LUK 3

Johan Baptist nou Ko Paodouyu

(Mt 3.1-12; Mk 1.1-8; Jn 1.19-28)

1Tiberia nou Veduwo soua hrüyu po kiangou chenahi, Pontia Pilat nou Judea vei Teideikhowona soua bubuki, Herod nou Galilee hi veo soubuki, alia puh thaihou Philip nou Iturea ea Trakhonitis teideihi veo soubuki, Lusania nou Abilene hi Veo soua bubuki, 2alia Annas ea Kaipha nou napao peichamai soua buyu teile kisü, rekounou Zekharia nahpoutu Johan hi Ramai vei chipao sü veloure. 3Südonou puhnou Jordan reipehi buyu teidei teitei hi taloua mah khailu peire donou le dalouyu vei dzükhao daloure vanou ko paodou tare. 4Haisü Isaiah rachi paolawo nou paoyu puhvei larübvühi rüthouyu büe:

“Rekounou kamainou shawe,

‘Mapao vei ludu nasü soudalo;

Puhvei ludu taosü souzülo!

5Deithou teitei sü pothou phoulai,

alia deichi ea deichidu teiteisü ponawulai;

khiyu ludu taosü pozülai,

alia chimoyu thou-tao teitei sü maichiwulai;

6alia maitya hrülainou Ramai vei

khailu peiyu sü ngaolai!’”

7Südonou puhnou puh hinou dzükhao dalaitea taveyu maisoutao hi paoe, “Oh nghou tao-nah khemai! Neletaoye thaohnou vere Ramai vei achana hinou tutalouwo tea tukha peiwe? 8Neletao hai neletao vei mah hinou le daloure touyu pongaore vah taonou soukhaio. Alia neletao lah neletao hrohinou, ‘Abraham hai Eletao vei puo-paoe’ tea paoshuwuso; daiolouzü Enou neletao hi paowe, süolouzü Ramai nou chuh toutu haitao vanou Abraham hi puhvei tyaonah maitao panou palou süe! 9Chukoutea süübetao mahi marei sü daothou khaitoua bue; südonou avei rashi shimoyu süübe tayesü vikaowu-a meihi khilaithouwu baiwe.”

10Alia maikhemai taonou puh hi noue, “Sübülouzü Ehnou dai soulai?”

11Puhnou puletao hi chila peie, “Zao ahai buyu puhnou halia hayu puh hisü zhikhaio; alia touso buyu puh-a sübü-a soukhaio.”

12Kikha khayumai kamai-a dzükhao daloure donou tave, alia puletao nou puh hi noue, “Dou-apeio, Ehnou dai soulai?”

13Alia puhnou puletao hi paoe, “Khada peikhai touyu jünou kou-a khapuso.”

14Süthai-a reihmai kamaitao nou puh hi noue, “Sübülouzü Ehwo dai soulai?”

Puh nou puletao hi paoe, “Maitali hinou-a soupi-a thou-sha saowuso, moa mada-a maitaliye mah dukhaiso, alia lah neletao vei zho sünanou khaloubaio.”

15Ana maikhe mainou zhishoa khoa buyu hinou ea maikhemai hrülainou puletao lehinou Johanye nou Khrista moma tea cho-a buyu hinou, 16Johan nou puletao hrülaihi chila peie, “Enou neletaoye dzünou dzükhao dapeie; ana Ajünou khouchih shoyu puhsü laire. Esü puhvei phikha rai pheipayu koutea züdou moe. Puhnou neletaoye Rako Mashinou ea meinou dzükhao dapeilai. 17Thaihi thoutaosü sousheeloua southou taosü puhvei thoupao hi pove dzüloure donou puhbah hi thouhü bue; ana puhnou thouba taosü ngheikhailai moyu meihi pothou deilai.”

18Sübüa, kukhe süpeiyu chipao taolinoupu puhnou maikhemai hisü ko avei nasü paodou peie. 19Ana Herod Veoye puhvei thaihou chapfü Herodiaye nalouyu vanou ea puhnou souyu kukhe vah ashitao vanou Johan nou tukha-a züpeiyu donou, 20Herod nou ashi sütao veishi pei hisü haina-a thoupure, süolouzü puhnou Johanye hukhahi panou pothou bere.

Jisu ye Dzükhao Dayu

(Mt 3.13-17; Mk 1.9-11)

21Maikhe maiye dzükhao dapeiyu thaisü, alia Jisu-a dzükhao daloua veachi pao-a buyu hinou, rakisü houpare, 22alia Rako Mashisü pfüzhonou khao büa kou puh pei hi taoloure. Alia raki hinou pai alisü haibüa shakoue, “Ne sü Enou leshi shoyu Anah Poutue. Enou nehisü rukha shore.”

Jisu vei Puo-pao

(Mt 1.1-17)

23Jisu nou puhvei vah soushu tayu kisü, puhsü po shirou pha pare. Puhsü (maikhe mainou choyu thaifüa) Josef nahpoutue, puh puosü Heli toue, 24puh puosü Mathat toue, puh puosü Levi toue, puh puosü Melkhi toue, puh puosü Jannai toue, puh puosü Josef toue, 25puh puosü Matathia toue, puh puosü Amos toue, puh puosü Nahum toue, puh puosü Esli toue, puh puosü Nagai toue, 26puh puosü Maath toue, puh puosü Matathia toue, puh puosü Semein toue, puh puosü Josekh toue, puh puosü Joda toue, 27puh puosü Joanan toue, puh puosü Rhese toue, puh puosü Zerubabel toue, puh puosü Salathiel toue, puh puosü Neri toue, 28puh puosü Melkhi toue, puh puosü Addi toue, puh puosü Kosam toue, puh puosü Elmadam toue, puh puosü Er toue, 29puh puosü Joshua toue, puh puosü Eliezar toue, puh puosü Jorim toue, puh puosü Mathat toue, puh puosü Levi toue, 30puh puosü Simeon toue, puh puosü Judah toue, puh puosü Josef toue, puh puosü Jonam toue, puh puosü Eliakim toue, 31puh puosü Melea toue, puh puosü Menna toue, puh puosü Matatha toue, puh puosü Nathan toue, puh puosü David toue, 32puh puosü Jesse toue, puh pousü Obed toue, puh puosü Boaz toue, puh puosü Salmon toue, puh puosü Nahshon toue, 33puh puosü Amminadab toue, puh puosü Admin toue, puh puosü Arni toue, puh puosü Hezron toue, puh puosü Perez toue, puh puosü Judah toue, 34puh puosü Jakob toue, puh puosü Isak toue, puh puosü Abraham toue, puh puosü Terah toue, puh puosü Nahor toue, 35puh puosü Serug toue, puh puosü Reu toue, puh puosü Peleg toue, puh puosü Eber toue, puh puosü Shelah toue, 36puh puosü Kainan toue, puh puosü Arphasad toue, puh puosü Shem toue, puh puosü Noha toue, puh puosü Lamekh toue, 37puh puosü Methuselah toue, puh puosü Enok toue, puh puosü Jared toue, puh puosü Mahalaleel toue, puh puosü Kainan toue, 38puh puosü Enosh toue, puh puosü Seth toue, puh puosü Adam toue, puh sü Ramai nahpoutue.

Currently Selected:

LUK 3: POUMBSI

Highlight

Copy