SHURAI 26

Isaak nou Gerer hi Ve Hrüyu

1Daoh Abraham phaohi tokaa veyu themoa zhaovua teidei sünahi sü tokaayu sü vere. Südonou Isaak nou Gerer hi buyu Philistin mai veo Abimelek hi tahoe. 2Mapao nou Isaak hi paoe, “Ejipt hi taso, Enou neye peilaiyu teidei hisü bubaio. 3Haihi bubaio alia Enou neye salai peilai ae neye hapeilai. Dei haitao teitei hai ne hi ae nevei tyaonah taohi peilai. Nepuo Abraham hi Enou apaokhai touyu nasü Enou souche peilai. 4Ne tyaonahtao hai teihi vuh zhoua Enou peilai ae sümaitao hisü teidei hai teitei nou peikhai toulai alia nevei tyaonahtao vanou deiphao tyahrü hrülai nou ahinou shiha peio tea kholai. 5Enou neye shiha peilai, daiolouzü akilai Abraham nou achi züa, avei kharochi ae razhaitao teitei nou thaifü cheloue.”

6Südonou Isaak nou Gerer hi hrüre. 7Buh sühi hrüyu mainou puh chapfü ye nouyu phaki, puh nou “Puh hai atupai baie” tea paoe, daiolouzü puhnou “Puh hai achapfüe” tea paolouzü puh chapfü Rebeka sü hüvei shoyu naotumai aliyu donou buh sühi mainou puhye southa shulai tea puhnou ngaopi loure. 8Isaak nou buh sühi hrüa buyu phaki, teitheli Isaak nou Rebekaye koa buyu Philistin mai veo Abimelek nou puhvei ki vabomü hinou zhikou ngaoloure. 9Südonou Abimelek nou Isaakye kuloua paoe, “Honapai hai ne chapfüe! Ne daisou nou puhsü ne tupai baie tea paowe?”

Isaak nou puh hi chila peie, “Honapai hai achapfüe tea paolouzü, haihi hrüa buyu mainou Eye southa shulai tea Enou choloua paore.”

10Abimelek nou paoe, “Nenou haibüa Etao hi souyu hai daige? Haisü avei mai tarali noua ne chapfüye sazü sabu peilou vei-e, ae sükulouzü nenou Etao pei hi mah southou peimowu?”

11Süthaisü Abimelek nou mai hrülaiye kharochi peia paoe, “Mai taralia mai haina ae puh chapfüe deire toulouzü mai sünasü southawulai.”

12Isaak nou dei sünahi thoutai vuthou loue alia po sünahi Mapao nou hapeia puhnou vuthouyu jünou zha kaihli pua chiloue. 13Puhnou sükua shoshonou thoudzü ngaopu paloua kini nisholoure. 14Puhnou kikhaorü ae kilai mai alao buyu vanou Philistin mainou puhye ngaorai paloure. 15Sükua puh puo Abraham hria bukinou puh kilai mainou hekhai touyu dzükhao teitei sü nainou süpao peiwure.

16Süthaisü Abimelek nou Isaak hi paoe, “Ne Etao teidei hinou tabaio, daiolouzü nenou Etao jünou khousho loure.” 17Süvanou Isaak nou buh süna thaowua taho Gerer deikho hinou butare. 18Puh puo Abraham teile hinou hekhai touyu dzükhao taosü puhnou hepuloue, daiolouzü puh puo thaitayu thai Philistin mainou dzükhao sütao sü hepao khaitoure, alia puh puo nou zhih sapeiyu zhih nou sadakhai peie.

19Isaak kilai mainou dzükhao kukheli deikho hinou hepa dzü ngaoloue. 20Gerer hi zhaokho mainou Isaak vei zhaokho maiye züva-a paoe, “Dzü hai Evei baie tea khaloure.” Südonou dzükhao süna zhih sü Isaak nou “Esek” (Züvayu dzükhao) tea sapeie.

21Süthaia Isaak kilai mainou dzükhao kukheli hepu khaie, ae dzükhao süna hia puletao nou züvalou khaire. Südonou puhnou dzükhao süna zhih sü “Sitnah” (Sha dzükhao) tea sapeie. 22Puhnou buh süna thaowua tala pokou dzükhao kukheli hepuloue, ae dzükhao süna hiolouzü puletao nou züva more. Südonou dzükhao süna zhih sü “Rehoboth” (Dosou louyu) tea sapeie, alia puhnou paoe, “Chuo buh haina hi Mapao nou Etaoye panou dosoua hrüloure hai peire, Etao buh hai hinou sava-a hrülou süre.”

23Süthaisü Isaak nou buh sühinou Beersheba hi ho hrütae. 24Süzhou khei Mapao nou puh hi ve paoe, “E nepuo Abraham Ramaie, ngaopiso, daiolouzü Enou neye salai peilai, alia akilai Abraham vanou neye shiha peilai ae netyaonah khesü panou tyakahlai.” 25Südonou Isaak nou posheelabu ali sühinou soupaloua ratholoue alia buh sühinou puhnou sahpao haoloua bure. Isaak kilai mainou buh sühia dzükhao ali heloue.

Isaak ae Abimelek nou Ae-ao Soulouyu

26Süthaisü Abimelek nou Gerer hinou puhvei paodou-apeio Ahuzza ae puhvei reihmai peikho Phikol koa Isaak hi ve-e. 27Isaak nou puletao hi paoe, “Neletao Eye ngaoba-a hulai khaitoua daisounou chu ahi vewe?”

28Puletao nou chila peie, “Mapao nou neye koa salai peiwe touyu Etao nou sheesha-a süloure, südonou Eletao kohi chaachou ali souloua koa ae-ao ali soulou laishe. 29Süolouzü Etao nou ne hi hashi soumoe ae neye kaonayu hinou seita peiyu büa ne-a Etao hi hashi soumore donou ahai kohi vo ali souloulai khe. Ne sü chuo Mapao hinou shiha ngaolouyu mai alire.” 30Isaak nou touso kholoua puletaoye sü vaih peie. 31Thainaisho shona kushuloua puletao nou koa chaachou souloue, alia Isaak nou puletaoye sü paota peire.

32Süzhou teithe Isaak kilai mainou heyu dzükhao nasü dzü bua ngaoloure tea Isaak hi ve paoe. 33Puhnou dzükhao süna zhih sü “Shibah” (Vo dzükhao) tea sapeie, südonou nuhdu süna zhih sü Beersheba tea kuwe.

Esau nou Vakou Maipfü Nayu

34Esau nou po raidai payu phaki Hit maipfü ahai, süolouzü Beeri nahpai Judith alia Elon nahpai Basemath ye naloue. 35Puh chapfü ahai nou Isaak ae Rebeka ye souvea shopeie.

Currently Selected:

SHURAI 26: POUMBSI

Highlight

Copy