedei alihai meme souloua alinou aliye hrailouzü vedei süsü porarou bailai. 25Alia kihikha alihai meme soua hraiva louzü, kihikha sünasü porarou bailai. 26Südonou Saitan vedei hai meme soua dadewu louzü, süsü busholou hoe, ana porarouloua hazhei bailai.

27“Maitalia khouyumai ali kihi loulouzü, puhye raia raiphuwu molouzü, puh vei natao sü pota louhoe, ana raia nou puhye phulouyu thainou puh vei natao sü shaolou süe.

28“Cheche vuzü Enou neletao hi paowe, maikhemai mah ea puletao nou Ramaiye paoshiyu pfüphou sü khaipeilai. 29Ana Rako Mashiye paoshiyu maiye sü hakia khaipei laimoe, daiolouzü puhnou hashalou hoyu mah soure.” 30(Haisü Jisu nou maikhemai kamainou puh hi, “Puh hi sheemoyu rako bue,” tea paoyu vanou paoe.)

Jisu vei Cheche Kikhamai

(Mt 12.46-50; Lk 8.19-21)

31Süthaisü Jisu pfü ea puh thaihoumai taosü tavere. Puletao nou kipanou la-a bua puh hi maiye seilou-a panou puhye kue. 32Alia mai alaonou Jisu ye sühaoa chobua bue; alia puletao nou puh hi paoe, “Zhukhaio, nepfü, ne thaihou maitao ea ne tumaitao nou vakounou neye phoua bue.”

33Jisu nou chila peie, “Apfü thaoh-e? Athaihou maitao thaoh-e?” 34Alia puhnou puhye sühaoa chobua buyu maitaoye zhu sühaoloua paoe, “Zhukhaio! Haihi Apfü ea Athaihou maitao bue! 35Ramai leli souyu maitali sü Athaihou, Atu ea Apfüe.”

Currently Selected:

MARK 3: POUMBSI

Highlight

Copy