LUK 1

1Raikai kinou nghithounou ngao-a zhopaoh souyutao ea chipao sünavei kuvah souyu taonou Eletao hi thoupeiyu büa, 2mai taolinou Eletao hrohinou pacheyu vah sütaovei vanou ko shoshonou rüre te-a buyu donou, 3Oh dushoyu Theophilas, E-a shurai hinou veishi sheesha-a sü-a buyu donou, nehi paodou peiyuna teitei sütaovei chechena vanou panou neye süloure donou, 4kobvüli shoshonou neye donou rüyuhai veivu zülai tea Enou chowe.

Johan Baptist ye Nare Paosü Peiyu

5Herod nou Judea hi veo soua bubukisü, sühisü Abija vei napao mehi buyu Zekharia tea kuyu napaomai ali bue. Puh chapfüsü Aaron khü hinou ve, alia puh zhihsü Elizabeth toue. 6Puhai maihainou Mapao vei razhai ea chikhatao sü soutaosou züa, Ramai nghojünou chaa lia ha-a cheche hinou hrüwe. 7Ana puhaisü nahmai hae, daiolouzü Elizabeth hai nahah-e alia puhai ahai nou khailoure.

8Nai teithe lisü puh mevei kuvah soure kho teile veyu thaifüa, puhnou Rathoki hinou naa soua buyu hinou, 9napaomai zhai thaifüa Mapao vei Rathokihi talou kai nüvei mei taore donou rako zhua puhye doloure. 10Alia maikhemai hrülai sü kaivei mei tao-a buyu phakisü vakou hinou veachi pao-a bue.

11Sükisü, Mapao vei rakivamai alinou sühisü taveloua kai nüvei mei tao-a buyu sheelabuh bahkha zhoulo hinou ve la-a buloure. 12Alia Zekharia nou puhye ngaolouyu kisü khupasho loure, ea ngaopinou phouloure. 13Ana rakivamai sünanou puh hi paoe, “Pikhaiso, Zekharia, daiolouzü nevei veachi sü noupeire, alia ne chapfü Elizabeth nou nahpoutumai ali hrülai, alia nenou puh zhih sü Johan tea salai. 14Alia puhye nayu kisü neye donou daizhozhou sa-valaisa, alia kukhemai taoli donou daizhozhou salaisa; 15daiolouzü puhsü Mapaowo nghojü hinou dulai. Puh sü darkha zhaoh-a moa kukhe zhaoh talia külaimoe, alia puhsü nakourai hinou Rako Mashinou phoulai. 16Alia puhnou Israelmai taoliye puletao Ramai, Mapaowo hi sakhai velai. 17Alia puokhemaitao lesü nahmaitao hi ea paoyu zübayu maitaoye cheche maitao vei ratsü nahi panou khaive loure Mapaoye donou souda louyu maitaoye tuda loure donou puhnou Elijah vei rako ea khouko hinou Mapaowo nghojü hinou raia talai.”

18Zekharia nou rakivamai nahi paoe, “Süsü Enou kabüa süloulai, daiolouzü Esü khaimai alie ea Achapfü-a chipai loure?”

19Rakivamai sünanou puh hi chila peie, “Esü Ramai nghojü hinou la-a buyu Gabriel süe, alia nehi paopeire ea ko avei haina pove peire donou Eye seive peibaie. 20Alia zhukhaio, shee haitao pamo sasü ne hai la ha-a chi paolou holai, daiolouzü teile kaovei hinou vete laiyu Avei chipao taosü nenou louche peimoe.”

21Süphakisü maikhemai taosü Zekhariaye khoa bue ea puhnou Rathoki hinou phashoh chao-a buyu donou puletao sü khupaloure. 22Alia puhnou vakouhi tapayu kisü puhsü puletao hi chi paolou hore, alia sübüyu donou puh hai Rathoki hinou zho ali ngaoloure touyusü puletao nou süloure; alia puhnou puletao hi puh bahnou zhangao-a la phamoa bue.

23Alia puhnou rathokihi vah soure teile cheyu thaisü, puhsü puh kihi khaivere. 24Teile phajü thaisü puh chapfü Elizabeth sü poupfü loure, alia khouh angou phasü puh lah tutsü-a haibüa paoe. 25“Enou maikhemai nghojü hinou ahrao ngao-a buyu nasü pota peiloure donou Mapaowo nou Eye tave zhupeiyu ki haibüa soupeiwure.”

Jisu ye Nare Paosü Peiyu

26Elizabeth nou poupfüyu khouh arou payu kisü Ramai nou rakivamai Gabriel ye Nazareth tea kuyu Galilee hi nuhdu nahi seive. 27Puhnou veyuhai David khü hinou veyu Josef tea kuyu mai süna kihi tokhai touyu loumaina süpaihi ko povere donou ve. Loumainapai zhihsü Meri toue. 28Alia puhnou puh hi taveloua paoe, “Nehi kaonayu buloukhaio, O Ramai nou khu-leshi shoyupai! Mapao nou neye kozhoa bue.”

29Ana Meri sü puhvei chipaotao vanou tsübo phouha zheire, alia puhvei chiko nasü daitousa tea khupasho loure. 30Rakivamai sünanou puh hi paoe, “Pikhaiso, Meri, daiolouzü neye Ramai nou khuleshi peire. 31Alia zhukhaio, ne sü poupfüloua nahpoutu ali hrülai, alia nenou puh zhihsü Jisu tea salai. 32Puhsü dusholai, alia puhye nou Aku Kulai Ramai Nahpoutu tea kulai. Alia Ramai, Mapaowo nou puh hi puhpuo David vei Vebuh sü peilai, 33alia puhnou teisanou Jakob tyaonah khemai pei hisü veo soua hrülai, alia puhvei vebuh sü hakia akhai bulaimoe!”

34Meri nou rakivamai sünahi noue, “Kabüa haisü souloulai, daiolouzü Esü loumaina alibaie?”

35Rakivamai sünanou puh hi chila peie, “Rako Mashi nou nehi kou loulai, alia Aku Kulaivei khouko sünanou neye züloulai. Südonou nakoure sheeyu nah sünaye sü Ramai Nahpoutu tea kulai. 36Alia zhukhaio, ne tamai Elizabeth-a khai louyu thainou nahpoutumai ali pou pfüloure; alia puh hai nah hae toukhaia chuo puhnou poupfüyu khou arouhi koure. 37Daiolouzü Ramaiye donou soulou hoyu alia hae.”

38Alia Meri nou paoe, “Zhukhaio, Esü Mapao vei kilai naotupai baie; nevei chipao thaifüa sünasü Ahi panou paloukhaio.” Süthaisü rakivamai sünasü puh hinou tare.

Meri nou Tave Elizabeth ye Zhuyu

39Alia teile sükisü Meri nou tashuloua deichi hinou buyu Judea vei nuhdu alihi thala-a tare, 40alia puhnou Zekharia kihi tavelouloua Elizabeth ye talou sasa-a khurü loure. 41Alia Elizabeth nou Meri vei khurüyu chidoh nasü choulouyu kisü, puh pou hinou buyu nah nasü hotuotuo loure; alia Elizabeth sü Rako Mashinou lou phouloure 42ea puhnou pai kushoa shapae, “Naotumaitao hrohinou ne sü rako aveipai nasüe, alia nenou pfüa buyu nah nasü rako veie! 43Ana daidonou A Mapao pfünou Ahi taveloua Eye süzhozhou khu-leshi peisa? 44Daiolouzü zhukhaio, nevei khurüyu chidoh sü Enou choulou büyu kisü, Apou hinou buyu nah nasü sahsoua hotuotuowe. 45Alia Mapao nou puh hi paopeiyu nasü vetelai tea louche louyu puh sü rakoveie!”

Meri vei Shoyu Lou

46Alia Meri nou paoe,

“Alenou Mapaoye showe;

47ea Arakonou Ramai, Eye Khailu-apeio hisü asawe,

48daiolouzü puhnou puhvei lelou hoyu kilaipai hisü khu-leshi peire!

Zhukhaio, chu thainou maikha hrülainou

Eyenou rako aveipai tea kulai;

49daiolouzü khou-chihyu puhnou

Eye donou dushoyu vah soupeire,

puh zhih sü Amasheeo na toue.

50Alia puhvei zhuveahai maikha-kha hinou puhye piyu maitaohi bue.

51Puhnou puhvei baosü topaloua khouko pongao peire;

Puhnou puletao tsü lekhe hinou khaophu soua buyu maitaoye souraroure.

52Puhnou khou-chihyu vemaitaoye puletao vei vebuh hinou pokoure,

alia nataiyu taoyenou pokupa peiwure.

53Puhnou hou-züa laiyu maitaoye ha aveinou panou pouphou soupeire,

alia haniyu taoye puhnou bah sakhaia seitare.

54Puhnou Abraham ea puhvei tao-nah khemaitaoye teisanou zhuvea peiyu sü panou licho loure donou,

55Eletao puo-paomai taohi paopeiyu büa,

puhnou puhvei kilai Israelye soukha peire!”

56Meri nou Elizabethye khouh asüpha koa bulouyu thaisü puh kilohi khaitare.

Johan Baptistye Nayu

57Alia chuo Elizabethye donou nare teile veyu kisü, puhnou nahpoutumai ali naloure. 58Südonou puhvei kinapa maitao ea tarai maitao nou Mapao nou puh hi dushoa zhuvea peire touyu sü chouloua puletao nou tave puhye koa sazho loure.

59Alia teithe acha zhou sü puletao nou nah sünaye hee vadere donou tavere; alia puletao nou puh puo zhih thaifüa puhye nou Zekharia tea salai tea bure. 60Ana puh pfünou paoe, “Sübülaimoe! Puh zhihsü Johan tea salai.”

61Puletao nou puh hi paoe, “Ne tarai hrohinou sübüa zhih sayu mailia hae.” 62Süthaisü puletao nou puh puohi bahnou zhangao-a nah süna zhih sü thaohtea sayu züpae tea puh hinou noue.

63Puhnou chuhkhaoli kholoua, “Puh zhih sü Johan toue,” tea rüloure. Alia puletao hrülaisü khupasho loure! 64Sübü hinou puh müsü houpare ea puhvei malisü noutare, alia puhnou Ramaiye shoa chi paopare. 65Südonou kinapa veishi hisü ngaopinou phouloure, alia sübüa palouyu kotao vanou Judea deichi hi buyu teideitao hisü kubou loure. 66Alia ko haina choulouyu mai hrülaisü, “Nah süna hisü dai palaisa?” tea kua puletao lekhe hinou tsü choda khaire. Daiolouzü Mapao vei khoukosü puh pei hi bue.

Zekharia vei Shoyu Lou

67Puhpuo Zekharia sü Rako Mashinou phoupei loure ea haibüa rachi shapare:

68“Israel Ramai, Mapaoye sholo!

Daiolouzü puhnou puhmai taoye tave zhupei-a puletaoye khaipa peire.

69Puhnou puh kilai David khü hinou

Eletaoye donou khou-chihyu Khailu-apeio ali seive peire.

70Dao raikinou puhnou puhvei sheeyu rachi paolamaitao mü vanou paopeiyu büa,

71Süolouzü Eletaoye ngaobamai ea

Eletaoye ngaorayu mai veishi bah hinou khailu peilai touyu;

72Eletao pai-pao maitaohi zhuvea peiyu pongaore donou alia puhvei sheeyu vo nasü li-choloure donou,

73Eletao puo-pao Abraham hi puhnou cha-chou soupeikhai touyu,

74süolouzü Eletaoye Eletao vei ngaobamai bah hinou vupapei-a puh nghojü hinou halia piyu ha-a

75sheeyu ea acheche hinou Eletao vei hrümaisa nou puhye kuvah soure donou,

puh nou chi lüpeire.”

76Alia, “Anahna neye toulouzü Aku Kulai

Ramai vei rachi paolawona tea kulai;

daiolouzü nenou Mapao vei ludusü soudare donou puh nghojünou raia talai.

77Puhvei maitaohi puletao vei mah khaipeiyu hinou khailu louyu sü bue touyu nasü paodou peilai.

78Eletao Ramai khu-leshi vanou,

teizhi hinou buyu ea athai khu hinou buyu maitaoye vapei loure donou,

79alia Eletao phisü kaonayu ludu hilo süthai-sata peire donou,

khailu peiyu vei teinghi avasü raki hinou

Eletao pei hisü koupeilai.”

80Alia nah sünasü pfüphao hiloa dushu loure ea rako hilonoua khou-chihloure; alia puhnou Israel maitaohi tave dua ngaopeimo koutesü puhsü rekounou hrüa bue.

Currently Selected:

LUK 1: POUMBSI

Highlight

Copy