MARK 12

Darkha Kipei Khoyumai taovei Nada

(Mt 21.33-46; Lk 20.9-19)

1Süthaisü Jisu nou puletao hi nadanou paotare: “Teile lihi darkha kipei koyu maili bue, alia sünasü bokhanou kha sühaowure, alia darkha dzü süloure donou deibvüli raokhaire, alia reihkhaobuh ali soukhaire. Süthaisü puhnou darkha kipei nasü kipei khomaitaoye panou soulou-a teidei akuli hi veitare. 2Darkha rashi haiyu teile veyu kisü, puhnou puh kilai aliye puletao hinou puh zha poloure donou kipei khomai taohi seive-e. 3Kipei khomai taonou kilai sünaye niloua dapeire ea puhye sü sakhaia seida khaire. 4Süthaisü kipei paopuwo nou kilai kukhe aliye seive-e; kipei khomaitao nou puhye sü dapeiwu-a pei hinou zhupeire ea puhye soungusho peire. 5Kipei paopuwo nou kukhe kilai aliye seivekhaie ea puletao nou puhye datheare; alia puletao nou kukhemai taoliye-a sübüa kamaiye dapeie ea kukhe maiye southeare. 6Chuo seitarena hai mai sünavei leshi shoyu nahpoutu likhei baire. Südonou akhai khailai hinou puhnou puh nahpoutuye kipei khomaitao hi haibüa paoa seive-e, ‘Puletao nou Anahpoutuye tsükhou peivuzü shulai.’ 7Ana kipei khomai taonou alinou lihi haibüa paoe, ‘Haihai paopuwo nahpoutu nasüe; tavelo, Eletao nou puhye southeawu laikhe ea puh kini taohai Eletao vei souloulai!’ 8Südonou puletao nou nahpoutu sünaye sü niloua southeare ea puh pfüphao hai darkha kipei vakouhi polai pare.”

9Jisu nou noue, “Sükulouzü darkha kipei paopuwo nou daisoulai? Puhnou veloua mai sütaoye southeawulai ea darkha kipei nasü kipei khomai kukhehi peiwulai. 10Sheeyu larübvü buh haina hai neletao nou phoukhai mohiwu:

‘Ki souyu mainou lulaiyu chuh nasü veishi jünou matsüyu ki kainghou chuh daloure.

11Haisü Mapao vei basha baie;

alia haihai Eletao nghojünou khupashoe.’ ”

12Alia puletao nou Jisu ye niloure donou te-e, daiolouzü nada nasü puletaoye paobaie touyu sü puletao nou süloure. Ana puletao nou maisouye piyu vanou puhye thaowu-a tare.

Kaisar hi Kikha Peiyu

(Mt 22.15-22; Lk 20.20-26)

13Phariseemai kamaitao ea Herod memaitao kamaiye Jisu mah phoupa loure donou Jisu hi seive-a panou chinoue. 14Puletao nou puh hi taveloua paoe, “Dou-apeio, newo mainou daitea cholai touyu vanou domoa chichenou paobaiwe touyu hai Ehnou süe; daiolouzü newo maizhai zhumoe, ana Ramai vei ludu hai chekhaoa doupei baiwe. Kaisar hi kikha peiyu razhai buho hae, Eh hi paopeio? Ehnou süsü peilaiho, peilaimoe?”

15Ana Jisu nou puletao dosü süloua puletao hi chila peie, “Daidonou neletao Eye zhai zhuwe? Ahi husha ali povepeio, alia Eye panou süsü zhukhaio.”

16Puletao nou puh hi husha ali povepeie ea puhnou puletao hi noue, “Haihai thaoh zhue ea thaohzhih rüthou khaitoue?”

Puletao nou chila peie, “Kaisar veie.”

17Südonou Jisu nou paoe, “Sükulouzü veishore, Kaisar vei hai Kaisar hi peio, alia Ramai vei hai Ramai hi peio.”

Alia puletao hrülai sü Jisu chipao hinou khupa loure.

Hrishuyu vanou Chi nouyu

(Mt 22.23-33; Lk 20.27-40)

18Süthaisü hrishuyu hae tea paoyu Sadukimai kamainou Jisu hi taveloua paoe, 19“Dou-apeio, Moses nou Ehye donou haibüa rüpeikhaitoue; ‘Maitalinou nahmailia ha-a puh chapfüye thaowu-a thaitalouzü, mai süna thaihouwo nou puh chapfüye nayuchie ea haibüa nahmaitao panou hrüloua sütaoye sü thaitayu mai sünavei toudzü tea kulai.’ 20Teile lihi chinamai poutumai anai bue; tsükhana sü sheeloua puhsü nahmailia ha-a thaire. 21Süthaisü ahai chenanou naotu süpaiye nakhaie, alia puh-a nahmaili-a ha-a thaikhaire; alia asü chena-a sübübaire; 22alia kukhemai taohi-a sübüa pare: puchinamai anainou naotu süpaiye nakhaitoue ea nahmai ha-a thaikhai tare. Akhai khailai hisü naotu süpai-a thaire. 23Chuo, hrishuyu teithe kisü puh hai thaoh chapfü soulai? Daiolouzü puchinamai anai taonou puhye nakhaitoue.”

24Jisu nou puletao hi chila peie, “Neletao nou mahtayu hai haivanou mowu? Daiolouzü neletao nou sheeyu larübvütao ea Ramai vei khouko halia sümoe. 25Daiolouzü thaimainou hrishuyu kisü, puletao hai rakihi rakivamaitao bübailai ea sheenghi laimoe. 26Alia thaimai hrishuyu vanou neletao Moses vei Larübvü hinou ngheimei taoyu ko hakia phoukhai mohiwu? Sühinou haibüa rüthou khaitoue süolouzü Ramai nou Moses hi paoe, ‘E hai Abraham, Isak, alia Jakob Ramaie.’ 27Puh hai ahrimai Ramaie, thaimai vei moe. Neletao mahshore!”

Chikha Aduna

(Mt 22.34-40; Lk 10.25-28)

28Alia razhai dou-apeimai alinou puletao nou chikhaia buyu sü chouloua ea Jisu nou Saduki maitaohi veishoa chila peiyu ngaoloukhaie puhnou Jisu hi chili noue: “Chikha kananou pfüphou jünou matsü tsülai nae?”

29Jisu nou chila peie, “Matsü tsülai nasü hainae, ‘O Israel maitao keilo! Eletao Ramai Mapaowo hai likheiyu Mapaowo baie. 30Alia nenou ne Ramai Mapaoye nele teiteinou, ne rako teiteinou, ne tsü teiteinou ea ne khouko teiteinou leshilai!’ 31Ahai chena matsü tsülai chikha nanou haire: ‘Nenou ne kinapaye lah neye leshiyu büa leshilai.’ Chikha haina hai jünou dukouyu kukhe ali-a hare.”

32Razhai dou-apeio sünanou Jisu hi paoe, “Dou-apeio, paovei shore! Nenou paoyu büa chekhaoe, süolouzü Mapaowo likheinou Ramaibaie ea ramai kukhe alia hae ana puhbaie; 33alia puhye le teiteinou, tsü teiteinou ea khouko teiteinou leshiyu, alia lah kinapaye lah büa leshiyu haihainou meidei-a popeiyu ea posheelayutao teitei jünou matsü koushohie.”

34Alia mai sünanou dokaishoa chila peiyu sü ngaoloukhaie Jisu nou puh hi paoe, “Ne hai Ramai vedei hinou doukhai more.”

Haithaisü maitalinoua khuvei-a Jisu hi chinou pukhai more.

Razhepu vanou Chi nouyu

(Mt 22.41-46; Lk 20.41-44)

35Jisu nou rathoki hinou doupeia buyu hinou haibüa noue, “Kabüa razhai dou-apei maitao nou Khristaye nou David Nahpoutu tea paowe? 36Rako Mashinou David ye süpeia panou haibüa paoe:

‘Mapaowo nou A Mapao hi paoe:

Enou ngaobamai taoye pove ne phihea soupeimo koutesü Abahkha zhoulo vanou bulo.’

37Lah David noua puhye ‘Mapao’ tea kue; südonou kabüa Khrista hai David nahpoutu khailai?”

Jisu nou Razhai Dou-apeimai vanou Tukha-a Paopeiyu

(Mt 23.1-36; Lk 20.45-47)

Alia mai alaonou puh chihai sashoa keinoue. 38Puhnou puletaoye doupeia buyu hinou haibüa paoe, “Razhai dou-apeimai taoye zhutoulo, süolouzü puletao hai zaocha zao-a hupobuh khonou tasühaoa maiye panou khurüyu sü züpae, 39alia puletao hai rathobuhtao hinou veiveilai buh ea nühbuh khonou tsükhouyu buhtao khayu züpawe. 40Puletao nou meamaipfü hinou kao-zhou avei zhuloua puletao vei ki-lu saolou baiwe, alia süthaisü maiye panou ngaoloure donou phaso veachi paowe. Puletao vei tudee hai teitei jünou shikalai!”

Meamai Pfüpai nou Popeiyu

(Lk 21.1-4)

41Jisu nou rathokihi pousha podzübuh ngheikinou buloua maikhe mainou pousha pove thouyu sü zhua bue. Hanimai alaonou pousha alaosou polaithoue; 42sükisü toure hayu meamaipfü ali-a taveloua pousha ali palousü taishoyu hubashanou ahai laithoue. 43Alia Jisu nou puh rozümai taoye puh hi kuve dzüloua puletao hi paoe, “Enou neletao hi chechenou paowe, toure hayu meamaipfü haipainou maikukhe hrülai jünou sha podzübuh hainahi thoukou shohie. 44Daiolouzü mai kukhetaowo louzü puletao vei alao buyu hinou koulih payutao nou peibaiwe; ana toure hayu naotu haipaiwo louzü puhvei buyu teitei— süolouzü puhye donou hriloure teitei peikhaire.”

Currently Selected:

MARK 12: POUMBSI

Highlight

Copy