SEI-ATAMAI VAHTAO 10

Pitar ea Kornelia

1Süpha kisü Kaisaria hisü Kornelia tea kuyu maili bue. Puhsü “Italia reihme” tea kuyu Rommai reihmaitao hinou reihmai kaihli pei hi chayu mailie. 2Puh hai puhvei kikhamai taoye koa rathoyu hinou leishoyu ea Ramaiye pi-a hrüyu, toure hamai hi halia pakhaimoa peinüyu, alia tobai soumoa Ramai hi veachi paoa buyu mailie. 3Teitheli koukhe teilecho asü phahinou puhnou zho ali ngaoe. Sühisü puhnou Ramai vei Rakivamai aliye sheesha-a ngaoe ea sünanou taveloua “Kornelia!” tea puhye kue.

4Alia puhnou ngaopiloua puh hisü pheteiloua paoe, “Mapao, daie?”

Rakivamai sünanou puh hisü chila peie. “Nevei veachitao ea nenou toure hamai hi peiyu vah taosü Ramai nou khrasho loure, alia ne khosü peire donou soudare. 5Alia chuo Jopa hi maiye seiho Pitar tea kuyu Simonye ku savelo. 6Puhsü Simon souhee vah souwoye koa bue, puh kisü zaidupe hinou bue.” 7Alia puhye chi phayu rakivamai sünanou tayu thaisü puhnou puh kilai ahaiye ea puh kuvah soure donou dopakhai touyu, rathoyu hinou leishoyu puhvei reihmai aliye puhnou kuloua, 8puletao hisü pawuyu na vanou chi pfüphou paongao peiwu-a puhnou puletaoye sü Jopa hi seitare.

9Thainaisho kisü puletao nou ludu hinou ta-a nuhdu sünahi takou ngheiyu kisü, Pitar sü heako teilecho kiahai tayu phakisü kipei hinou veachi paore donou tapare. 10Sükisü puhsü pouzüloua hatali tounü loure; ana puletao nou touso souda buki, puhnou zho li ngaoloure. 11Puhnou raki houpakhai touyu, alia dushoyu sahba raiyu ha bvüli sünavei kainghou dai hinou khizhukoua deiphi hi phakouyu sü ngaoe. 12Alia süna levai hisü phi-bao dai pfüyu khao-sou tyali pounou sü-roupoa tayu khaonatao ea teihi raohou tyali loue. 13Sükisü pai alinou puh hisü, “Shulouwo Pitar ea dathea touwo!” tea paoe.

14Ana Pitar nou paoe, “Movuzüe, Mapao! Daiolouzü E vuhlia chaa taoyu moa sheemoyu na lia toukhai mohie.”

15Alia pai sünanou puh hi lüh ahai paopue, “Ramai nou sousheeyu nasü nenou sheemoe tea chowu laimoe.” 16Alia süsü lüh asü koute pae, süthaisü bvü nasü thalasou raki hi podakhai khere.

17Chuo Pitar nou puhnou ngaolouyu zho sünavei kosü dai tousa tea choha-a buyu hinou, zhukhaio, Kornelia nou seivekhai touyu maitao nou Simon kisü kahi bue touyu sü noupove süloua ea tave fühao bomü hinou laloua, 18“Pitar tea kuyu Simon sü haihi bubumoe,” tea kupaloua noue.

19Alia Pitar nou zho sünavei ko vanou cho-a buyu hinou Rakonou puh hi paoe, “Zhukhaio, mai asünou neye phoua bue. 20Südonou shuloua takou khaio ea halia letsü khaimoa puletaoye koa tawo; daiolouzü Enou puletaoye seivebaie.” 21Sühinou Pitar nou mai sütaohi takouloua paoe, “Zhukhaio, neletao nou phoua buyu mai nasü E-e; neletao daidonou vewe?”

22Puletao nou chila peie, “Eletaoye reihmai kaihpei chawo Kornelia nou seive-e. Puh hai Jihudimai hrülainou tsükhouyu acheche ea Ramaiye piyu mai lie. Puhye panou nevei chipao sü keiloure donou neye puh kihi kuvere donou sheeyu rakivamai alinou puh hi paopeie.” 23Sühinou puhnou puletaoye sü kihi kulouloua sheloure.

Thainaisho sü puhnou shuloua puletaoye koa tare, alia Jopa hinou lüloumai kamaitao-a puhye koa tare. 24Teithe süna thainaisho sü puletao nou Kaisaria hi velou loure. Alia Kornelia sü puhvei tarai ea samaitaoye kuve dzükhaitoua puletaoye khoa bue. 25Pitar nou ki sühi talouyu phakisü Kornelia nou puhye tapa daoloua puh phihi kaokouloua puhye khurüe. 26Ana Pitar nou puhye süthai shuloua puh hi paoe, “Lashulouwo; E-a maibaie.” 27Sükua Pitar nou puhye chi phapoa kikhavai talouyu kisü sühinou maitaoli vedzüa buyu sü puhnou ngaoloure. 28Sühinou puhnou puletao hi paoe, “Jihudimai alinou tahrüh kukhemai aliye koa laiyu moa puhye ve daoyu hai Eh vei razhai thaifüa aetoumoe touyu sü nele lah nelenou sütoua bue. Ana Enou maitaliye chaa taoe moa sheemoe tea chowu laimoe touyu sü Ramai nou Ahi ngaopeire. 29Südonou nelenou Eye kuloure donou seiveyu kisü, Enou halia motouyu soumoa tavebaie, südonou neletao nou Eye kuveyu hai daidonoue touyu sü Enou neletao hi nouwe?”

30Kornelia nou chila peie, “Teithe adai jühi, Enou Aki hinou koukhe chupha teilecho asü hinou veachi paoa bue. Alia sükhaimoa peiva vayu sah bahyu mai alinou Anghojünou kou laloua paoe, 31‘Kornelia! Ramai nou ne khosü noupeire ea nenou toure hamai hi sa-a peiyu sü li-cho peire. 32Südonou ne maiye seiho Jopa hinou Pitar tea kuyu Simonye kuloukhaio; puhsü zaidu pe hinou buyu souhee vah souwo Simon ki hinou hou-a bue!’ 33Südonou Enou thalasou nehi maiye seive neye kue, alia nenou vepeiyu hai veishore. Südonou chuo Eh hi paopeire Mapao nou nehi chikha peikhai touyu teiteisü keire donou khoa Eletao hrülai sü Ramai nghojünou ve bukhaire.”

Pitar Chipao

34Sükisü Pitar nou chi paoshu tare: “Ramaiwo zhai soukumoe touyu sü chuo Enou chekhao-a süloure. 35Ana tahrüh tyali hrohinou puhye piyu ea acheche vah soua buyu mai taliye sü puhnou popeiwe. 36Mai hrülai vei Mapao soua buyu Jisu Khrista vanou kaonayu vei ko avei paodou peiyu hai Ramai nou Israel maitao hi seive peiyu chipao nasüe touyu sü neletao nou süwe. 37Johan nou puhvei dzükhao dapeiyu vei chipao paodouyu thaisü Galilee hinou shua Judea teidei teitei hi dai pare touyu kosü neletao nou süwe. 38Süolouzü kakua Ramai nou Nazareth hi Jisu ye sü Rako Mashi ea khoukonou laposhu puhpei hisü napeie ea kakua puhnou buh liki taho aveivah soua ea rashinou souvea-a buyu mai hrülaiye kakua souvei peie touyu kosü neletao nou süwe; daiolouzü Ramai nou puhye koa laiwe; 39Alia puhnou Jihudimai teidei hi ea Jerusalem hinou soupfüyu vah teiteitao vei zhopaohmai taosü Eh-e. Puletao nou puhye sü süüpei hinou khizhua southeare. 40Ana Ramai nou puhye sü teithe asü zhou panou hrishuloua maikhemai hi ngaopeire. 41Sütoukhaia maikhemai hrülaihi ngaopeimoe, ana Ramai nou raia dopacheyu zhopaoh maitao likhei hi ngaopeibaie, süolouzü puhnou athai hinou hrishu louyuthai puhye koa toushoyu Eletao nou ngaobaie. 42Alia maikhemai hi ko avei paodou peire ea Ramai nou puhye sü panou hrimai ea thaimai pei hi chiku-apeio soure donou dopa peikhai touyu nasüe touyu zhopaoh soure donou Eletao hi chikha peikhaitoue. 43Alia puhzhih khouko vanou puhye loucheyu mai talinou mah hinou khailu louyu sü ngaoloulai tea puh vanou rachi paolamai hrülainou zhopaoh peikhaitoue.”

Tahrüh Kukhemai taonou Rako Mashi Ngaolouyu

44Pitar nou haibüa chipao-a buyu hinou puh chipao keia buyu maikhemai hrülai pei hisü Rako Mashi kouloure. 45Alia hee rodeyu maitao hrohinou Pitarye koa veyu lüloumai taosü khupa loure, daiolouzü tahrüh kukhe maitao pei hi koutea Ramai nou puh Rako Mashi vei sa-apeina nasü lakou thoupeire. 46Daiolouzü la sütho tyali pao-a buyu ea Ramaiye paoshoa buyu sü puletao nou chouloure. Sühinou Pitar nou paoe: 47“Eletao nou ngaolouyu kua Rako Mashi ngaolouyu maikhemai haitaoye dzükhao dapeire hinou matalinoua nulou süwu?” 48Südonou puhnou puletaoye Jisu Khrista zhih hinou dzükhao daloure donou chikha peire. Süthaisü puletao nou puhye sü teithe daotu puletao hi naipeio tea khoe.

Currently Selected:

SEI-ATAMAI VAHTAO 10: POUMBSI

Highlight

Copy