SEI-ATAMAI VAHTAO 7

Stephan vei Chipao

1Süthaisü napao peichananou Stephan hi noue, “Haisü chekhaowu?”

2Stephan nou chila peie, “Thaihou jüraitao ea puokhe maitao keipeikhaio! Eletao puo Abraham nou Haran hi ve hrümojü Mesopotamia hinou hrübu kinou khouko ava Ramai nou puh hi ve ngaopeia 3puh hi paoe, ‘Ne teidei ea nevei taraiye thaowu-a Enou nehi ngaopei laiyu teidei hi tawo.’ 4Südonou puhnou Kaldia tamai teidei sü thaowu-a Haran hinou taho füsho tare. Alia puh puonou thaiyu thaisü sühinou chu neletao nou hrüa buyu teidei hainahi Ramai nou puhye seive thoupeie. 5Ana sühisü puhnou puh hi kaa-zhu lia süolouzü phi heali healousü koute teideilia peimoe. Sütoukhaia Ramai nou puh hi ea puhvei tao-nah taohi teidei süsü peilai tea puh nah habu kinou puh hi paopeire. 6Alia Ramai nou puh hi haikua paopeie: ‘Nevei tao-nah khemaisü teidei sütho ali hinou taho shevai-shesü soua ea sühi mainou puletaoye panou kilai soua ea souvea-souho-a po kaihdai hrülai. 7Ana puletao nou kuvah soulaiyu maisütao pei hi Enou chikulai, alia süthaisü puletao nou teidei sühinou tapaloua buh haina hinou Eye tave tholai,’ tea Ramai nou paoe. 8Alia sübüa Abraham nou Isakye nalouyu thai teithe achaki hinou puhye hee rode; alia Isak nou puh nahpoutu Jakob ye hee rode; alia Jakob nou Eletao puo-pao maitao kiahaiye sükua soupeie.

9“Alia puo-pao maitao nou Josef ye ngaorailoua puhye sü Ejipt teidei hi zhothoure; ana Ramai nou puhye kozhoa bue, 10ea puhvei veahoyu veishi hinou vupapeie, alia Ejipt tamai Pharaoh Veo nghojü nou puh hisü zhuvea ea ratsü sü peie; südonou puhnou Josef ye Ejipt teidei ea puhvei ve kikha teitei pei hi panou paopu soue. 11Alia chuo Ejipt ea Kainan teidei hisü tokaa veloua veashoyu maikhemai hi vedaoe, alia Eletao puo-pao khemai sü touso ngaolouhoa bue. 12Ana Jakob nou Ejipt teidei hi thou bue touyu sü chouloua puhnou Eletao puokhemaiye rairailai soua sühi seive. 13Alia puletao vei lüh ahai chena veyu hinou Josef nou lah puhye sü puh thaihou jüraimai taohi süngao peie; alia Josef vei kikhamaiye sü Pharaoh hi süngao peie. 14Süthaisü Josef nou seiho puhpuo ea puh tarai hrülai mai rainai-angou taoye puh hi ku save khailoure. 15Südonou Jakob nou Ejipt hi takoure ea sühinou puh-a, Eletao puokhemaitao-a thaire. 16Alia puletao pfüphao sü Shekhem hi podakhai veloua Abraham nou Shekhem hi Hamor nahpoutu maitao hinou poushanou muh peia hrülouyu khüh hi vuwure.

17“Ana Ramai nou Abraham hi chaachou soua apaopei khaitouyu teile sü ngheivekhaie Ejipt hi buyu Ehmai taosü alaosou pukhere. 18Süthaisü Josefye sükhai moyu vemai kukhe alinou Ejipt teidei hisü veo souloure. 19Veo sünanou Eh puo-paomaitao hisü doshilih soua sahrüe ea Eh puo khemaitao hisü puletao vei nahmai taitukheye sü puletao ki hinou polaipawu-a panou vakounou thaire donou tukha-tudei-a souveasho peie. 20Sükuyu teile hinou Mosesye sü naloue, alia Ramai nghojünou Moses sü hrüvei shoe. Alia puhpuo ki hinou puhye sü khou asü kipae, 21alia puhye puhki hinou vakou hi popa laiyu kisü Pharaoh nah naotupainou poloua puhye sü lah puhnah poutu souloure donou kipaloure. 22Alia Mosesye sü Ejipt tamaivei ratsü doupeie ea puhsü chipao ea vah sovei hinou khouchihsho loure.

23“Moses nou po raidai tsüpayu kisü, puh le hinou puh thaihou jürai Israel maitaoye tave zhunüsho loure. 24Alia puletao hrohinou mai kamai aliye Ejipt tamai alinou kao-zümoa souvea peia buyu sü ngaoloua puhnou puhye soukha peia Ejipt tamai sünaye southeawu-a mai sünavei khüh phoupeie. 25Daiolouzü Ramai nou puhmaitaoye khailu peire donou puhye koa vah souwe touyu sü puh thaihou jürai maitao nou sülou shulai tea Moses nou choe; ana puletao nou süloumoe. 26Thainaisho kisü Israelmai ahai züva-a buyu sü Moses nou tave ngaoloua puhaiye panou chaveiloua nüa puhai hi, ‘Athaihou jürai haire, nehai sü thaihou jürai baie; daidonou nehai sübüa tai-dava-a buwe?’ tea paoe. 27Ana puh kinapa hi zhaishi soua buyu sünanou Mosesye dolaiwu-a paoe, ‘Thaohnou neye panou Eh pei hi paopu ea chiku-apeio soupeie? 28Nenou do teithe Ejipt pounaye southeayu kua Eye-a southea nüwu?’ 29Moses nou süsü choulouyu kisü Midian teidei hi tuholoua sühinou ve shevai-shesüli soua hrüe ea nahpoutumai ahai hrüloue.

30“Po raidai talayu kisü Sinai deichi rekounou rakivamai alinou kou ngheimei tao-a buyu meikei ali hinou puhye ngaopeie. 31Puhnou süsü ngaolouyu kisü, ngao-a buyu süna vanou puhsü khupa soure. Alia puhnou süsü zhure donou ngheiki hi takouyu kisü, Mapaowo paisü puhnou choue: 32‘Ehai ne puo-pao Ramai, Abraham, Isak ea Jakob vei Ramaie.’ Sükisü Moses sü nguhrührü loure ea khuvei-a zhulou hore. 33Alia Mapao nou puh hi paoe, ‘Nephi hinou ne phikha sü phawo, daiolouzü nenou la-a buyu buh haina sü sheeyu deie. 34Ejipt hinou buyu Amai khemaiye souveayu sü Enou ngaovuzü loure. Puletao vei veahoyu paisü Enou chouloure ea Esü puletaoye mado soupeire donou kouwe. Alia chuo taveo, Enou neye Ejipt hi seivelai.’

35“ ‘Neye thaohnou paopu ea chiku-apeio soupeiwe’ tea paoa puletao nou aetou moyu Moses hainaye sü ngheimeitao-a buyu hinou puh hi ngaopeiyu rakivamai süna vahinou paopu ea popa-apeio soupei loure donou Ramai nou seive peie. 36Puhnou Ejipt hinou, zaidu ahona hinou ea po raidai rekounou khupa vahtao ea sheetao soua puletaoye Ejipt hinou süthai papeie. 37‘Ramai nou nele thaihou jürai maitao hrohinou neleye donou E kuyu rachi paolamai ali seive peilai’ tea Israelmai taohi paoyu mainasü Moses süe. 38Sinai Deichi hinou puh hi chi phayu rakivamai sünaye koa ea Eletao puokhemai taoye koa rekounou lüloumaime hinou buyu puhsü hainae, alia Eletao hi lakou peire donou Ramai vei hriyu chipao sü puhnou ngaoloue.

39“Ana Eletao puo-paomai taonou puh chi sü züpeibae ea puhye sü puletao nou dolaiwu-a puletao tsü-lesü Ejipt hi khaive pure choa 40Aaron hi haibüa paoe, ‘Eh nghojünou tapeire ramai taoli Ehye donou soupeikhaio, daiolouzü Ehye Ejipt teidei hinou süthaipa peiyu Moses puh hisü dai paresa Ehnou sümoe.’ 41Alia teithe sütao kisü puletao nou chotu zhaikua bashara ali souloua sünaye sü ha nanou pove thoe ea puletao bahnou soukhai touyu vah sütaoye khuhao-a sasa nüh nüloure. 42Ana Ramai nou puletaoye thaowu-a panou ratei hi vuh taoye thore hi puletaoye thoupeiwure. Sükuyu hai rachi paolai maitao vei larübvü hi rüthouyu büe:

‘He Israel kikhamai,

po raidai rekounou neletao nou kikhaorüh southea-a ea ha nanou potho-a Ahi peiwu?

43Alia Molok rah thoyuki sahpao,

ea neletao vei teivuh ra

Rephan vei bashara taosü neletao nou thore donou soukhaitoua polaiwe; südonou

Enou neletaoye huposhu Babilon latawulai.’

44“Rekounou bubuki Eletao puo-paomaitao hisü zhopaohvei sahpao nasü bue. Sahpao sünasü Ramai nou Moses hi haibüa souwo tea paodou peikhai touyu süolouzü Moses hi pongao peiyu zhai süna thaifüa soukhaitoue. 45Eh puo-paomaitao nghojünou Ramai nou hutayu tahrüh khemaitao hinou teidei sünasü puletao nou polouyu kisü sahpao sünasü Eh puo-paomaitao nou puletao vei puokhemaitao hinou shoshonou ngaoloua süsü Joshuaye koa polouloue. Alia süsü David phaova koute sühinou bue. 46David nou Ramai khu-leshi ngaoloua Jakob Ramai hrüre buh ali puhye panou soukhaio tea Ramai hinou khoe. 47Ana puhye donou ki ali soupeiyu hai Solomon nou baie.

48“Sütoukhaia, Aku Kulai Puhwo louzü bahnou soukhai touyu kitao hinou hrümoe; süolouzü rachi paolawonou haibüa paoe:

49‘Raki hai Avebuh-e,

ea deiphao hai Aphihea bue.

Eye donou neletao nou kakuyu ki soupeilai?

tea Mapaowo nou paoe,

Moa Asobuh sü daikinou lai?

50Abahnou na haitao teitei soupei mowu?’

51“He noukhouyu, alia le ea nou hee rode moyu maitao, neletaowo teisanou Rako Mashiye duwe. Neletao puomai taonou souyu kua neletao-a souwe! 52Neletao puokhemai taonou rachi paolamaitao hronou thaohye souvea moyu bue? Alia puletao nou Achecheo verevei raia paosü peiyu maitaoye koutea southeare. Alia chuo neletao nou puhye sü shoh soupei-a southeare. 53Neletaowo louzü rakivamai vanou peikhai touyu razhai süna ngaolouyu maitaoe, ana süsü neletao nou zülou moe!”

Stephanye Chuhnou Deitheayu

54Chuo puletao nou chipao sütaosü choulouyu kisü rarouche rarouloua puhpei hisü motoua hu tutsütsü loure. 55Ana Stephan louzü Rako Mashinou phoupeiloua raki hi zhitei kheyu kisü Ramai vei khouko ava ea Ramai bah zhoulo vanou Jisu nou la-a buyu sü ngaoloua, 56“Zhukhaio! raki houpakhai touyu ea Mai Nahpoutu nou Ramai bah zhoulo vanou la-a buyu sü ngaoe,” tea paoe.

57Ana tsüme hi velouyu maikhemai taonou shusou raoloua ea puletao nousü bahnou kaloua puh hisü alikheisoua hukou loure, 58alia puhye sü nuhdu vakouhi süthai paloua chuhnou deipeire. Süpha kisü zhopaohmai taonou puletao sahsü Saul tea kuyu khemaina ali phihi pokhaire. 59Alia puletao nou Stephan hi chuhnou deia buyu hinou puhnou, “Mapao Jisu, Arako hai popeiwo!” tea veachi paoe. 60Alia puhnou kou khoukhüloua pai kushoa paoe, “Mapao, mah haina hai puletao pei hi chokhai peiwuso!” Alia puhnou süsü paowu-a zhitare.

Currently Selected:

SEI-ATAMAI VAHTAO 7: POUMBSI

Highlight

Copy