SHURAI 28

1Süthaisü Isaak nou Jakob ye kuloua shiha peie, alia puh hi paoe, “Ne Kanaan maipfüye nakhai toulaimoe. 2Ne Paddan-aram nuh hi nepaoh Bethuel ki hi tawo, alia sühinou ne nepfü pou Laban nah naotumai hrohinou maili nalo. 3Khoukhoulai Ramai panou neye hapei theo, alia ne vanou tounah alao ngaoloua panou tyahrü alao vei puo soulou theo. 4Puhye panou ne pei hi ae ne tyaonah maitao pei hi Abraham vei shiha nasü peitheo, sübüa Ramai nou Abraham hi apaokhai touyu dei haina nevei soulou theo.” 5Sükua Isaak nou Jakob ye seitawure, ae puhnou Paddan-aram hi Jakob ae Esau pfü Rebeka pou Aramean puona Bethuel nahpoutu Laban hi seitare.

Esau nou Chapfü Kukheli Napulouyu

6Chuo Isaak nou Jakob ye shiha peia Paddan-aram hi seiho chapfü phoure donou tare alia Isaak nou puhye shiha peiyu phaki “Kanaan maipfü nasowo” tea Jokob hi paoyu Esau nou süloure. 7Jakob nou pfüpuo chi züa Paddan-aram hi hotare touyu süloure. 8Südonou Esau nou Kanaan maipfü nayu hai puh pfüpuo nou jüpamore touyu süloua, 9Abraham nahpoutu Ishmael hi taho puh nahpai ae Nebaioth tupai Mahalath ye napuloure.

Jakob nou Bethel hinou Memuyu

10Jakob nou Beersheba thaowua Haran hilo tahore. 11Teinghi loutayu thai puhnou buh alihi taho süzhou khei chaore. Puhnou chuhli poloua peikhü souloua zhitare. 12Puhnou zhiho mekou nou kisho ali deiphao hinou raki khete dokhaitoua ae sühisü rakivamai nou takou takhe-a ngaoe. 13Alia süpe hinou Mapao nou lahloua paoe, “E hai Abraham ae Isaak Ramaie. Nenou züa buyu dei haina hai Enou ne hi alia nevei tyaonah taohi peilai. 14Ne tyaonah khesü panou deiphi vonai zhoua panou hrülai alia puletaoye panou hrüpoa teinghi loulo, teinghi palo, reikou ae khekou holai, alia ne ae netyaonah vanou Enou tyahrü hrülaiye shiha peilai.#28.14 ne...tyahrü hrülaiye shiha peilai; moa Enou ne hi ae nevei tyaonah maitao hi shiha peiyu büa tyahrü hrülai nou ahinou shiha peio tea kholai. 15Zhukhaio Enou neye koa salai peilai alia nenou buh tarakia tayuma Enou neye vupeilai, alia neye dei haihi sa-a dakhai ve peilai, daiolouzü Enou ne hi apaokhai touyu teitei sü souche loumosa neye thaolai moe.”

16Süthaisü Jakob nou kaishuloua paoe, “Mapao sü buh haihi bue, ae haisü Enou sülou more.” 17Puhsü ngaopi sholoua haibüa paore, “Buh haina hai sütho lihie! Füdei haina hai Ramai vei ki phae; raki hi khere bomüyu phae.”

18Süthaisü puhnou thainesho shohna kushuloua puhnou peikhü souyu chuh nasü poloua sholah khaire alia Ramai bah hi thaothoua chuh haina pei hisü theadzü lazü peie. 19Buh süna zhih sü “Bethel”#28.19 bethel: Hebrew mai la hinou ko haina hai “Ramai vei ki” touwe. tea saloue, ana raichoki louzü buh süna zhihsü “Luz” tea kuwe. 20Süthaisü Jakob nou chaachou ali Mapao hi soua paoe, “Nenou avei tatou teitei hi koa zhopei louzü, ae Eye vupei louzü alia Eye sabanü ae touso peilouzü, 21alia apuo ki hi kaona-a Eye sa-a dakhai vepeire toulouzü ne sü avei Ramai soulai. 22Enou chuh sholah khaitouyu haina sü neye thoyu buh soulai alia nenou ahi peiyu zha kirou hinou zha ali neye peilai.”

Currently Selected:

SHURAI 28: POUMBSI

Highlight

Copy