MARK 14

Jisu ye Southeare Do

(Mt 26.1-5; Lk 22.1-2; Jn 11.45-53)

1Chuo Tachonüh ea Raokonüh koumojü teithe ahai bubaire. Alia napao adumaitao ea razhai dou-apeimaitao nou khei-a Jisu ye niloure ea southeare donou do phoutare. 2Daiolouzü puletao nou paoe, “Haihai Eletao nou nüh teile hinou souwu laimoe, molouzü maisou hronou bvüro shulai.”

Bethani hinou Jisu ye Theadzü Noupeiyu

(Mt 26.6-13; Jn 12.1-8)

3Alia Jisu nou Bethani hinou bua loukhaora souyu Simon kihinou vaia bubukinou naotumai alinou kai nüvei shoyu ea muhtei shoyu sheetouyu nard theadzünou phoupeiyu chuh kaanou souyu khouli poloua tave. Puhnou khou nasü dakhao paloua kainüvei theadzü nasü Jisu pei hi lakhai peire. 4Ana sühi buyu mai kamainou rarouloua alinou lihi haibüa paoe, “Daidonou theadzü nahai haibüa souhawe? 5Daiolouzü haihai husha kaihsü muh jü koua zholou süe, alia pousha nasü toure hamai hi peilou veie!” Alia puletao nou puhye sü raochichi peire.

6Ana Jisu nou paoe, “Puhye panou lah buwo; daidonou neletao nou puhye souchowe? Puhnou Ahi ha veili soupeire. 7Daiolouzü neletaowo toure hamaiye teisanou koa bue ea neletao nou züpayu teile tali hinou puletaoye soukha peilou süe; ana neletao nou Eye koa teisanou bulai moe. 8Puhnou soulousü nasü puhnou souloure; puhnou Apfüphao hai vure donou raia kaivei theadzünou noupeire. 9Alia cheche nou Enou neletao hi paoe, deiphao teiteihi ko avei paodou tayu buh takihi puhnou soukhai touyu nasü puhye li-choloure donou paotalai.”

Judas nou Jisu ye Shoh soure Lüpeiyu

(Mt 26.14-16; Lk 22.3-6)

10Süthaisü kiahai hrohinou ali soua buyu Judas Iskariot nou Jisu ye napao adumaitao bah hi shohdo southou peire donou puletao hi tare. 11Alia puletao nou puh chipaosü chouloua le sasho loure, alia puhye sha peire donou apaopeire. Südonou Judas nou Jisu ye puletao bah hi thoupeire donou zhou avei phoushu tare.

Jisu nou Tachonüh Vai puh Rozümaitaoye koa Touyu

(Mt 26.17-25; Lk 22.7-14,21-23; Jn 13.21-30)

12Alia Raoko nüh vei teithe raikai kisü, Tachonüh tovai vei zhaotu datheayu teithehi Jisu rozümai taonou puh hi noue, “Nenou Ehye panou daikinou neye donou taho Tachonüh vai soudayu züpawe?”

13Süthaisü Jisu nou puh rozümai ahaiye seita-a puhaihi haibüa paopeie: “Nuhdu nahi taloulo, alia dzükhouli pfütayu mai alinou nehaiye daolai; puhthai fülo, 14alia puhnou talouyu ki talivei paopuna hisü haibüa paokhaio: ‘Dou-apeionou paoe, Enou houre buh kahi bue. Enou Arozümaitaoye koa daikinou Tachonüh vai toulai?’ 15Süthaisü puhnou nehaihi buh-züh souda chekhouwuyu ea dushoyu kishorei kide ali ngaopeilai, sühinou nehainou Eletaoye donou ha teitei soudalai.”

16Alia rozümai sühainou taloua nuhdu sühi veloure ea ha teitei sü Jisu nou puhaihi paopeiyu büa ve ngaoloure; alia puhai nou Tachonüh vaisü soudare.

17Alia koukhe loukhaie, Jisu nou rozümai kiahaitaoye koa tave-e. 18Alia puletao nou arübuh vanou toua bubu kinou, Jisu nou paoe, “Enou chekhaoa neletao hi paoe, neletao hrohinou alinou süolouzü Eye koa touyu nanou Eye shoh soupeilai.”

19Rozümaitao sü leveasho loure ea shoshonou puh hi noushu tare, “Süsü Ewu?”

20Jisu nou chila peie, “Süsü neletao kiahai hrohinou Eye khaoh ali hinou koa raokhao sücha zhoyu nasüe. 21Mai Nahpoutu louzü sheeyu larübvü nou puh vanou paopeiyu kua tarabaie; ana Mai Nahpoutuye shoh soupeiyu mai süna donou daizhozhou ngaopisa! Mai süna donou nakoukhai moyu nanou veikou shohie!”

Mapao vei Lito

(Mt 26.26-30; Lk 22.14-20; 1 Kor 11.23-25)

22Alia puletao nou toua bubu kinou, Jisu nou raokhaoli poloua hapeire, alia süsü soukhowu-a puh rozümaitao hi polapeia paoe, “Haihai Apfüphaoe, polouwo.”

23Süthaisü puhnou paili poloure, alia puhnou Ramai hi kalo paoyu kisü, süsü puhnou puletao hi peie; alia puletao hrülainou sühinou poa küloure. 24Alia puhnou puletao hi paoe, “Haihai mai alao donou küpa peiyu Vo soukhaiyu Azhe nasüe. 25Chechenou Enou neletao hi paoe, Ramai Vedei hinou Enou sünahai sheetoua külaiyu teithe vemo koutesü, Enou darkha shi haina hinou küpukhai laimoe.”

26Süthaisü puletao nou lou ali souloua Oliv deichi vahi tapare.

Pitar nou Jisu ye Bare Raia Paopeiyu

(Mt 26.31-35; Lk 22.31-34; Jn 13.36-38)

27Jisu nou puletao hi paoe, “Neletao hrülai Eye thaowu-a tuta bailai, daiolouzü sheeyu larübvü nou paoe, ‘Enou zhaokhowoye southeawulai, alia zhaotu sü ratakhailai.’ 28Ana Enou hrishu louyu thaisü, Enou neletao jünou raia Galileehi talai.”

29Pitar nou chila peie, “Kukhemai hrülainou neye thaotayuma, Ewo neye hakia thaokhai laimoe!”

30Jisu nou Pitar hi paoe, “Enou nehi paowe, süolouzü zhoukhei houjünou khao ahaikho mojünou nenou Eye lüh asü laiwulai.”

31Ana Pitar nou chihpushoa paoe, “Enou neye koa thaire koute hia, E neye laikhai laimoe!”

Alia rozümai kukhe hrülai-a sübüa paoe.

Gethsemane hinou Jisu nou Veachi Paoyu

(Mt 26.36-46; Lk 22.39-46)

32Puletao nou Gethsemane tea kuyu buh alihi taveloure, alia Jisu nou puh rozümaitao hi paoe, “Enou veachi paobuki haihinou kou buwo.” 33Alia Jisu nou puhye koa Pitar, Jems ea Johanye satare, alia puh hisü levea shoyu ea le choroyu vedaore. 34Alia puhnou puletao hi paoe, “Arako hai veathou thairesoua bure; haihi chaokhaio, alia zhaihe toulo.”

35Alia puhnou nghojülo tadouphou kouloua deiphinou kou kaoloure ea soulou veilouzü veahoyu teile nasü puh hinou polata peire donou veachi paotare. 36Alia puhnou paoe, “Abba, Apuo! Neye donou hatali soulou süe. Veayu pai haina hai Ahinou povai peio. Ana Aleli moa neleli soulouwo.”

37Alia puhnou khaikouyu kisü, rozümai asütaosü zhia bu-a ngaoloure. Sükisü Jisu nou Pitar hi paoe, “Simon, ne zhia buwu? Ne teilecho ali koutea zhaihe-a bulouhorewu?” 38Alia puhnou puletao hi paoe, “Neletao athaohi loulou more donou zhaihelo ea veachi paolo; rakowo louzü chechenou züpawe, ana vasouwo louzü lelouhoe.”

39Alia puhnou tapuloukhaia leh chipao büa veachi paoe. 40Süthaisü puhnou rozümaitaohi khaikoupue ea puletaoye zhia ngaoloure, daiolouzü puletao nghisü süübeire; alia puletao nou puh hi dai chila peilaisa touyu sükhai more.

41Puhnou lüh asü chena khaikouyu kisü, puhnou puletao hi paoe, “Neletao chu koute-a zhia ea soa buwu? Tai süre! Phasü vere! Zhukhaio, chuo Mai Nahpoutuye sü mahmaitao bah hi thoupeire. 42Shulouwo, Eletao talairekhe. Zhukhaio, Eye shoh soupeiyu nasü haihi bure!”

Jisu ye Nilouyu

(Mt 26.47-56; Lk 22.47-53; Jn 18.3-12)

43Alia Jisu nou chi paobebu kinou thalasoua rozümaitao kiahai hrohinou alisoua buyu Judas sü tavere. Puhye koa napao adumaitao, razhai dou-apeimaitao ea tsümaitao hinou seiveyu khoche ea süda poyu mai alaosou tavere. 44Chuo shoh soupeiyu mainanou puletao hi shee ali pei-a paoe. “Enou münou murenasü neletao nou züpayu mainae; puhye nilo ea khotouloua puhye sapoa tawo.”

45Judas nou veloulou bükhaie, puhnou Jisu hi takouhaloua paoe, “Dou-apeio!” alia puhye münou mue. 46Südonou puletao nou puh pei hi bakha khakhaia puhye niloure. 47Ana ngheikinou la-a buyu mai alinou puhvei khoche paizhouloua napao peichana kilai naye sü podao-a puh nousü jadere. 48Süthaisü Jisu nou puletao hi paoe, “Maivei saotoumai aliye nilaiyu büa khoche ea südatao poa Eye niloure donou neletao tavewu? 49Teithetsü Enou rathoki hinou doupeia neletaoye koa bue, alia neletao nou Eye nimoe. Ana sheeyu larübvü chihai veteloutheo.”

50Sükisü rozümaitao hrülainou puhye thaowu-a tutakhaire.

51Alia jüyu sah likheithe babaiyu nahlemai alinou Jisu thaifüa takoue; puletao nou puh ye niloure, 52ana puhnou puh sahbasü thaowu-a baitoua tutare.

Jisu nou Tsüme Nghojühi ve Layu

(Mt 26.57-68; Lk 22.54-55; Lk 22.63-71; Jn 18.13-14,19-24)

53Süthaisü puletao nou Jisu ye napao peichana kihi satare; alia sühinou napao adumaitao, tsümaitao ea razhai dou-apeimaitao hrülaisü vedzüa bue. 54Alia Pitar nou adoukounou puhthai füpoa napao peichana kijühi tave. Sühinou puhnou kou chobuloua reihkhaomai taoye sa-a meipenou meivoua bue. 55Chuo napao adumaitao ea tsüme teiteinou Jisu ye southeare donou Jisu hinou dayu zhopaoh phoue; ana puletao nou halia ngaolou moe. 56Daiolouzü mai alaonou puh pei hi dayu zhopaoh peie, ana puletao vei zhopaoh taosü thaomoe.

57Sühinou mai kamainou lashuloua puh pei hi dayu zhopaoh peia paoe: 58“Bahnou soukhai touyu rathoki hainasü Enou souhawu-a bahnou soumoyu rathoki kukheli, teithe asü levai hinou Enou soupeilai, tea puhnou paoyu hai Ehnou choue.” 59Ana sükoutea puletao vei zhopaoh sü thaokhai more.

60Alia Napao Peichana nou puletao nghojünou lashuloua Jisu hi noue, “Ne chila peire lia hawu? Mai haitaonou nepei hi motoua dukhaiyu hai daie?”

61Ana Jisu nou ngasou buloua chila lia peimoe. Süthaia Napao Peichana nou puh hi noupue, “Ne hai Rako Avei Ramai Nahpoutu Khristawu?”

62Jisu nou chila peie, “E-e; alia Mai Nahpoutu nou khoukhoulaiwo vei bah zhoulo vanou bua raki teihaopei vanou taveyu neletao hrülainou ngaolai!”

63Napao peichana nou puh sah daophaloua paoe, “Eletao nou süpeinou zhopaoh kukhe phoupuyu dai zhiyu bue? 64Puhnou Ramaiye paoshiyu sü neletao nou chouloure. Kakua neletao nou chowe?”

Alia puletao hrülainou puh hai thaizüe tea puh pei hi mah dukhai peire.

65Alia puletao hronou kamainou Jisu vahi taidzü süshopeie, alia puletao nou puh nghisü sahnou züwu-a ea puhye dapeia paoe, “Neye thaohnou dawe, paokhaio!” Alia reihkhaomai taonou puhye bahzünou dapeia saloure.

Pitar nou Jisu ye Bayu

(Mt 26.69-75; Lk 22.56-62; Jn 18.15-18,25-27)

66Alia Pitar nou chu koutea deiphi kijü hinou buyu phahinou Napao Peichawo vei kilai loumaina alisü tave-e. 67Alia Pitar nou meivoua buyu sü puhnou ngaoloukhaie, Pitar hi zhuteiloua paoe, “Ne-a Nazareth hi Jisu ye koa laiwe.”

68Ana puhnou süsü ba-a paoe, “Ewo sümoe moa nenou dai paosa touyu vei ko-a Ewo sümoe; alia puhsü kijü bomühi tapare.” Sübühinou houjü nou khaopare.

69Süthaia kilai loumaina painou puhye sühinou ngaoloukhaie ngheiki la-a bumai hi paopukhaie, “Mai haina hai puhmaitao hrohinou alie!” 70Ana Pitar nou süsü bapu khaire.

Alia phajü thaisü ngheikihi la-a bumainou Pitar hi mah dukhaia paopu khaire, “Ne hai puletao hrohinou alie touyu hisü nenou hakia balou hoe, daiolouzü ne-a Galilee himaibaie.”

71Ana Pitar nou lahye cha-a ea choungao-a paoe, “Neletao nou pao-a buyu mai hainaye sü E sükhaimoe!”

72Sübühinou houjünou lüh ahai chena khaopare. Alia Pitar nou puh hi Jisu nou kabüa, “Houjünou khaohaikho mojünou nenou Eye lüh asü chena koute balai,” tea paopeiyu sü liloure. Alia puhsü shochesou kraloure.

Currently Selected:

MARK 14: POUMBSI

Highlight

Copy