MARK 16

Jisu Hrishuyu

(Mt 28.1-8; Lk 24.1-12; Jn 20.1-10)

1Soteithe talayu thaisü, Magdalini Meri, Jems pfü Meri, alia Solomi nou taloua Jisu pfüphao hi noupeire donou kainü veiyu natao hrüloure. 2Alia Rathozhou shona teinghi payu phahinou, puletaosü khüh hi tare. 3Ludu hinou puletao alinou lihi haibüa paoe, “Thaohnou Eletaoye donou khühmü hinou chuh nasü phaota peilai?” 4Alia puletao nou zhupakhaie chuh nasü phaolaiwu-a ngaoloure (chuh süsü dushoe.) 5Südonou puletao nou khüh hi taloue ea sühinou puletao nou sahkaa bayu khemaina ali bahkha zhoulonou chobuyu ngaoloua puletao hai khupare.

6Alia puhnou puletao hi paoe, “Khupaso; neletao hai kros vanou veatheawuyu Nazareth Jisu ye phoue touyu hai Enou süe. Puhwo haihi hae. Puh hrishu loure! Zhukhaio, haisü puletao nou puhye pokhaiyu buh-e. 7Ana chuo taho puh rozümaitao ea Pitar hi, ‘Puhnou neletao hi paopeiwuyu sübüa puh hai neletao jünou raia Galilee hi tare; sühinou neletao nou puhye ve ngaolai,’ tea paopeio.”

8Alia puletao nou khüh hinou tapaloua tutare; daiolouzü puletaosü pi-nguyu ea khupanou phouloure; alia puletaosü piyu vanou alinou lihi ha chilia paomoe.

Jisu nou Magdalini Meri hi Ve Ngaopeiyu

(Mt 28.9-10; Jn 20.11-18)

9[Chuo Jisu nou athai hinou Rathozhou shohna ki hrishu louyu thaisü, puhnou raikaia raiki puhnou rashi anaiye hulaipa peiyu Magdalini Meri hi tave ngaopeie. 10Puhnou taloua Jisu samai taohi paopeie. Puletao sü dopfüa ea kra-a bue. 11Ana puletao nou puh hai hriwe ea puhnou Jisu ye ngaoe touyu choulouyu kisü, puletao nou puhchi sü louchepei more.

Jisu nou Rozümai Ahai hi Ngaopeiyu

(Lk 24.13-35)

12Haithaisü Jisu nou zhai akuli hinou rozümai ahaihi nuhbuhlo tahoyu ludu hinou ve ngaopeie. 13Puhainou khaiveloua kukhetaoye paongao peie, ana puletao nou süsü louchebae.

Rozümai Kiali hi Jisu nou Ngaopeiyu

(Mt 28.16-20; Lk 24.36-49; Jn 20.19-23; Vah 1.6-8)

14Akhai khailai hinou Jisu nou puh rozümai kialitaonou toua buyu hinou tave ngaopeie. Alia puletao nou louche bayu ea le khouleyu vanou puhnou puletaoye züpeie, daiolouzü puh hrishu louyu ngao-a bumaitaoye puletao nou louche peimoe. 15Puhnou puletao hi paoe, “Deiphao teiteihi taholoua emai hrülaihi ko avei nasü paodou peikhaio. 16Loucheloua dzükhao dalouyu mai talinou khailu loulai; louchelou momai taliye sü mah dukhaiwulai. 17Alia louche louyu maitao hisü shee haitaonou thaifüpoa talai: Azhih hinou puletao nou rashitaoye hupalai; puletao nou la ashu ashu paolai; 18puletao nou nghou kezhu khaia moa poudzü ashi tali poküloukhaia, sütaonou puletaoye halia soushi laimoe; puletao nou sounoumai pei hi bah lakhailai, alia puletao sü veiloulai.”

Jisu ye Raki hi Pokheyu

(Lk 24.50-53; Vah 1.9-11)

19[Südonou Mapao Jisu nou puletaoye koa chi phalouyu thaisü puhye sü rakihi pokhere ea Ramai bahkha zhoulonou buloure. 20Alia rozümaitao nou taloua buh likinou ko paodou tare, alia Mapaowo nou puletaoye koa vahsoue ea puletao nou souyu sheetao nou puletao vei paodouyu hai cheche-e touyu hai lapeie.]

Currently Selected:

MARK 16: POUMBSI

Highlight

Copy