MARK 6

Jisu ye Nazareth hinou Bayu

(Mt 13.53-58; Lk 4.16-30)

1Jisu nou buh sünasü thaowu-a lah puh vei nuhdu hi dakhai vere. 2Alia Soteithe zhousü puhnou rathobuh hinou doupei tare. Mai alaosou sühi bue; alia puhnou paoyu sü puletao nou choulouyu kisü, puletao hrülainou khupaloua haibüa noue, “Mai hainanou daikinou haitaohai ngaoloue? Puh hi peikhai touyu haina hai dai ratsüsa? Puh nou kabüa khupa vahtao soulousa? 3Puh hai Meri Nahpoutu, alia Jems, Josef, Judas ea Simon jürai süüshasüwo mowu? Puh tumaitao-a haihinou hrümowu?” Alia sübüa puletao nou puhye baloure.

4Alia Jisu nou puletao hi paoe, “Rachi paolamai alihai lah puh vei nuhdu, puh taraimai ea puh kikhamai hi deinou buh kukhe veishi hiwo louzü tsükhou moyu hae.”

5Puhnou sounoumai daotu pei hi bah lakhaipeiyu ea souvei peiyu likhei deinou puhnou sühisü khupa vah halia soulou hore. 6Alia maikhemai nou lü hayu donou puh sü khupasho loure.

Jisu nou Rozümai Kiahaiye vakou Seitayu

(Mt 10.5-15; Lk 9.1-6)

Süthaisü Jisu nou sühaohi buyu nuhtaohi tasühaopoa maikhemai hi doupei tare. 7Puhnou rozümai kiahai taoye kuve dzüloua puletaoye mai ahai hainou vakou seitare. Puhnou puletao hi rashitaoye hupa loure soulousü zü nasü peie, 8alia puletao hi haibüa kharochi peie, “Neletao veihdu donou süpo deinou, raokhao, lekha moa neletao shavü hi sha pfüso; 9ana raidao-phikha noulouwo ea zao ahai pfüso.” 10Alia puhnou puletao hi paoe, “Neletaoye shepeiyu ki süna hinou, neletao nou buh süna thaoa tamosa koute buwo. 11Alia buh tali hinou neletaoye shepei balouzü moa neletao chi keipei balouzü, buh süsü neletao nou thaowu-a tayu kisü, puletao pei hi motouyu lapeire donou neletao phihi naisü sülaiwo. Chechenou Enou neletao hi paowe, chikuyu teithe kisü nuhdu süna jünou Sodom ea Gomorrah nou shamealou veilai hie!”

12Südonou puletao nou taloua maikhemai hi le daloure donou paodoupei tare. 13Puletao nou rashi alaosou hupaloue, alia sounoumai taoliye theadzü noupeia souvei peie.

Johan Baptist Thaiyu

(Mt 14.1-12; Lk 9.7-9)

14Chuo chi haitao teitei sü Herod veo nou chouloure, daiolouzü Jisu zhih hai buh likihi kubou loure. Mai kamainou haibüa paoe, “Johan Baptist hai hridashu loure! Süvanou puh hi haibüyu khupa vah souyu khouko hai bue.”

15Sütoukhaia kukhemai nou paoe, “Puh hai Elijah-e.”

Kukhemai taonou paokhaie, “Puh hai dao raiki rachi paolamaitao büyu rachi paolamai alie.”

16Ana Herod nou süsü choulouyu kisü paoe, “Puh hai Johan Baptist baie! Enou puh peisü dere, ana puh sü hrishulou khaire!” 17Daiolouzü Herod nou Johan ye niloure donou kharochi peie, alia puhnou panou Johan baorai sü phuwu-a hukhahi thoure. Herod nou vah haihai Herodia donou soue. Herodia hai puh thaihou Philip chapfü khaia puhnou naloure. 18Daiolouzü Johan nou Herod hi paoe, “Neye donou lah ne thaihou chapfüye nalouyu hai zümoe!”

19Südonou Herodia nou Johan pei hi sü raroushoa ea southea nüa bue, ana Herod donou souloushia bue. 20Herod nou Johan ye piwe daiolouzü puhnou Johan hai maiveimai ea sheeyu maie touyu süe, alia südonou puhnou Johanye sü veitoua khaikhaitoue. Puh hai Johan chipao keiyusa puh le deichoyuma puhnou puh chihai sashoanou keibaie.

21Ana Herod nou puhye nayu teitheki vahdumai, reihmai peichamai ea Galilee teideihi süthai-apei maitao hi vai aduli peiyu phaki Herodia nou zhou aveili ngaoloure. 22Sühisü Herodia nah naotupainou talou do soua Herod ea puh shemaitaoye sousa shopeie. Südonou veonou loumainapai hi paoe, “Ne dai kholou nüwe? Enou ne züpa tali peilai.” 23Alia puhnou chaachou soua naotupai hi paoe, “Enou chou soue, nenou khoyu tali süolouzü Avedei poli koutea nehi peilai!”

24Südonou loumaina painou taho puh pfühi noue, “E dai kholoulai?”

Pfünou chila peie, “Johan Baptist pei kholo.”

25Loumaina painou veohi thalasou khaiveloua khoe, “Neye panou chu buh haihinou Johan Baptist peisü khaoh lihi dethouloua Ahi peiyu E züpae!”

26Haihai chouloukhaie veo sü le veasholoure, ana puhnou puh hi motoulou hore, daiolouzü puhnou puh shemaitao hrülai nghojünou chouwure. 27Südonou thalasou puhnou Johan pei povere donou reihkhaomai aliye kharochi peiwu-a seitare. Reihkhao pounanou taho hukha kinou Johan pei dere; 28süthaisü puhnou süsü khaoh alihi thouloua pove loumaina paihi peie ea loumaina painou puh pfühi peie. 29Johan rozümai taonou haikohai chouloukhaie taveloua puh thaiphaosü potaho vure.

Jisu nou Mai Thengouye Vaiyu

(Mt 14.13-21; Lk 9.10-17; Jn 6.1-14)

30Sei-atamai taonou khaiveloua Jisu ye daoe ea puletao nou soupfüyu ea doupeiyu ko teitei sü puh hi paongaoe. 31Alia puhnou puletao hi paoe, “Eletao lah zheihzheihyu buh alihi taho sühinou phajütea solou laikhe.” Daiolouzü mai alaonou talou-tapaloua Jisu ea puh rozümai taosü touyu teile koutea ngaokhai more. 32Südonou puletao sü sakhao lihi louloua mai hayu buh lihi tare.

33Sütoukhaia mai alaonou puletao tayusü ngaoloua ea puletao zhu shihaloua puletao vei nuhdu liki hinou Jisu ea puh rozümaitao jünou raia phinou tuveloua buh sühi velou loure. 34Jisu nou sakhao hinou tapa louyu kisü, puhnou maisouduye ngaoloure, alia puh lehai puletaoye zhuvea leshinou phouloure, daiolouzü puletao hai Zhaokhowo hayu zhaotu büe. Südonou puhnou puletao hi ha tyali doupei tare. 35Alia koukhe tei naloukhaie, puh rozümaitao nou puh hi taveloua paoe, “Chuo tei nashore, alia buh haisü zheihzheihyu buh-e. 36Maikhemai taoye seitawo, alia puletaoye panou puletao lah ha touso tali hrütou loure donou nghei kihi buyu nuhfü ea nuhtaohi tawo.”

37Ana puhnou puletao hi chila pei, “Neletao nou puletao hi ha touloure tali peio.”

Alia puletao nou puh hi paoe, “Nenou Ehye panou taloua husha kaih ahai muh raokhao hrüloua puletaoye panou touyu züpawu?”

38Südonou Jisu nou puletao hi noue, “Neletao hi raokhao pho kizhou bue? Taloua zhukhaio.”

Puletao nou sülouyu kisü puh hi paoe, “Raokhao pho angou ea kha ahai bue.”

39Süthaisü Jisu nou puh rozümaitaohi mai hrülaiye panou meme sou dadeloua poudai phaovahi panou kou buloure donou paopeire. 40Südonou maikhemai sü kaih-kaih ea raingou-raingounou meme souloua vya-vyanou kou buloure. 41Sükisü Jisu nou raokhao pho angou ea khah ahai taosü poloua rakiva zhuloua hapeire; alia puhnou raokhao taosü soukho loure ea sütaosü maikhemai hi zhihpeire donou puh rozümai taohi peire. Puhnou khah ahaina-a puletao hrülaihi zhipeire. 42Alia puletao hrülainou toukhailoua pou phoulou khaire. 43Süthaisü rozümaitao nou raokhao ea khah toushoyu pe taohai sülai kiahai phou kodzüloue. 44Raokhao touyu maitaosü poutu mai thengoue.

Jisu nou Dzü peinou Tayu

(Mt 14.22-33; Jn 6.15-21)

45Alia Jisu nou maisouye seita-a bubu kinou thalasou puhnou puh rozümaitaoye panou sakhaohi louloua zai polo dova Bethsaida hi panou puh jünou raia tare. 46Puhnou maikhemai hi tarayu chi paowu-a puhsü veachi paore donou deichi hi tapare. 47Koukhe louyu kisü, sakhao hai zai tsüle hi bue, alia Jisuwo li-a deithe hinou bue. 48Teikhaishi daolouyu vanou puh rozümai taonou veashoa sakhao saopoa tayuhai Jisu nou ngaoloure. Südonou shona teilecho asü hai arou kole hinou puhnou dzü peinou tapoa puletao hi tave. Puh sü puletaoye tachore donou soue, 49ana puhnou dzüpeinou ta-a buyu sü puletao nou ngaolouyu kisü süsü rashi alibaie tea puletao nou choloua shusoua raoloure; 50daiolouzü puletao nou puhye ngaoloukhaia puletao hrülaisü ngaopisho loure.

Ana thalasou Jisu nou puletao hi paoe, “Khuveilo! Haisü Ebaie; piso!” 51Süthaisü puhnou puletaoye koa sakhaohi louloure, alia teikhaisü kaona tare. Alia rozümaitao sü khupasho loure, 52daiolouzü puletaosü raokhaonou mai thengouye vaiyu vei checheyu kosü sülou moe; ana puletao lehai khoupusho loure.

Jisu nou Shunesaret hinou Sounou maiye Souvei Peiyu

(Mt 14.34-36)

53Alia puletao nou zai nasü tacholoua Shunesaret teideihi velou loure ea sühinou puletao nou sakhao nasü khikhaire. 54Puletao nou sakhao thaowu-a tayu hinou, maikhe mainou Jisu ye sü shiha loure. 55Südonou puletao nou teidei süna buh likinou tuveloua sounou maitaoye zühphao nou poloua puletao nou Jisu bue tea chouyu buh likihi povere. 56Alia Jisu nou tave taveyu nuhtao, nuhdutao, moa nuhfütao hi maikhe mainou lishimai taoye pove hupobuh khonou zükhaiwu-a puh hinou ve maikhe maiye panou puh sahnoukai koutea deio tea khoe; alia süna deilouyu mai hrülaiye sü souveikhai peire.

Currently Selected:

MARK 6: POUMBSI

Highlight

Copy