SEI-ATAMAI VAHTAO 6
6
Vahlümai Anaiye Dopayu
1Teile phajü thaisü, rozümaitao pulailai payu kisü Greek tamai la souyu Jihudimai taonou nuh buh Jihudimaitao pei hi nolealea loure daiolouzü puletao vei meamaipfü taoye sü teithetsü touso zhihpeiyu hisü ngaophoupei khaimore. 2Südonou sei-atamai kiahai taonou rozümai me teiteiye kuve dzüloua paoe, “Tou-so peipha peiyu vah donou Eletao nou Ramai chipao paodouyu hai thaoyu zümoe. 3Südonou thaihou jürai maitao, neletao hrohinou mainou kuveiyu, Rako Mashinou ea ratsünou phoupeiyu mai anaiye dopa peikhaio. Ehnou puletaoye panou vah haina pei hi kholai. 4Ana Eletaowo louzü veachi paoyu hi ea chipao sünavei ku-vah hinou tobai soumoa lenoulai.”
5Alia puletao nou paoyu sünanou maisou hrülai lesü khraloure. Südonou lünou ea Rako Mashinou phoupeia buyu Stephan, ea Philip, Prokoras, Nikanor, Timon, Parmenas ea Jihudimai zhai polouyu Antiok hi mai Nikolasye puletao nou doloure. 6Puletao nou mai sütaoye sei-atamaitao nghojü hi save thoupeire, alia puletao nou veachi paopeiwu-a puletao bahsü sümaitao pei hi lakhai peire.
7Alia haikua Ramai vei chipao sü pumaimai kheloure; alia Jerusalem hisü rozümai alaosou pukhe loure ea napaomai alao lü süna poloure.
Stephan ye Nilouyu
8Alia Stephan nou zhuvea ea koukonou phoupeiloua khupa vah aduli ea shee alaosou maikhemai hrohinou soue. 9Ana Mado souyumai (sübüa puletaoye kuwe) vei rathobuh hinou kamainou süolouzü Kurini hinou, Alekjandria hinou ea kukhe Kilikia ea Asia hinou taveyu Jihudimaitao-a lou-a puletao nou tashu Stephan ye chi veiva loure. 10Ana puhvei ratsü ea puhye panou pao-a buyu Rako nghojühi puletao nou lalou hore. 11Südonou puletao nou mai kamaiye khei-a thaopeiwu-a, “Mai hainanou Moses ea Ramaiye paoshiyu Ehnou choue,” tea panou paoloure. 12Sükuloua puletao nou maisou, tsümaitao alia razhai dou-apeimai taoye süthou rarou peiwu-a puletao nou tave puhye niloua tsüme nghojü hi save-e. 13Süthaisü puletao nou puh vanou madayu zhopaoh peiremai kamaiye saveloua panou haibüa paoe, “Mai hai nanou Eletao vei sheeyu Rathoki ea razhaiye paoshiyu tokhai moe; 14daiolouzü Nazareth hi Jisu hai nanou Rathoki haina sü souhalai ea Moses nou Eh hi peikhai touyu zhai hainasü soudalai tea puhnou paoyu sü Ehnou choue!” 15Alia tsüme hinou chobua buyu maikhemai hrülainou puhye zhutei-a buyu kisü puhvei zhusü rakivamai zhukua ngaoe.
Currently Selected:
SEI-ATAMAI VAHTAO 6: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
