SHURAI 35

Bethel hinou Jakob ye Ramai nou Shiha Peiyu

1Ramai nou Jakob hi paoe, “Ne kushuloua taho Bethel hi hrütawo. Ne jürai Esau hinou ne tutayu phaki, ne hi kouh zhuh ngaopeiyu Ramai ye donou sheelabuh ali sühinou soupeio.”

2Südonou Jakob nou puh kikhamai alia puhye koa bumai hrülai hisü paoe, “Neletao hi buyu vakou maivei bashara teitei polaiwo alia lah neye sousheelo ae sheeyu sabanü banoulo. 3Etao Bethel hisü ho hrüta laire, ae sühinou Enou vea-a buyu phaki alia buh taraliki veyu phaki Eye soukha peiyu Ramai puh hi sheelayu buh ali soulai.” 4Südonou puletao nou vakou maivei bashara taosü ae nouboh taosü Jakob hi peire alia Jakob nou sütaosü Shekem nuh nghiki buyu phüsü phili hi hepao khaire.

5Puletao nou tapayu kisü, nuh sütao haohi buyu mai hrülai hisü ha ngaopiyu ali Ramai nou thoupeie, südonou mailia puletao thai huta more. 6Jakob nou puhvei mai hrülai sa-a Kanaan hi buyu Luz tea kuyu Bethel hisü hote loure. 7Südonou puhnou buh sühisü sheelabuh ali souloue alia süna zhih sü El-bethel (Bethel Ramai) tea sapeie, daiolouzü puhnou puh jürai hinou tutayu phaki buh sühinou Ramai nou puh hi zhuh ngaopeie. 8Rebekah kilaipai Deborah sü buh sühinou thaire alia puhye sü Bethel khekou buyu phüsü phili hinou daovure. Südonou buh sünasü Allon-bakuth (Krayu Phüsü) tea zhih sapeie.

9Jakob nou Mesopotamia hinou dakhai veyu kisü Ramai nou puh hi kouh zhuh ngaoda khaie alia puhye shiha peie. 10Ramai nou puh hi paoe, “Ne zhih hai chu thainou Jakob tea kupu laimoe ana Israel tea kulai.” Südonou Ramai nou puh zhih sü Israel tea sapeie. 11Ramai nou puh hi paoe, “E hai Khoukhoulai Ramaie. Tounah alao hrülo. Tyahrü khemai ne hinou hrüvelai alia neye sü panou vemaitao vei puopaoh soulai. 12Enou Abraham ae Isaak hi peilai tea paokhai touyu teidei nasü ne hi peilai alia shiha nasü netyao nahtao hi peilai.” 13Süthaisü Ramai nou puhye thaowua khaitare. 14Ramai nou puhye chayu buh hisü puhnou chuh ali shokhai loue alia süna pei hisü darkhadzü ae oliv theadzü lanea peie. 15Buh sünasü Bethel tea saloue.

Rachel Thaitayu

16Jakob alia puh kikhamai nou Bethel thaowua tare. Puletao nou Ephrath hi koute loumo jünou Rachel hai nah nare teile sü veloua khea sousho loure. 17Puhnou veashoa nah nakouyu kisü puhye sa-a nah napeiyu painou puh hisü paoe, “Ngaopiso Rachel, nahpoutu ali ngaopu laire.” 18Ana puhsü thailoure ae puhnou thaimo jünou puh nah zhih sü Benoni tea sapeire, ana puh puo nou Benjamin tea sapeie.

19Sükua Rachel sü thaire ae puhye sü Ephrath hi koure ludu, chuo Bethlehem tea kuyu buh hinou poa vupeire. 20Jakob nou sühisü chuh ali shokhai peie, alia sünasü chukoute Rachel vei khüh chuhkho tea süwe. 21Jakob nou takou puloua Eder kipeitaoh thalilo vanou sahpao haoloua bure.

Jakob vei Nahmaitao

22Jakob nou buh sühi hrüa buyu phaki, Reuben nou puh puo khapfü Bilhah ye sazü peire. Jakob nou süsü süloua raroure.

Jakob hai nahpoutu kiahai bue. 23Leah nou napeiyu nahmai taosü Reuben (Jakob nahpoutu tsükhana), Simeon, Levi, Judah, Issakar, ae Zebulun. 24Rachel nou napeiyu nahpoutu ahaisü Josef ae Benjamin. 25Rachel qilapai Bilhah nahpoutu haisü Dan ae Naphtali. 26Leah qilapai Zilpah nahpoutu haisü Gad ae Asher. Nahpoutu haitao hai Mesopotamia hinou naloue.

Isaak nou Thaitayu

27Abraham ae Isaak nou hrüyu Hebron nghiki buyu Mamre hinou Jakob nou puh puo Isaakye tave daoe. 28Isaak nou po kaihlia raicha hrüloue, 29alia puhsü tsükhao khao-a thaitare, alia puh nahpoutu Esau ae Jakob nou puhye poa vupeie.

Currently Selected:

SHURAI 35: POUMBSI

Highlight

Copy