SHURAI 27
27
Jakob nou Puh Puo Isaak vei Shiha Polouyu
1Isaak sü chuo tsüloua nghithou ha ngaomo loure. Puhnou puh nahpoutu atsü Esau hisü “Anahna” tea kuyu kisü “Oe, E haihi bue” tea Esau nou khere. 2Isaak nou paoe, “Zhukhaio, Esü tsüre ae duki thailaisa touyu sümoe. 3Südonou nevei basei - voulou ae louthou poloua taho sou hutawo. 4Alia Enou jüpayu sou taoli kholoua pove Eye panou toukhaio, sükua E thaimo kinou neye hapeilai.”
5Sükua Isaak nou Esau hi paoyu chi sü Rebeka nou chouloure. Chuo Esau nou sou hulai tea tayu thai, 6Rebeka nou Jakob hisü paoe, “Ne puo nou ne jürai Esau hi paoyu chi sü Enou choure, 7‘Taho sou züloua pove kholoua Eye panou toukhaio, sükua E thaimo kinou neye Mapao nghoujü nou hapeilai.’ 8Südonou chuo anahna Enou paoyu chi zülo. 9Nghitu khome hinou hüveiyu nghitu ahai ahi pove peio, Enou süna haisü kholoua ne puo nou züpayu khaovu soupeilai. 10Sükua puhnou thaimo jünou neye panou hapeire donou sünasü ne puo hi polou peia panou touloulai.”
11Ana Jakob nou puhpfü Rebeka hi paoe, “Ajürai Esau sü maipfüwe alia Esü maipfümoe. 12Apuo nou Eye kou deilouzü, Enou puhye lawe tea süloua puhvei shiha ngaoloumoa ahi chaa ashi povelou bailai.”
13Pfünou puh hi paoe, “Ne pei hi vere chaa teitei sü panou apei hi vetheo, achi züloua nghitu ahai sü ahi pove peio.” 14Südonou puhnou nghitu ahai sü puh pfü hi pove peie, alia puh pfü nou sou nasü puh puo Isaak nou jüpayu tya hinou kholoure. 15Süthaisü Rebeka nou puh hi pokhai touyu Esau vei sabanü nasü poa Jakob ye banou peire, 16alia nghitu mainou poa Rebeka nou Jakob baohi ae tehi züpeire. 17Süthaisü puhnou khokhai touyu khaovu ae raokhao chita tea poa puh nah Jakob bah hi thoupeie.
18Süthaisü Jakob nou puh puo hi talouloua “Apuo” tea lare. Puonou “Anahna E haihi bue, ne thaoe” tea noure.
19Jakob nou puo hisü, “E ne nahpoutu tsüna Esau-e. Nenou paoyu thaifüa Enou soupoa laire. Tashu buloua sou khaovu nasü toulo, alia Eye sü hapeio.”
20Ana Isaak nou puh nahpoutu hisü, “Anahna, ne kabüa thashoa ngaolou khaie” toure. Jakob nou chila peie, “Daiolouzü nevei Mapao Ramai nou Eye soukha peiyu vanou ngaoloue.”
21Süthaisü Isaak nou Jakob hi paoe, “Anahna, ahi takou khaio, ne cheche vuzünou anah poutu Esau ho Esau mosa touyu Enou deia zhulai.” 22Südonou Jakob nou puh puo hi takou peie, alia puo nou bah thaipa deiloua haibüa paoe, “Paisü Jakob paie, ana baosü Esau bao-e.” 23Puh baosü Esau bao khihao-a maipfüyu donou Isaak nou sükulou hore, südonou puhnou hapei laire tea chore. 24Ana puhnou “Ne Esau vuzüwu?” tea nouda khaire. Jakob nou “Ovai, E Esau-e” toure.
25Süthaisü Isaak nou paoe, “Nevei resou khaovu nasü pokou peikhaio, E süsü touloua anahye sü hapei laire.” Jakob nou pokou peia panou touloure alia puhnou darkhadzüa pokou pei sholoure. 26Süthaisü puh puo Isaak nou puh hi paoe, “Anahna, ahi taikou Eye mümu peikhaio.” 27Süthaisü puhnou taikou nghiloua puh puoye mümu peie alia Isaak nou puhvei sabanü kaih hüloua puhye haibüa hapeie,
“Zhukhaio, anah vei kaih hai Mapao nou shiha peiyu dou hi kaih khihaore,
28Ramai ye panou neye raki vanou vidzü sü seikou peitheo,
neye panou tava daoloua chamou veia chilou theo.
29Maiye panou ne kuvah soulai,
ae tyahrü khemai nou neye khurülai,
neye panou ne thaihou jürai maitaoye tukha sa-a hrülai,
nepfü tyaonah taoye panou neye nakou khurü theo.
Neye chaa peiyu maisü chaa pfütheo,
ae neye shiha peiyu mai hrülai sü panou shiha ngaotheo.”
Esau nou Puh Puo Isaak vei Shiha Khoyu
30Isaak nou Jakob hi puhvei shiha peiche-a Jakob nou puh puo hinou tapabü khaie, puh jürai Esau sü sou züloua khaivere. 31Puh-a touvei shoyu khaovu sü kholoua puh puo hi poloure. Puhnou puo hi paoe, “Apuo, kushu buh souloua Enou zülouyu resou khaovu nasü touloua Eye shiha peio.”
32“Ne thaoe?” tea Isaak nou noure. “E ne nahpoutu tsüna Esau-e” tea puhnou chila peie.
33Süthaisü Isaak hai raroushoa ngure ae puhnou noue, “Mai linou rüsou kholoua pove ahi peiyu nasü thaokhai-a? Enou puhvei khaovu touloua puh hisü shiha peire taosü peichewure, ae sünasü puhvei soulaide.”
34Esau nou chipao süna hai choulou khaie, levea-a kraho holoua puh puo hisü, “Nevei shiha E-a peikhaio, Apuo!” tea khore.
35Ana puo nou paoe, “Ne thaihou nou ahinou ve laloua nevei shiha taosü potare.”
36Esau nou paoe, “Puh zhih sü Jakob tea sayu hai sazümowu? Daiolouzü puhnou Eye avu ahai laloure. Puhnou avei tsüzha poloure alia chua avei shiha sü pota khaire. Apuo! ne Eye donou shiha peire halia khaidalou movu?”
37Isaak nou chila peie, “Enou puhye panou ne pei hi paopu soua hrüre donou puh hi peiwure, alia puhvei kityarai mai hrülai-a puh kuvah soure donou puh hi peiwure. Puhye thoudzü teitei-a Enou peiwure. Anahna, chuo Enou neye daie peilaige?”
38Esau nou puo hi khopue, “Apuo! nevei shiha alikhi baiwu? E-a hapeio” tea Esau nou kra-a khoe.
39Süthaisü Isaak nou puh nahpoutu hisü paoe,
“Dei aveih dao-a hrüre sü neye donou more,
ae rakinou dzü sü neye donou kouyu hare.
40Nevei khoche vanou ne tou-a hrülai,
ana nenou ne thaihou kilai soulai.
Anou puh hi nenou reih soulouzü nenou puh khakhe hinou tupa loulai.”
41Puh puo nou Jakob ye shiha peiyu vanou Esau nou puhye ngaora loure. Puhnou haibüa tsücho loure: “Apuo thai-a dopfü laiyu teile sü nghikoure, süteile hinou Enou Jakob ye southalai.”
42Ana Esau nou choa buyu tsü nasü Rebeka nou süloua Jakob ye kusave paoe, “Zhukhaio, ne jürai Esau sü neye southalai donou tsücholoua bubaire. 43Südonou Anahna, ne achi zülo, ne apou Laban hi tuho tawo. 44Ne jürai nou lekha khaimo koute, 45alia nenou puh hi soukhai touyu nahai ne jürai nou ngaimo koute, ne buh sühinou buwo. Haithai nakinou Enou mai seiho neye saloulai. Daidonou Esü teithe ali hinou anah poutu ahai khinou panou hakhailai.”
Isaak nou Jakob ye Laban hi Seihoyu
46Rebeka nou Isaak hisü paoe, “Esau nou Hit maipfüye nayu vanou E hrüvea shore. Jakob-a Hit maipfü nalou khaiyu thaio, E hria buyu daiveiyu bue?”
Currently Selected:
SHURAI 27: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
