LUK 2

Jisu ye Nayu

(Mt 1.18-25)

1Teile sükisü Kaisar Agasta hinou deiphao teiteisü maipei rüre donou kharochi vere. 2Quirinia nou Suria hinou teidei khowona soubu kisü maipei rüyu sünanou raikaiyu nasüe. 3Südonou mai hrülainou lahla vei nuhbuh hinou zhih rüthoure donou takhaire.

4Südonou Josef-a Galilee hi Nazareth nuhduna hinou tapoa Judea hi Bethlehem tea kuyu David vei nuhduna hi tare, daiolouzü puhsü David vei khü ea kikha hinou ve. 5Puhnou puh ki tokhai touyu, poupfüa buyu Meri ye koa zhih rüthoure donou tare. 6Alia puhai nou sühi bubukinou puhye donou nah nare phasü veloure. 7Alia puhnou puhvei raikaiyu nahpoutuna sü naloure ea puhye sü sahzünou pozütouloua rheikhaohi pozüre, daiolouzü shevai chaoyuki sühisü puletaoye donou chaorebuh hare.

Zhao Khomaitao ea Rakivamaitao

8Alia teidei sühisü zhaokhomai kamainou rekounou nai-a khei hinou puletao vei zhaokhosü khoa bue. 9Alia Mapao vei rakivamai alinou kou puletao nghojünou laloure, alia Mapao vei khouko-avanou puletao hisü varu peire. Südonou puletaosü ngaopisho loure. 10Ana rakivamai sünanou puletao hi paoe, “Pikhaiso! Daiolouzü zhukhaio, mai hrülai donou sasho laiyu ko avei nasü Enou neletao hi povewe; 11daiolouzü zhou teithehi David vei nuhdu hinou neletaoye donou Khailu-apeio ye sü naloure, puhsü Khrista, Mapaowo süe! 12Alia neletaoye donou süloure shee nasü haire: neletao nou sahzünou pozütou khaitouyu nahtou ali rheikhao hinou züa buyu sü ngaoloulai.”

13Alia pha sübü hinou rakivahi reihmaime adu linou rakivamai sünaye koa sühinou Ramaiye shoyu lou soua haibüa shaloure:

14“Aku kulai raki hinou Ramaiye sholo,

alia deiphao hinou puh züpa soua buyu maitao hrohisü kaonayu buloutheo!”

15Rakivamai taonou puletao hinou rakihi khaidatayu thaisü, zhao khomaitao nou alinou lihi haibüa paoe, “Eletao Bethlehem, hi taho Mapao nou Eletao hi paosü peiyu pawuyu chi sünasü zhulaikhe.”

16Südonou puletao nou thala taloua Meri ea Josef ye alia rheikhao hinou züa buyu nah sünaye tave ngaoloure. 17Puletao nou puhye ngaolouyu kisü, nah süna vanou puletao hi paosü peikhai touyu chi nasü puletao nou paosü peire; 18alia zhao khoyumai taonou puletao hi paongao peiyu süna vanou ko süna choulouyu mai hrülai sü khupa loure. 19Ana Meri nou chi sütaosü puh le hinou cho-a paopeiyu sütao teiteisü puh lekhehi poku khaire. 20Alia rakivamai sünanou puletao hi paopeiyu sübütoua puletao nou tave sütao teiteisü choulou ea ngaolouyu vanou, zhao khomaitao sü shoyu lounou soua ea Ramaiye paoshoa khaitare.

Jisu ye Zhih Sayu

21Alia nah sünaye hee vadere donou teithe achazhou akhai kisü, puhye pou pfüshumo jühinou raia rakivamai sünanou puhzhih peiyu sübüa puhye sü Jisu tea sawure.

Jisu ye Rathoki hi Saveyu

22Alia Moses vei razhai thaifüa puletaoye donou sousheere naa souyu teile veyu kisü, Josef alia Meri nou nah sünaye Mapaowo hi peire donou puhye sü Jerusalem hi save, 23daiolouzü haibüa Mapao vei razhai hinou rüthou khaitoue, “Poutu narai hrülaisü Mapaowo hinou sheeyuna tea kulai.” 24Alia puhai nou Mapao vei razhai hinou paokhai touyu thaifüa, rapüpüyu rahou ahai moa rahou toutu ahai posheelare donou tare.

25Alia sükisü sühisü Simeon tea kuyu mai ali Jerusalem hi bue. Mai hainasü checheyu ea Ramai hinou leishoa Israelmai taoye sousa peilaiyu teile nasü zhia buyu mai alie, alia Rako Mashinou puhye koa bue. 26Alia puhsü Mapao vei Razhepuye ngaomo koutesü thai khailaimoe touyu sü Rako Mashinou puh hi pongao peire. 27Südonou Simeonye Rakonou süpei-a Rathokihi tave. Alia razhai thaifüa pfüpuo nou nahtou Jisu ye naa soure donou Rathokihi saveyu kisü, 28Simeon nou nahtou Jisu ye sü daopoloua Ramaiye shoa paoe:

29“Mapao, chuo nevei chipao thaifüa, nenou nevei kilaiye panou kaona-a taloubaiwo;

30daiolouzü nenou maikhemai hrülai nghojü hinou soudapei khaitouyu,

31nevei khailu peiyu nasü

Anghithou vuzünou ngaoloure,

32puhsü tahrüh kukhemai taohi nevei tsüdo pongao peire donou ava,

alia nemai Israel maitao hi khouko-ava pove peiloure nasüe.”

33Alia puh pfüpuosü puh vanou sübüa paoyu donou khupa loure. 34Süthaisü Simeon nou puletao hi hapei-a puh pfü Meri hi paoe, “Zhukhaio, nahtou hainasü Israel maitao alao donou kaotare ea maitaoli donou lashu loure, alia maikhe mainou paoshisho peilaiyu shee süna donou dopapei khaitoue, 35alia südonou maitaolivei kheitsü nasü popangao peiwulai. Alia lah nevei lethou hisü khoche alinou khüthoulai.”

36Alia sühisü Asher khü hinou veyu Phanuel nah naotupai Anna tea kuyu rachi paolapai ali bue. Puhsü tsüshore; puhsü nghiyuthai puh chaaye koa po anai hrüe, 37alia süthaisü puhnou po raichadai meamaipfü ali soua hrükoure. Puhnou khei-heanou lüh-a ea veachi paonou ko-a Ramaiye thoa Rathoki hinou thaokhaimoa bue. 38Alia puhnou teilecho sübü hinou tapaloua Ramai hi kalo paoloure, alia puhnou Jerusalem ye khailupa peire donou zhia buyu maitao hrülaihi nahtou süna vanou paongao peire.

Nazareth hi Khaiveyu

39Alia Josef ea Meri nou Mapao vei razhai thaifüa naa soure souchewuyu thaisü, puletaosü lah puletao vei nuhbuh Galilee hi buyu Nazareth hi khaitare. 40Alia nahtou sünasü dushuloua khou-chihloure ea puh hisü ratsünou phouloure, alia Ramai vei zhuveasü puh pei hi buloure.

Nahtou Jisu nou Rathoki hi Vebuyu

41Alia puh pfüpuosü po pasah sü Tachonüh kisü Jerusalem hi tawe. 42Alia puhnou po kiahai tsüpayu kisü, puletaosü zhai thaifüa nühbuh hi tave. 43Alia nüh süna cheyu thaisü, puletao sü kilo khaitayu hinou, nahtou Jisuwo louzü puhai thainou Jerusalem hi naitare, sütoukhaia sübüyu sü puh pfüpuo nou süloumoe; 44ana puhai nou puhsü puletao vei me hinou koa laiwe tea chodaloua puhaisü nai zhoa tayu veihdu nasü tachere. Alia süthainou puhai nou puh ye sü puhaivei tarai ea samaitao hrohinou phoushu tare; 45alia puhai nou puhye phouhayu thaisü, puhaisü puhye phoupoa Jerusalem hi dakhai tare. 46Teithe asü thaisü puhai nou puhye Rathoki levai hinou dou-apeimaitao hrohinou chobua puletao nou paoyu kei-a ea puletao hi chi noua buyu sü ngaoloure; 47alia puhvei chipao choulouyu mai hrülai sü puhvei tsü veishoyu ea kaishoyu chilatao sü chouloua khupare. 48Puh pfüpuo nou puhye ngaolouyu kisü puhaisü khupa loure; alia puh pfünou puh hi paoe, “Anahna, daidonou nenou Eh hi haibüa souwe? Zhukhaio, nepuo Ahainou neye donou le kishoa phouta-a bue.”

49Puh nou puhaihi paoe, “Nehainou Eye phou-a buyu sü daidonoue? Esü Apuo ki hinou buvuzülai touyu sü nelenou sümowu?” 50Ana puh nou puhaihi paoyu chi sünasü puhai nou süloumoe.

51Südonou Jisu nou puhaiye koa takouhloua Nazareth hi khaivere, alia sühinou puhnou puhai chi züa bue. Ana puh pfünou sütao teitei sü puhvei lekhehi pokukhaire. 52Sübüa Jisusü ratsü hilo-a ea pfüphao hilo-a dushu loure, alia Ramai nou ea emainou khu-leshi peiyu hinou dushu loure.

Currently Selected:

LUK 2: POUMBSI

Highlight

Copy