SHURAI 34
34
Dinah ye Sabu-sazü Peiyu
1Jakob ae Leah nahpai Dinah nou teitheli Kanaan maipfüye daolai tea tapae. 2Süphaki Hivmai puona Hamor, buh sühi veo souyuna nahpoutu Shekem nou puhye ngaolou khaie, puhnou süthailoua sazü peire. 3Ana puhnou naotupai sü hüvei shoa ngaoloua leshi loure alia naloulai tea tsücho loure. 4Südonou Shekem nou puh puo Hamor hisü paoe, “Naotupai haina hai aki noupeio.”
5Chuo Jakob nou puh nahpaiye sü mai haina nou mah soupeire touyu süloure; ana puhnah maitao hai rükounou cho khotare, südonou puhnou shamea nahmaitao khaiveyu khoa bue. 6Shekem puo Hamor nou Jakob hi nahpai donou chiphalai tea vere. 7Sükisü Jakob nahmaitao-a dou hinou kihi khaivere. Alia puletao nou ko haina süloukhaie levea shore ae rarou loure, daiolouzü Shekem nou Jakob nahpai hi hashi soupeiyu hai Israel mai hrülai pei hi hao soupeia baie, daiolouzü haibüyu vah hai souyu phamoe.
8Ana Hamor nou puletao hisü paoe, “Anah poutu Shekem sü ne nahpai leshi loure, zhuvea honapaiye sü puhki khaipeio. 9Ahai phaloua naotulou nalo laikhe; Etao nah naotumai-a neleki khaipeilai, ae neletao nah naotu tao-a Eh ki khaipeio. 10Sükulouzü nemai-a Eh nuh hinou koa hrülou veie, ae neletao nou jüpa buh taraki nou bua bailai, lah dosoua shuhra soua kini phoulou veie.”
11Shekem-a Dinah puo ae pou maitao hisü paoe, “Neletao nou Eye zhuvea leshipeio, ae neletao nou jüpa-a khoyu nasü Enou peilai. 12Neletao nou shanghi vei na kazhou kholai, khonü kholo, sütaosü peilai, anou naotupai louzü achapfü soure donou Eye peio.”
13Shekem nou Dinah ye mah soupeiyu donou Jakob ae puhnah maitao nou Shekem ae puh puo Hamor hisü da-a chila peire. 14Puletao nou haibüa chila peie, “Etao tupaiye sü heerode moyu mai ki khaipei loushie, daiolouzü haisü Etao zhai moe. 15Neletao-a Etao büa poutumai hrülai nou heerode louzü ae toupei louveie. 16Sükua soulouzü ahai vei naotulou nalolou veie, alia neletao hinou hrüa nuhmai ali soulou veie. 17Ana neletao nou süsü ae tea heerode lou hore toulouzü naotupaiye sü saloua talaire.”
18Sükua paoyu nasü Hamor ae Shekem puonah nou ae tounüre. 19Alia nahle puona sünou Jakob nahpaiye leshi shoyu thaifüa paoyu taosü soure. Puh hai kikhamai hrülai jünou mainou tsükhou khayu nasüe.
20Südonou Hamor ae puhnah poutu Shekem nou puletao nuhdu robomü hi takouloua puletao hisü paoe, 21“Mai haitao hai Etao hi veishoa baie, puletaoye panou Etao nuh hi hrülo ae dosoua panou talouwo, daiolouzü Etao donou füdei sü alao ka-a bue. Etao-a puletao naotulou polai ae Etao naotulou-a puletaoye peilai. 22Ana puletao hai heerodeyu maie, südonou Etao poutumai hrülai-a heerodere toulouzü, puletao sü Etao koa nuhli hinou hrüzholai touwe. 23Sükure toulouzü puletao vei kikhaorü ae kini khesü Etao vei soulai mowu? Puletao nou paoyu nasü ae toupeia koa hrüzho loubai laikhe.” 24Hamor ae puh nahpoutu Shekem nou paoyu nasü ae touloua sühi vejüyu poutumai hrülai sü heerodere.
25Teithe asü thaisü, puletao vei heerodeyu veiloumoa bukinou, Jakob nahmai ahai, Dinah pou Simeon ae Levi nou khoche poloua talou nuhdu hi hrüyu poutumai hrülaiye sü daothawure. 26Hamor ae puh nahpoutu Shekem-a daothawure alia Dinah ye sü saloua tutare. 27Daothayu thailo Jakob nahmai kukhenou puletao tupaiye soushi peiyu khüphoua talou kina teitei sü poloure. 28Puletao nou kikhaorü, nghitu zhaotu, rheisüh, nuh hi buyu ae dou hi buyu na teitei sü potare. 29Puletao vei kini teitei, napfü naonah hrülai alia ki hi buyu teitei poa tare. 30Süthaisü Jakob nou Simeon ae Levi hisü paoe, “Buh haihi hrüa buyu Kanaan mai, Periz mai ae mai hrülai nou Eye panou ngaoraloua Eye souvea peire do ashi nasü nehai chena nou soupeire. Amaitao sü chita baie, alia puletao nou ve jüloua Eye hulouyu thaio Etao mai hrülai nou thai-a bailai.”
31Ana puhai nou paoe, “Ahai tupaiye sü khakhapfü ali büa panou soukhai laiho?”
Currently Selected:
SHURAI 34: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
