SHURAI 29

Jakob nou Laban Ki hi Veyu

1Süthaisü Jakob nou puhvei veidu nasü tapoa teinghi palo mai deihi hore. 2Puhnou tapoa kouyu phaki, dou pe hinou dzükhao ali bua süna nghiki sü zhaokhome asü buyu puhnou zhingaoe. Dzükhao süna hinou zhaotuye dzü peiwe alia süna mü hisü chuh duli nou hokhai toue. 3Zhaokhome teitei vejü louyu thainou, zhaokho mainou chuh nasü dzükhao mü hinou houpeia panou zhaotu khesü dzü kelouwe, sükua kelou cheyu thaisü chuh nasü podakhai thou mü hokhai baiwe.

4Jakob nou zhaokho maitao hi noue, “Samai taore, neletao daiki nou vewe?” Puletao nou “Haran hinou ve-e” tea chila peie. 5Puhnou puletao hisü “Neletao Nahor nahpoutu Laban ye sühomoe?” tea noue. Puletao nou “Süwe” tea chila peie.

6Puhnou puletao hisü paoe, “Puhsü vei-a buho moge?” alia puletao nou “Vei-a bue, alia zhukhaio puh nahpai Rachel-a zhaotu hupoa laire” tea paoe.

7Jakob nou paoe, “Chusü hea baihie, zhaotu taoye hupoa ve hi thouyu teile mohie, panou dzü keloua pou tourao.”

8Ana puletao nou paoe, “Zhaokhome teitei nou haihi vejülou mojü ae chuh nasü houpalou mojü soulou shie, sübüyu thainou zhaotu khesü panou dzü kelai.”

9Jakob nou chipao-a bukinou Rachel sü puh puo vei zhaokhome hupoa dzükhao hisü koure. 10Jakob nou puh pfü pou Laban nahpai Rachel ae puh pfü pou Laban vei zhaokhome ngaolou khaie, puhnou takou dzükhao mü hi khakhai touyu chuh nasü houpawua puh pfüpou Laban vei zhaotu khesü panou dzü keloure. 11Süthaisü Jakob nou Rachel ye münou teiloua shusoua krare. 12Puhnou Rachel hisü “E nepuo kikha maie, Rebeka nahpoutu” tea paopeie. Alia sühinou Rachel nou tuve puh puo hi paopeie. 13Laban nou puh tupai nahpoutu Jakob ko sü süloukhaie, puhnou tuho puhye daolai tea tare, puhye ve kholoua münou teiloua puh ki hi save loure. Jakob nou vepayu ko veishi Laban hi paongao peie. 14Laban nou puh hi paoe, “Ovai, cheche vuzüa ne sü avei kezhe ali baie.” Jakob nou sühi khouh ali bue.

Jakob nou Rachel ae Leah Naloure donou Laban Vah Souyu

15Süthaisü Laban nou Jakob hi paoe, “Ne akityarai mailie teanou hamako nou avah soupeilou hoe. Paokhaio ne zho kazhou polai?” 16Laban hai nahnaotu ahai bue, atsüpai nou Leah ae nahnapai nou Rachel tea kuwe. 17Leah nghithou hai nghirei-e,#29.17 nghirei-e; moa vei moe. ana Rachel nou zhurao-a vei-e ae hüa hüveisho-e.

18Jakob nou Rachelye leshie, südonou puhnou paoe, “Eye panou Rachelye nalai toulouzü ne vah po anai soupeilai.”

19Laban nou chila peie, “Mai kukheli ki khaipeiyu jüo ne hi peiyu-a veipu hie; Ahi koa buwo.” 20Südonou Jakob nou Rachelye naloure donou po anai vah souwe, ae süsü puhye donou teile jüta büa baie, daiolouzü puhnou honapaiye leshie.

21Süthaisü Jakob nou Laban hi paoe, “Teile sü chuo chere, ne nahpaiye sü ahi peio.” 22Südonou Laban nou mai hrülaiye kuloua tovai ali vaipeie. 23Ana süzhou kheisü Laban nou puh nahpai Rachel thao Leahye nou saloua Jakob ye pei baire, ae Jakob nou Leah sü puh chapfü soua poloure. 24(Laban nou puh qilapai Zilpah hai puh nahpai Leah hi panou puh vah soukhare donou peie.) 25Thainesho shohna sü Jakob nou Leah baire touyu süloua Laban hi tave paoe, “Ne daisou haibüa ahi souwe? Rachelye nare donou E nevah soumowu? Ne daisou nou Eye lawe?”

26Laban nou chila peie, “E nuh haihi vei zhai nou anapai nou tsüpai jünou nghita raiyu zhaimoe. 27Zhouvu shanghi souyu vei nüh haina hapta panou cheraio, süthaisü nenou pudakhai po anai avah soupeilai toulouzü Rachel-a neye peilai.”

28Jakob nou süsü aetoure, alia shinghiyu nüh nüche loukhaie, Laban nou puh nahpai Rachel-a puh chapfü soure donou puh hi peiwure. 29Laban nou puh qilapai Bilha hai puh nahpai Rachel hi peie. 30Südonou Jakob nou Rachel-a puh chapfü soua poloure, alia puhnou Leah jünou Rachelye leshipu hie. Süthaisü puhnou po anai dakhai Laban vah soue.

Jakob Nahmaitao

31Leahye leshi peimore touyu Ramai nou ngaoloua Leah panou nahmai hrüloue, ana Rachelye sü panou nahapfü soure. 32Leah nou nahmai hrüloua nahpoutu ali naloue, alia puh zhih sü Reuben#29.32 reuben: Zhih haina hai Hebrew maila hinou “nahpoutu ngaolouyu” moa “avei vea sü ngaoloure” tea paolou vei-e. tea saloue, daiolouzü honapai nou paoe, “Mapao nou avei veayu sü zhupeie, chuo akhapu nou Eye leshi peishulai.” 33Leah nou nahmai hrüda khailoua nahpoutu ali naloue. Puhnou paoe, “Eye leshi peimoe touyu Mapao nou ngaoloua nahpoutu haina-a puhnou Eye peie.” Südonou puh zhih sü Simeon tea saloue. 34Pua dakhai Leah nou nahmai hrüloua nahpoutu ali naloue. Puhnou paoe, “Chuo achimai nou ahi nghipu shulai, daiolouzü Enou puhye nahpoutu asü napeire.” Südonou puh zhih sü Levi tea sapeie. 35Haithai-a dakhai nah hrüloua nahpoutuli naloue. Puhnou paoe, “Zhouvuo Enou Ramai ye paosholai.” Südonou honapai nou puh zhih sü Judah tea sapeie. Süthaisü honapai nou nahmai napu more.

Currently Selected:

SHURAI 29: POUMBSI

Highlight

Copy