SEI-ATAMAI VAHTAO 11

Pitar nou Jerusalem Church hi Puh Vah-ko Süngaoyu

1Chuo tahrüh kukhemai taonou-a Ramai chipao sü ngaoloure touyu sü sei-atamaitao ea Judea hi buyu lüloumai kukhenou chouloure. 2Südonou Pitar nou Jerusalem hi tapayu kisü, hee rodeyu lüloumai metaonou puhye veiva-a paoe, 3“Ne daidonou hee rode moyu maitao hi taho puletaoye koa touzhowe?” 4Ana Pitar nou puletao hisü pawuyu teitei vanou shoshonou paongao shure:

5“Jopa nuhdu hinou Enou veachi paobukinou zhiho mekou kuyu ali hinou Enou zholi ngaoe. Sühisü Enou dushoyu sahba raiyu ha bvüli sü sünavei kainghou adai hinou khizhuloua raki hinou deiphi hi kouyu sü ngaoe ea sünasü Enou buyu hi kouloure. 6Süna levai hisü Enou soutaosoua zhuloukhaie, deiphao hi buyu phi-baodai pfüyu kikhao, rekhao, pounou sü-roupoa tayu khaonatao ea teihi raohoutao ngaoe. 7Sükisü pai alinou Ahi sü, ‘Shulouwo Pitar, ea dathea touwo!’ tea paoyu sü Enou choue. 8Ana Enou paoe, ‘Movuzüe, Mapao! daiolouzü chaa taoyu moa sheemoyu hatalia Amü hi loukhai mohie.’ 9Ana rakinou pai sünanou vuh ahai chena-a chila peie, ‘Ramai nou sousheeyu nasü nenou sheemoe tea chowu laimoe.’ 10Haikuyu sü vuh asü koute pae, alia sütao teitei sü raki hi paidakhe khaikhaire. 11Alia zhukhaio, sübü hinou Kaisaria hinou Ahi seiveyu mai asü hai Enou hou-a buyu kina hisü tavelou loure. 12Alia letsüyu soukhaimoa puletaoye koa tawo tea Rakonou Ahi paopeie. Thaihou jürai mairou haitao-a Eye koa mai süna kihi sü veloue. 13Alia puhnou kakua rakivamai alinou puh ki hinou kou layu ngaoe ea puh hi, ‘Jopa hi maiye seiveloua Pitar tea kuyu Simonye ku savelo, 14puhnou nehi, ne ea ne kikhamai hrülainou khailu loure kosü paopeilai,’ tea paoe touyu sü puhnou Eletao hi paongao peie. 15Alia Enou chi paoshua buyu hinou, Rako Mashinou puletao pei hi sü shuraiki Eletao pei hi kouyu büa kouloure. 16Sükisü Mapao vei chipao süolouzü puhnou kakua: ‘Johan nou dzünou dzükhao dapeie, ana neletaoye louzü Rako Mashinou dzükhao dapeilai,’ tea paoyu sü Enou liloure. 17Südonou Eletao nou Mapao Jisu Khristaye louche louyuki Ramai nou Eletao hi sa-apeina peiyu kua puletao hia puhnou peilouzü Ramaiye nulousüe touyu Esü thaoh-e?”

18Puletao nou chipao haina choulouyu kisü paikhaimo zheire ea Ramaiye sholoua, “Sükuyu thaiwo tahrüh kukhe maitao hia Ramai nou panou ledaloua hriloure teile zhou aveisü peire!” tea paoe.

Antiok hi buyu Church

19Chuo Stephan ye southeayu ki souveayu süna hinou porarou poa tayu lüloumai taonou mai kukhe moa Jihudimaitao hi likhei kosü paodoupeia Phoenikia, Kupra ea Antiok hi koute doua tare. 20Ana Kupra ea Kurini hinou taveyu kukhe lüloumai taonou Antiok hi taveloua Jisu Khrista vanou ko avei nasü Greek maitao hi-a paodou peie. 21Alia Mapao vei khouko sü puletao pei hi kozhopeia maikhemai alaosou loucheloue ea Mapaowo hilo reiveloue.

22Ko süsü Jerusalem hi buyu lüloumaime nouhi chouve loulouyu kisü puletao nou Barnabasye Antiok hi seive. 23Puhnou tavekhaie Ramai vei zhuvea nasü ngaoloua puhsü lesasho loure; alia puletao le teiteinou cheche-a Mapao hinou tobai soumoa buloure donou puhnou puletao hrülaiye soutaosoua süpeie. 24Daiolouzü Barnabas hai lü ea Rako Mashinou phoupeiyu veishoyu mailie. Alia maikhemai alaosou Mapaowo hi pove thoupuloue.

25Süthaisü Barnabas nou Saul ye phoure donou Tarsa hi tare; 26alia puhnou puhye ngaolouyu kisü, puhye sü Antiok hi save. Sübüa puhai nou poteili lüloumaimeye koa dao-a maikhemai taoliye doupeie. Alia Antiok hinou rozümai taoye rairaikai-a Khristamai tea kuloue.

27Chuo teithe haitao hinou rachi paolamai kamainou Jerusalem hinou Antiok hi takoue. 28Alia puletao hrohinou Agaba tea kuyu mai sünanou tashu laloua deiphao buh teitei hisü ngaopi shoyu tokaayu sü vevuzü laire tea Rakovei khouko hinou rai-anou paopae; alia süsü Klaudia nou veduwo soubu kinou pae. 29Alia Judea hinou hrüa buyu lüloumai thaihou jürai maitaoye soukha peire donou mai hrülainou lahlah paomainou peilousü thaifüa seipeilai tea rozümai taonou chi lükoure, 30alia puletao nou sübüa souloua Barnabas ea Saul bah hinou pousha nasü tsümaitao hi seive peire.

Currently Selected:

SEI-ATAMAI VAHTAO 11: POUMBSI

Highlight

Copy