SEI-ATAMAI VAHTAO 9

Saul nou Ledalouyu

(Vah 22.6-16; 26.12-18)

1Ana chu koutea Saul nou Mapaowo rozümaitaoye soupire ea southeare le pfüa napao peichana hi tare, 2alia Mapao vei Ludu hinou ta-a buyu naotumai-a poutumai-a ngaodaomai taye niloua sütaoye sü puhye panou Jerusalem hi saveloure donou Damaska hi buyu rathobuh taohi peire kharochi seiko peio tea puh hinou tave khoe.

3Alia chuo Saul nou tapoa Damaska nuhdu ngheiki kouyu kisü, sükhaimoa raki hinou ava linou kouloua puh thai-jü hisü varu loure. 4Sükisü puhsü deiphi hi dukoure ea pai alinou puh hisü, “Saul, Saul, ne daidonou Eye souveawe?” tea paoyu sü choue.

5Alia puhnou noue, “Mapao, ne thaohwe?”

Puhnou chila peie, “Ewo nenou souvea-a buyuna Jisue; 6ana shuloua nuhdu hisü taloukhaio, alia nenou soure sü daie touyu sü nehi paongao peilai.”

7Puhye koa vei-a laiyu maitao nou pai nasü choue, ana maili-a ngaomoyu donou paikhai moa la-a bue. 8Saul nou deiphinou lashuloua puh nghithou hepayu kisü halia ngaokhai more. Südonou puletao nou puhye baokao süthailoua Damaska hi sa-a loure. 9Alia teithe asü puhsü nghithou ngaokhaimoa ea tousho khaimoa bue.

Anania nou Saul nghithou souvei peiyu

10Chuo Damaska hisü Anania tea kuyu rozümai ali bue. Alia Mapao nou puh hisü zho hinou paoe, “Anania!”

Puhnou chila peie, “Mapao E haihi bue.”

11Mapao nou puh hi paoe, “Shulo ea tapoa ‘Zütouyu’ tea kuyu duva hisü taveloua Tarsa hi mai Saul tea kuyu mai sünaye Judas ki hinou ve phoukhaio, daiolouzü zhukhaio, puhsü veachi pao-a bue, 12alia puhvei zhokounou Anania tea kuyu mai alinou taveloua puh nghithou sü panou ngaodakhai loure donou puh bahsü puh pei hi khaipeiyu sü puhnou ngaoe.”

13Ana Anania nou chila peie, “Mapao, mai hainanou, Jerusalem hinou nevei sheeyu maitao hi hashi daizhozhou soupeie touyu ko sü Enou mai taoli hinou chouloure; 14alia nezhih hinou kua buyu mai hrülaiye niloure donou puhnou napao adumaitao hinou soulouvei khouko sü ngaoloua buh haihi ve-e.”

15Ana Mapao nou puh hi paoe, “Tawo, daiolouzü tahrüh kukhe hi, vemai taohi, ea Israel maitao nghojü hi Azhih pove peire donou puh hai Enou dopakhai touyu Avei bahsei alie. 16Daiolouzü Azhihye donou puhnou daizhozhou koute vea vuzülaisa touyu sü Enou puh hi ngaopeilai.”

17Südonou Anania nou taloua ki sühi sü talou loure. Alia puh bahsü Saul peiva hi pokhailoua paoe, “Athaihou jürai Saul, nenou taveyu ludu hinou neye ngaopeiyu Mapao Jisu nou neye panou nghithou ngaodakhai loure ea Rako Mashinou phouloure donou Eye seivewe.” 18Alia sübü hinou khah kao kuyu hali sü puh nghithou hinou dekoure ea puh nghi sü ngaodalou khaire. Süthaisü puhnou shuloua dzükhao daloure, 19alia hatou louyu thaisü puhsü tsüloure.

Saul nou Damaska hinou Ko Paodouyu

Süthaisü Saul nou rozümaitaoye koa Damaska hinou teithe taoli bue. 20Alia thala-a puhnou rathobuhtao hinou, “Jisu hai Ramai Nahpoutue,” tea ko paodoue.

21Alia puh chi choua buyu maikhemai hrülainou khupaloua paoe, “Jerusalem hinou zhih hainaye kua buyu maitaoye southeayu mainasü haina mowu? Alia puhnou buh haihi veyu hai mai sütaoye niloua napao adumai taohi pove peire donou vebai mowu?”

22Ana Saul vei paodouyu sü khoupu lailai loua Jisu hai Khrista vuzüe tea soutaosou zhopaoh peiloua Damaska hi buyu Jihudimai taosü puh hi ha chila lia peire hare.

23Teithe taoli talayu thaisü, Jihudimai taonou tave dzüloua puhye southeare do phouloure, 24ana puletao do nasü Saul nou süloure. Puhye southeare donou puletao nou khei-hea nuhdu romütao hinou khoa puhye dah-a bue. 25Ana puh thaifümai taonou puhye sü kheinou sataloua ro alihi thouloua bouvou peinou phakou peire.

Saul nou Jerusalem hinou Ko Paodouyu

26Alia Saul nou Jerusalem hi velou louyu kisü, puhnou rozümai taoye koa buzhore donou teshoe, ana puletao hrülainou puhye sü ngaopi loure, daiolouzü puh hai rozümai alie touyu sü puletao nou louche peimoe. 27Ana Barnabas nou puhye saloua sei-atamai taohi savepeie, alia Saul nou kakua puh veihdu hinou Mapaoye ngaoe ea Mapao nou puh hi kabüa chi paoe, alia kabüa puhnou Damaska hinou khuveia Jisu zhih hinou ko paodoue touyu sü puhnou puletao hi soutaosoua paongao peie. 28Südonou Saul nou, puletaoye koa bua Jerusalem hinou takou takhe-a Mapao zhih hinou khuvei-a ko paodoua bue. 29Alia puhnou Greek tamai la souyu Jihudimai taoye koa chi pha-a ea chi veiva-a bue; ana puletao nou puhye southeare donou phoua bue. 30Lüloumai taonou süsü sülouyu kisü, puletao nou puhye sü Kaisaria hi sakouloua Tarsa hi seitawure.

31Südonou Judea, Galilee ea Samaria hi buyu lüloumaime teitei sü soutsü puloua kaonayu teile ngaoloue; alia Mapaoye khuhaoyu hinou ta-a ea Rako Mashinou souva sousa pei-a lüloumaime sü pupaloure.

Pitar nou Luda ea Jopa hinou Vah Souyu

32Alia chuo Pitar nou teidei holo hailo sühaopoa tayu hinou vuhli sü puhnou Luda hinou hrüa buyu sheeyu maitaoye tave daoe. 33Alia buh sühinou Inia tea kuyu, po acha koute züh hinou zü vuzüa buyu pothaimai aliye puhnou tave ngaoloure. 34Alia Pitar nou puh hi paoe, “Inia, Jisu Khrista nou neye souvei peiwe; shuloua ne zühsü soulo.” Alia thalasoua puhsü shuloure. 35Alia Luda ea Sharon hinou hrüa buyu khemai hrülainou puhye sü ngaoloua Mapaowo hilo veloure.

36Alia Jopa hisü Tabitha tea kuyu rozümai pfü ali bue (puh zhih hai Greekmai la hinou Dorka toue), naotu hainapai sü teisanou vah avei soua ea toure hamaiye soukha-a hrüe. 37Alia sükuyu teithetao hinou puhsü lishiloua thaire; alia puletao nou puh pfüphao sü thaidzü khüche peiwu-a kishorei kide alihi puhye sü pokhaire. 38Alia Luda hai Jopa ngheiki bubaiyu donou rozümai taonou Pitar hai sühi bue touyu sü chouloua mai ahaiye puh hi seiho, “Ne thalasou Eletao hi vepeio,” tea panou ve kue. 39Südonou Pitar nou shuloua puhaiye koa tare. Alia puhnou velouyu kisü, puletao nou puhye sü kishorei kide nahi sapa khaipeire. Alia meamai pfütao hrülainou Pitar ngheikinou la-a Dorkanou puletaoye koa hrübuki rüpei-doupeiyu zhaotao ea sahnü taosü pongao-a kra-a bue. 40Ana Pitar nou puletao hrülaiye panou vakou lüpawu-a kou khou khüloua veachi paoe; süthaisü puhnou thaiphao nahi reiveloua, “Tabitha, tashulouwo tea paoe.” Sühinou puh nghi hepa loure ea Pitarye ngaoloua tashu chobu loure. 41Alia Pitar nou puh bah thaikouloua puhye süthaishu peie. Süthaisü puhnou lüloumaitao hrülaiye süolouzü meamai pfütaoye-apu kubailoua puhye sü hri-a puletao hi thaothou peiwure. 42Ko süsü Jopa teidei teiteihi süvelouyu kisü, maikhemai alaonou Mapaoye sü louche loure. 43Alia Simon tea kuyu souhee vah souyu mai aliye koa Pitar nou Jopa hi teithe taoli chao-a bue.

Currently Selected:

SEI-ATAMAI VAHTAO 9: POUMBSI

Highlight

Copy