MARK 11
11
Kolouyu Asah hinou Jisu nou Jerusalem hi Talouyu
(Mt 21.1-11; Lk 19.28-40; Jn 12.12-19)
1Alia puletao nou Jerusalem ngheiki Oliv deichi hi buyu Bethphage ea Bethani hi velouyu kisü, Jisu nou rozümai ahaiye raia seitare, 2alia puhaihi haibüa paopeie; “Nehai nghojühi buyu nuh nahi tawo. Nehainou sühi velou büyu kisü mailinoua raiki seikhai moyu rheisüh toutu ali rainou khikhai touyu ngaolai. Süsü pheipaloua haihi süveo. 3Alia maitalinou nehaihi, ‘Daidonou haibüa soue,’ tea noulouzü, ‘Haihai Dou-apeionou moshilaiyu bue ea buh haihi thalasou seikhaive peilai,’ tea puh hi paokhaio.”
4Südonou puhai nou taloua rheisüh toutu aliye dupehi buyu ki ali kikhu hinou khikhai touyu sü ve ngaoloure. Alia puhai nou sünaye rai pheipa-a buyu hinou, 5pehinou la-a buyu kamainou puhaihi noue, “Nehai rheisüh toutunaye rai pheipa-a daisoulai?”
6Jisu nou paopeiyu büa puhai nou chila peie ea mai sütaonou puhaiye panou tare. 7Puhainou rheisüh nasü Jisu hi süve-e ea puletao sabasü süna phaohi khupeiwu-a Jisu ye panou pabuloure. 8Maikhemai taolinou puletao sah hai luduhi khupeie ea kukhe mainou rekounou taho sübotao jüdeloua pove duhi raokhaipeie. 9Puh nghojülonou tayu ea thailonou puhthaifüa laiyu maitao nou haibüa shusoua raoe, “Hosanna! Mapao zhih hinou taveyu puh hai rakoveie! 10Veloua buyu Eletao puo David Veo vei Vedeisü rako veie! Akukulai hisü Hosanna!”
11Jisu nou Jerusalem hi talouloua rathoki hi tave-e, alia sühi buyu ha teiteiye zhusühaoe. Ana teinou naleyu vanou puhnou puh rozümai kiahaitaoye koa Bethani hi tare.
Jisu nou Doushibeye Chayu
(Mt 21.18-19)
12Thainaisho sü puletao nou Bethani hinou dakhai kouyu phakisü Jisu hai houloure. 13Puhnou doukonou doushibeli sünghou nou bonoupoa buyu sü zhingaoloua sühinou doushilia ngaolaihi mosa tea taho zhue. Ana puhnou sühi takouyu phakisü sünghou khaikho ngaolou baire, daiolouzü sükihai doushi shiyu khouteile mohie. 14Jisu nou doushibe nahi paoe, “Maitalinoua ne hinou doushi toupukhai khailaimoe!”
Alia puh rozümaitao nou süsü choue.
Rathoki Sousheeyu
(Mt 21.12-17; Lk 19.45-48; Jn 2.13-22)
15Puletao nou Jerusalem hi velou louyu kisü, Jisu nou rathokihi talouloua sühinou na zhoa ea hrüa buyu mai hrülaiye hushu tare. Puhnou sühinou shanou lea-a bumaitao vei arübuh ea rahou zhoyu maitao vei buhnaatao sü popeishou laire, 16alia puhnou maitaliye panou rathoki kijühi hatalia poloukhai bare. 17Süthaisü puhnou maikhe maiye doupei tare: “‘Tahrüh hrülai donou Akihai veachi paoyuki tea kulai’ tea rüthouwure mowu? Ana neletao nou haisü vaoyumai tutsübuh souwure!”
18Napao adumaitao ea razhai dou-apeimainou süsü chouloure, südonou puletao nou Jisu ye southeare donou do phoushure. Puletao sü puhye piwe, daiolouzü maisou hrülainou puhnou doupeiyu hisü khupa loure.
19Koukhe loukhaie Jisu ea puh rozümai taosü nuhdu süsü thaowu-a tare.
Doushibe hinou Doulouyu Ako
(Mt 21.20-22)
20Thainaisho shohna hisü puletao nou ludu süna hinou ta-a buyu hinou doushibe sünaye ngaoloure. Doushibe süsü manou pu kirüh tare. 21Alia Pitar nou raia payu nasü licholoua Jisu hi paoe, “Zhukhaio, Dou-apeio, nenou chapeiyu doushibe nasü thaire!”
22Jisu nou puletao hi chila peie, “Ramaiye lülo. 23Achechenou Enou neletao hi paowe, maitalinou deichi haina hai, ‘Nelah miposhu zaihi zhaolouwo,’ tea paolouzü, alia puhle hinou lekikhai molouzü, ana puh nou paoyu sü vetelai tea louche louzü, süsü puhye donou soupeilai. 24Qo haina vanou Enou neletao hi paowe: Neletao nou veachi pao-a hatali kholouzü, süsü neletao nou ngaoloure tea louchelo, alia neletao nou khoyu talisü neletao hi peilai. 25Alia neletao nou veachi pao-a layu sasü, neletao nou maitali pei hi motouyu bulouzü khaipeio; sübülouzü rakibu neletao Puonoua neletao nou soukhai touyu mah taosü khaipeilai.” 26(Ana neletao nou kukhe maiye khaipei molouzü, rakibu neletao Puonou-a neletao nou soukhai touyu mah taosü khaipei laimoe.)
Jisu vei Soulousü Zü vanou Chi nouyu
(Mt 21.23-27; Lk 20.1-8)
27Alia puletaohai Jerusalem hi veloupu khaire. Alia Jisu nou rathoki hinou tasühao-a buyu hinou, napao adumaitao, razhai dou-apeimaitao ea tsümai taonou puh hi taveloua, 28puh hinou noue, “Vah haitao souyu nevei soulousü zü dai bue? Zü haina hai thaohnou nehi peie?”
29Jisu nou puletao hi chilapeie, “Enou neletao hi chi alikhei noulai, alia neletao nou Ahi chila peilouzü, Enou neletao hi vah haitao souyu Ahi daizü bue touyu paongao peilai. 30Johan vei dzükhao dayu zühai daikinou ve: Ramai hinouho, mai hinoue?”
31Alia lah puletao hrohinou veiva-a paoe, “Eletao daichi paolai? Eletao nou, ‘Ramai hinoue,’ tea chila peilouzü, puh nou, ‘Sükulouzü daidonou neletao Johan ye louche moe?’ tea paolai. 32Ana Eletao nou, ‘Mai hinoue,’ tea paolouzü...” (Puletao sü maikhe maiye ngaopiwe, daiolouzü maikhemai hrülainou Johan hai rachi paolamai alie tea powe.) 33Südonou puletao nou Jisu hi “Eletaowo sümoe,” tea chila peie.
Jisu nou puletao hi chila peie, “Sükulouzü E-a neletao hi Enou vah haitaohai dai zünou sousa touyu hai paongao laimoe.”
Currently Selected:
MARK 11: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
