MARK 7

Paipaomai Zhai

(Mt 15.1-9)

1Chuo Jerusalem hinou veyu Phariseemai ea razhai dou-apeimai kamainou Jisu hi tave dzüloure. 2Puletao nou Jisu rozümai kamainou naa thaifüa bah sheemoa ha touyu sü ngaoloure, süolouzü puletaohai Pharisee mainou maikhemai hi doupeiyu zhai thaifüa bah teilou more.

3(Daiolouzü Phariseemai ea Jihudimai hrülai nou puletao paipao mainou doupeiyu zhai thaifüa bah teitoulou molouzü ha toumoe; 4moa puletao nou hupobuh hinou poveyu hatalisü rai-a dzütheasheewu molouzü toumoe. Alia puletao nou reihyu zhai kukhe alaosou bue, sütaowo louzü pai, lee, hubakhao, alia züh khüsheeyu haitaoe.)

5Südonou Phariseemai ea razhai dou-apeimai taonou Jisu hi noue, “Daidonou ne rozümaitao nou paipaomai zhai nasü fümoa naa thaifüa bah sheemoa touwe?”

6Jisu nou puletao hi chila peie, “Daizhozhou kao-züa Isaiah nou aveikho souyu neletao vanou rachi paopa peiresa, süolouzü haibüa rüthou khaiwure:

‘Mai haitaonou Eye puletao tainou tsükhouwe;

ana puletao lewo Ahinou doushoa bue.

7Puletao nou Eye hakonou thowe,

daiolouzü puletao nou emai zhainou razhai soua doupeie!’

8“Neletao nou Ramai chikha thaowu-a emai zhainou potou loure.”

9Alia Jisu nou thaomoa puletao hi paoe, “Neletao hi lah neletao nou doupeiyu zhai nasü reih loure donou Ramai chikha polai loure kaishoyu do ali bue! 10Daiolouzü Moses nou chikha peie, ‘Nepfü nepuoye tsükhoulo,’ alia, ‘Pfü moa puo chi paoshiyu puhye sü southeawutheo.’ 11Ana neletao nou doupeie süolouzü maitalinou puhpfü moa puhpuoye soukhalouvei hatali bukhaia puhnou haibüa, ‘Haihai Korban baie’ (süvei kowo louzü, haisü Ramai veie), tea paowu louzü, 12puhye sü pfüpuoye soukhare hinou khaipeiwure. 13Haibüa neletao nou mai kukhehi doula koupeiyu sünanou Ramai chipaohai southou hako peire. Alia haibüa neletao nou souyu kukhe alaosou bue.”

Maiye Souzhai Peiyu Natao

(Mt 15.10-20)

14Süthaisü Jisu nou maisouye puh hi kuve puloukhaia puletao hi paoe, “Neletao hrülai keilo ea sülo. 15Vakounou louloua maiye lou souzhai peiyu halia hae; ana mailiye souzhai peiyu süwo louzü puh lekhe hinou payu na sütaonou baie.” 16(Südonou maitalinou keiloure nou pfülouzü, puhnou keiloukhaio!)

17Puhnou maisouye thaowu-a kikhahi talouyu kisü, puh rozümai taonou puh hinou nada sünasü paoshee ngaopeio tea khoe. 18Alia puhnou puletao hi paoe, “Neletao sümowu? Sükuyu thaisü neletaowo mai kukhetao jünou sükoukhai more. Vakounou lekhehi louyu hatalinou maiye souzhai peilou hoe, 19daiolouzü sünahai puh lekhehi loumoe ana puh pouhi louloua pfüphao hinou tei-dzülaiwu baiwe.” (Sübüa Jisu nou touso teitei hai sheekhaibaie tea paopeie.)

20Alia puhnou thaomoa paoe, “Emai lekhe hinou payu sünanou puhye souzhai peiwe. 21Daiolouzü lekhe hinou süolouzü emai le hinou tsüshi, khulou souyu, vaoyu, maiye southeayu, 22maipfü-maipuo sapayu, loküyu, maishi souyu, madayu, ke-zhe züpa souyu, ngaoraiyu, maichi paoshiyu, khaophu souyu, alia tsü chemoyu haitao pawe. 23Ashi haitao pfüphou hai emai lekhe hinou paloua puhye souzhai baiwe.”

Greek Tamaipfü Alivei Lü

(Mt 15.21-28)

24Süthaisü Jisu nou buh süsü thaowu-a Tair ea Sidon ngheiki buyu teideihi tare. Puh hai ki alihi taloure ea maitaliye panou puh sühi bue touyu hai sülou nümoe, sütoukhaia puh sü kheia bulou hore. 25Daiolouzü rashinou louyu nah naotupai ali pfünou Jisu ko chouloure ea puh hi thashoa taveloua puh phinou kou duloure. 26Naotu hainapai sü Surophoenikia teidei hinou nayu Greek tamaipfü alie. Puhnou Jisu hinou puh nah pai hi rashi louyu hai hulai papeio tea ve khoe. 27Ana Jisu nou puh hi paoe, “Nahmaitaoye panou pouphoulou raio, daiolouzü nahmaitao vei raokhao hai poloua sei taohi polai peiyu kaomoe.”

28Ana naotupainou puh hi chila peie, “Ovai Mapao; ana seitao koutea nahmaitao nou tourai kouyu hai arübuh phinou kotouwe!”

29Jisu nou puh hi paoe, “Chi haina paoyu vanou ne kilo khaitawo; rashi nasünou ne nahpaiye thaowu-a tare.”

30Alia naotupai nou puh kihi khaiveyu kisü, puh nahpaisü züh hinou züa buyu ngaoloue, alia chechenou rashi nasü nahpai hinou tapare.

Noupeyu ea La hayu Mailiye Souvei Peiyu

31Süthaisü Jisu nou Tair teidei hinou khaitaloua Sidon tachopoa Galilee zaihi kouloua Dekapoli teideihi takoure. 32Alia mai kamainou puh hi nou peyu ea la daoyu mailiye save; alia puletao nou puhye nou mai süna pei hi bah deipeire donou khoe. 33Südonou Jisu nou khei-a mai sünaye maisou hronou vakouhi saku paloua, puh bahtounou mai süna nouhi thaithoupeie, alia taidzü süloua malisü deipeie. 34Süthaisü Jisu nou rakiva zhuloua ea puh ssü liphouloua mai nahi paoe, “Ephphatha,” sünavei kowo louzü, “Houpalouwo!” touwe.

35Sübühinou puh nousü houpare, puh malisü noutare ea puhsü veitoua chi paoloure. 36Alia Jisu nou puletao hi maitalihi-a paokhaiso tea tukhapeie, ana puhnou puletao hi khouchia tukha peikhaie, puletao nou süvanou leloushoa paongaopu tare. 37Alia puletao nou paosha louhosou khupaloua paoe, “Puhnou ha teiteisü souveisho peiwure; puhnou nou pemai kouteye panou chouloure ea la hamaiye panou chi paoloure!”

Currently Selected:

MARK 7: POUMBSI

Highlight

Copy