MARK 13
13
Rathoki Souha Laiyu vanou Jisu nou Paoyu
(Mt 24.1-2; Lk 21.5-6)
1Jisu nou rathoki thaowu-a tapakhaie puh rozümaitao hronou alinou puh hi paoe, “Dou-apeio, zhukhaio! Chuhtao ea kitaosü daizhozhou khupasa!”
2Jisu nou puh hi chila peie, “Ne dushoyu ki haitao ngaowu? Haihi dokhao koulai moyu, alinou lipei hi shoa bulaiyu chuh lia khai khailaimoe.”
Kaoshiyu ea Souvea-souhoyu
(Mt 24.3-14; Lk 21.7-19)
3Alia Jisu nou Oliv deichi hinou chobua rathoki hilo puhpah pfüreia buyu phahinou Pitar, Jems, Johan ea Andrew nou khei-a puh hi tave noue, 4“Paokhai touyu taosü dukilai ea sütao pamo jühi rai-a palaire touyu dai shee soungaolai, Eletao hi paongao peio.”
5Jisu nou puletao hi paoe, “Maitaliye panou neletaoye sümahlou more donou leikeilo. 6Mai alaonou, ‘E hai puh-e!’ tea paoa Azhih hinou velai; alia puletao nou mai taoliye sümah peilai. 7Alia neletao nou reih pai ea reih ko chouyu kisü ngaopiwuso; daiolouzü haisü pavu zülai, ana sütaonou akhaina mohie. 8Daiolouzü tahrüh alinou ali pei hi alia vedei alinou ali pei hi reih soulai. Buh likinou nü sülai ea tokaa velai, ana haitao hai vearevei shuraibaie.
9“Ana lah neletaowo leikei-a bulo; daiolouzü puletao nou neletaoye niloua chikuki hi savelai; alia neletaoye rathobuhtao hinou dapeilai; alia neletao hai Azhih donou puletao hi ko avei paongao peire donou teidei khomaitao ea vemaitao nghojühi ve lalai. 10Alia akhai vemo jühinou, ko aveihai tahrüh hrülaihi raia paodou vuzülai. 11Alia puletao nou neletaoye niloua chikuki hi saveyu kisü, neletao nou daichi paolaisa tea raia dowuso; teile veyu kinou, neletao hi peiyu talisü paokhaio. Daiolouzü neletao nou paoyu chipaotao sü neletao vei laimoe; sütaosü Rako Mashi hinou velai. 12Maikhemai nou lah puletao thaihou jüraiye southeare donou thoupeiwulai, alia sübüa puomaitao nou-a puletao nahmaiye soulai ea nahmaitao nou-a puletao pfüpuo pei hi motouloua puletaoye southeawulai. 13Adonou mai hrülainou neletaoye ngaoralai. Ana akhai koute shamea louyu puhye sü khaipeilai.
Ngaopi-ngaohiyu
(Mt 24.15-28; Lk 21.20-24)
14“Ana neletao nou ‘Ha-kare souzhaiyu ngaora’ sünanou puhnou buzü moyu buh hinou la-a buyu kisü (phoua buyu puhnou süloukhaio), süthaisü Judea hi buyu puletao nou deichi taohi tutaloukhaio. 15Kiphaohi buyu puhnou hatali pore donou takouloua puh kikhahi talou khaiso. 16Alia douhinou buyu puhnou puh sahba pore donou kihi khaivewu laimoe. 17Teithe sütao kisü poupfüa buyu ea panou nao-a buyu puletao donou daizhozhou ngaopisa! 18Haitaohai saiki hinou palou more donou Ramai hinou veachi paokhaio! 19Daiolouzü teithe sütao kisü Ramai nou deiphao soushurai hinou shua chu koute pakhai mohiyu ea haithaia pakhailai moyu souvea-souchoyu sü vedaolai. 20Ana Mapao nou teithe sütaosü soujü peiwure; puhnou soujü peimoe toulouzü, maitalia khailu louhoe; ana puh nou dopawuyu maitaoye donou puhnou teithe sütaosü soujüre.
21“Süthaisü maitalinou neletao hi, ‘Zhukhaio, haihi Khrista bue!’ moa ‘Zhukhaio, puhsü sühi bue!’ tea paolouzü puhye loucheso. 22Daiolouzü madayu Khristatao ea madayu rachi paolamaitao velai. Puletao nou sheetao ea khupa vahtao soungaoa soulou veilouzü Ramai nou dopalouyu maitaoye-a sümah peilai. 23Ana leikeilo! Enou neletao hi teile vemo jühinou hateitei paokhai peire.
Mai Nahpoutu nou Khaive Laiyu
(Mt 24.29-31; Lk 21.25-28)
24“Ana souvea-souchoyu thai teithetao hisü, teinghi hai zhita bailai, alia khousü vakhai laimoe, 25alia teivuh taosü ratei hinou dekou bailai ea rateihi buyu khoukotaoye sü puletao vei ludu hinou hutawu bailai. 26Sükisü Mai Nahpoutuwo nou dushoyu khouko ea khouko avanoupu teihao vanou taveyu sü puletao nou ngaolai. 27Süthaisü puhnou rakivamai taoye deiphao kainghou adaihi seita-a panou deiphao akhai alilova nou alilova koute hinou puhnou dolouyu maitaoye podzülai.
Doushibe hinou Doulouyu Ako
(Mt 24.32-35; Lk 21.29-33)
28“Doushibe hinou akoli doulouwo. Sünavei botaonou ngupaloua sünghoutao lapayu kisü neletao nou hou ngheire touyu süloue. 29Süzhaibüa, neletao nou shee haitao teitei ngaolouyu kisü puh hai romühi kou ngheiteire touyu neletao nou sülo. 30Chechenou Enou neletao hi paoe, haitao veishi pamo koutesü maikha haina hai hata laimoe. 31Raki ea deiphao hatalai, ana Achipaotao louzü halaimoe.
Maitalia Teithe ea Pha nasü Sümoe
(Mt 24.36-44; Lk 17.26-30,34-36)
32“Ana teithe süna ea pha sünasü Puo likheiwo deinou rakihi rakivamai moa Nahpoutu koutenou-a sümoe. 33Leikeilo, zhaihelo; daiolouzü teile süsü duki velai touyu hai neletao nou sümoe. 34Haihai mai alinou puh ki thaowu-a veih douhi tareki puh kilaimai taohi lah lahnou soure vahtao thaothou peiwu-a ea kikhu khowo nahi soutaosou zhaihelo tea paopeiwu-a tayu kheihaoe. 35Südonou zhaihelo, daiolouzü dukinou ki paopu nasü velaisa, koukhenou laiho, kheitsüle nou laiho, houkhao hinou laiho molouzü shonanou laisa neletao nou sümoe. 36Sübümo louzü puhnou thalasou veloua neletaoye zhia bua ngaoloulai. 37Südonou, Enou neletao hi paoyuhai, Enou mai hrülaihi paowe: Zhaihelo!”
Currently Selected:
MARK 13: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
