SEI-ATAMAI VAHTAO 8

1Alia Saul-a puhye southeayu sü aetouwe.

Saul nou Churchye Souveayu

Alia teithe süzhounou Jerusalem hi buyu lüloumai me pei hi sü souveasho tare. Alia sei-atamaitao deinou kukhe lüloumaitao hrülaiwo turaroupoa Judea ea Samaria teidei hi vetare. 2Alia leishoa rathoyumai kamainou Stephanye donou do-a krasholoua puhye sü povure.

3Ana Saul nou kili ki talouloua lüloumai naotu poutu taoye vakou daopaloua puletaoye hukhahi pove thoupeie ea sübüa lüloumaime taoye souhare donou teloure.

Samaria hinou Ko Avei paodouyu

4Südonou poraroupoa tayu lüloumai taosünou buh liki taveloua ko avei nasü paodou tare. 5Sükisü Philip nou Samaria levai nuhdu alihi takouloua sühi buyu maikhemai taohi Khrista ko paodoupeie. 6Alia maisou khemainou Philip chi chouloua ea puhnou souyu sheetao sü ngaoloua puhnou paoyu hisü puletao hrülainou alikhei soua le peisho loure. 7Daiolouzü sheemoyu rakonou louyu maitaoli hinou sütao sü shusou raoloua tapare; alia pothaimai ea phi chamai taoli veiloure. 8Südonou nuhdu sühisü alaosou sasho loure.

Khupa-kheido Souwo Simon

9Ana nuhdu sühisü raichoki khupa-kheido soua Samaria tamai hrülaiye souposhu khupa peiwu-a lah puhye nou adu-shomai alie tea pao-a laiyu Simon tea kuyu mai ali bue. 10Puh hisü puletao süolouzü tai-du hrülainou le peishoa, “Mai haina hai ‘Khouko aduna’ tea kuyu Ramai vei khouko sünasüe” tea paoe. 11Puhnou puhvei khupa-kheido sünanou puletaoye teile soshoa khu soupa peiyu donou puletao nou puh hisü le peisho loure. 12Ana Philip nou Ramai vedei vei ea Jisu Khrista vei zhih vanou ko avei paodouyu sü puletao nou louche louyu kisü, puletao naotu poutu hrülainou dzükhao daloure. 13Sükisü Simon puh-a loucheloua dzükhao daloure ea Philipye koa tobai soumoa buloure, alia shee tyali ea khupa vah duli souyu sü ngaoloua puhsü khupasho loure.

14Chuo Jerusalem hi buyu sei-atamai taonou Samaria tamai-a Ramai chipao ngaoloure touyu sü choulouyu kisü puletao nou Pitar ea Johanye puletao hi seive. 15Puhainou tave loulouyu kisü puletaoye panou Rako Mashi ngaoloure donou puhai nou veachi paopeie. 16Daiolouzü sükisü puletao maitali pei hia Rako Mashi koulou mohie, ana puletao sü Mapao Jisu zhih hinou likhei dzükhao dalou baihie. 17Sükisü Pitar ea Johan nou puhai bahsü polashu puletao pei hi khaipeie ea puletaosü Rako Mashi ngaoloure.

18Alia sei-atamaitao bah pokhai peiyu hinou Rako Mashi sü peie touyu sü Simon nou ngaolouyu kisü, puhnou Pitar ea Johan hi poushanou popeia paoe, 19“Enou maitali pei hi Abah pokhai peilouzü puhnou Rako Mashi ngaoloure donou khouko hainasü Ahia peikhaio.”

20Ana Pitar nou puh hi chila peie, “Nevei pousha nasü neye koa hatheo, daiolouzü nenou Ramai vei sa-apeina hai poushanou hrülousüe tea chowe. 21Vah haina hisü nevei zha moa nenou ngaolou züyu hatalia hae, daiolouzü ne lesü Ramai nghojünou zümoe. 22Südonou nevei do ashi haina hinou ledalo, alia soulouvei louzü nele hinou choyu nasü khaipeire donou Mapao hinou khokhaio. 23Daiolouzü newo ngaorai shoyu nanou phoupfüe alia mah hukha hinou bue touyu sü Enou ngaoe.”

24Simon nou puhai hi chila peie, “Nehainou paoyutao hatalia panou Apei hi vemore donou Mapao hinou veachi paopeio.”

25Alia puhai nou Mapao vei chipao sü zhopaoh souloua ea maikhemai hi paodou peiwu-a Samaria tamai nuh taoli hi ko avei paodoupo-a Jerusalem hi dakhai vere.

Philip ea Ethiopia tamai Vahdu Maina

26Ana Mapao vei rakivamai alinou Philip hi paoe, “Shulouwo ea khekou takouloua Jerusalem hinou Gaza hi takouyu ludu hisü tahokhaio.” (Süsü radeikeelo ludue.) 27Südonou Philip nou shuloua tare. Alia zhukhaio, Ethiopia tamai Veopai Kandaki vei kini teitei pei hi khoyu kuvah peichawo vasou datayu Ethiopia Vahbu maina sü Jerusalem hi rathore donou vewu-a, 28puhsü kilo khaita-a puhvei rhei luki phaonou chobua Isaiah rachi paolawo vei larübvü phoua bue. 29Sükisü Rakonou Philip hi paoe, “Ngheiki takouloua rhei luki hisü talou koa bulo.” 30Südonou Philip nou puh hi takouloua puhnou Isaiah rachi paolawo vei larübvü phoua buyu sü chouloua puh hi noue, “Nenou phoua buyu sü süwu?”

31Puhnou chila peie, “Haihai kukhemai linou Ahi paodou peimo louzü Enou kakua süloulai?” Alia puhnou Philip ye nou luki hi tapaloua puhye lou koa buzhore donou kue. 32Alia puhnou phoua buyu sheeyu larübvü buh süsü hainae:

“Zhaotu dathea mai hi zhaotuye saveyu kua puhye sü save,

moa zhaotumai bimai nghojü hi zhao toutunou ra moyu kua puh-a puhmü khapamoe.

33Puhvei tainouyu hinou, puhzü nasü potare.

Puh tao-nahmaitao vanou thaohnou paolousüe?

Daiolouzü puhvei hrümai sü deiphao nou potare.”

34Vasou datamai sünanou Philip hi noue, “Enou nehi khowe, rachi paolawonou haina hai thaoh vanou paowe; lah puh vanou ho, mai kukhe ali vanou paowe?” 35Sükisü Philip nou sheeyu larübvü buh haina hinou paoshuloua puh hisü Jisu ko avei sü paongao peie. 36Alia puhai nou sükua ludu hinou takoua buyu hinou puhaisü dzü buyu buh alihi tave louloure, alia vasou datamai sünanou paoe, “Zhukhaio, haihi dzü bure! Eye dzükhao dapeire hinou khuyu dai bue?” 37Philip nou paoe, “Nenou nele teiteinou louche louzü, nenou dzükhao dalou-a bailai.” Alia puhnou chila peie, “Jisu Khrista hai Ramai Nahpoutue touyu sü Enou louche.”

38Alia puhnou rhei luki nasü nuchaowu-a Philip puhai sü dzühi taloure, alia Philip nou puhye sü dzükhao dapeire. 39Alia puhai nou dzü hinou tapalouyu kisü Mapao vei Rakonou Philipye sükhaimoa sapoa tare; alia vasou datamai sünanou puhye sü ngaopukhai more, ana puh sü sashoa puh ludu hilo tare. 40Ana Philipye sü Azota hinou bua ve ngaolou khaire, alia puhnou Kaisaria hi veloumo koute sü nuhdu liki hi tapoa puhnou ko avei sü paodoue.

Currently Selected:

SEI-ATAMAI VAHTAO 8: POUMBSI

Highlight

Copy