SEI-ATAMAI VAHTAO 5

Anania ea Sapphiraye Tudee peiyu

1Ana Anania tea kuyu mai alinou puh chapfü Sapphiraye koa füdei ali zholoure, 2alia puh chapfü-a ae-ao tea zholouyu hinou muh polosü puhnou pokhaire, alia zha polo likhei poveloua süsü sei-atamaitao bah hi thoupeire. 3Ana Pitar nou puh hi paoe, “Anania Rako Mashi hi mada loure ea füdei zholouyu hinou zha polo pokhai loure donou Saitanye panou daidonou ne lekhe hi phouloure? 4Na süna zhomo jühi-a sünasü nevei mowu? Alia süna zhowoyu thai-a pousha nasü nedo soulai mowu? Daidonou nenou haibüyu vah souloure nelekhehi choloure? Nenou mai hi madayu moe ana Ramai hi madabaie!” 5Anania nou chi sütao choulouyu kisü kaokouloua thaire. Alia ko süna choulouyu mai hrülai sü ngaopinou phouloure. 6Sükisü nahlemai taonou tave puh pfüphao sü sahnou züloua vakou popa vure.

7Alia teilecho asüpha thaisü puh chapfünou dai paresa touyu sükhaimoa sühi sü taloue. 8Pitar nou puh hi noue, “Nehainou füdei nasü muh haizhonou zholou vuzü baiwu, Ahi paongao khaio?”

Puhnou chila peie, “Ovai, haizhou zholou baie.”

9Südonou Pitar nou puh hi paoe, “Nehai nou Mapao vei Rakoye zhai zhure donou koa ae-ao toulouyu hai daidonoue? Zhukhaio, ne chaaye povuyu maitao sü chua kikhu bomü hi buhie, alia puletao nou neye-a vakou popalai!” 10Sübü hinou puhsü Pitar phihi kaokouloua thaire. Alia nahlemai taonou taloukhaie puhsü thaia buyu ngaoloua puhye sü vakou popawu-a puh chaa ngheiki da-a povu peire. 11Alia lüloumai me teitei ea chi sütao chouloumai hrülai sü ngaopisho loure.

Sei-atamai taonou Sounou Souvei Peiyu

12Chuo sei-atamai taonou maikhemai hronou shee ea khupa vah alaosou souloure. Alia lüloumaitao hrülaisü tsüle ali soua Solomon vei Kipamü hinou vedzüa bue. 13Kukhe maitalinoua khuveia puletao hi lou zholou moe, ana maikhe mainou puletaoye sü tsükhoushoa bue. 14Sütoukhaia Mapaoye louche louyu naotu poutu mai alaosou puletao me hisü thoupu peire. 15Südonou Pitar nou ta-a buyu hinou puh khunguhai panou puletao kamai vahi dakhai loure koute donoua maikhe mainou sounou maitaoye duvahi poveloua puletaoye züh phaohi ea zha phaohi pozü khaipeie. 16Alia Jerusalem pehao hinou buyu nuhdutao hinou maikhe mainou lishimai ea rashi loumai taoye kusave dzüloure; alia puletao hrülaiye souvei peire.

Sei-atamaitaoye Souveayu

17Ana napao peichana ea puhye koa laiyumai hrülai süolouzü Sadukimai me, puletao nou ngaoraiyu nou phoupeiloua 18tashu sei-atamaitaoye niloua maisou hukhahi thoure. 19Ana süzhou khei Mapao vei rakivamai alinou ve hukhaki kikhu taosü houpa peire ea puletaoye vakou sapaloua paoe, 20“Takhaio ea Rathoki hinou ve laloua hrü ashu hainavei kosü maikhe mai hi soutaosoua paongao khaio.” 21Alia puletao hi paopeiyu thaifüa teithe pakhaie, puletao nou Rathoki hi taveloua maikhe mai hi doushure.

Chuo napao peichana ea puhye koa laimaitao nou taveloua, tsüme, süolouzü Israel maitao vei aku kulai tsümai hrülaiye kuve dzüloure; süthaisü sei-atamaitaoye puletao nghojühi save loure donou maiye hukhahi seitare. 22Ana vahbuh maitao nou tahoyu kisü puletao nou sei-atamaitaoye sü hukha hi phouhare, südonou puletao nou dakhaive haikua tsüme hi paongaoe, 23“Ehnou hukhahi velouyu kisü hukha kisü soutaosoua khutsükhai touyu ea sühi khoa buyu reihkhaomai taonou kikhutao hinou la-a buyu sü ngaoe, ana Ehnou sütao houlouyu kisü maitalia kikhahi bua ngaolou moe.” 24Südonou chuo Rathoki khoyu reihkho peichana ea napao adumai taonou chi sütao choulouyu kisü sei-atamaitao hisü dai paresa tea puletaosü khupasho loure. 25Sükisü mai alinou tave louloua puletao hi paoe, “Zhukhaio, neletao nou hukhahi thoukhai touyu maitaosü Rathoki hinou la-a maikhe maiye doupei-a bure!” 26Sühinou reihkho peicha nanou puhvei vahbuhmai taoye koa taho sei-atamai taoye saveloue, ana tai-dayu halia soumoe, daiolouzü maikhe mainou puletaoye chuhnou deiresü piloure.

27Alia puletao nou sei-atamai taoye saveyu kisü, puletaoye panou tsüme nghojü hi laloure. Alia napao peicha nanou puletao hi chi noua paoe, 28“Ehnou neleye zhih haina vanou doupei khaiso tea soutaosoua tukhapeie, ana zhukhaio, nelenou doupeiyu sünanou Jerusalem hisü phoupei loure ea mai hainavei zhesü nelenou Eh pei hi mah dukhai nüwe.”

29Ana Pitar ea kukhe sei-atamai taonou chila peie, “Ehwo mai chi züre jünou Ramai chinou zü vuzü bailai. 30Nelenou kros vanou popa khizhua veatheayu Jisu ye sü Eletao puo-pao Ramai nou souhri peire. 31Israel maitao hi le dalouyu ea mah khaipeiyu sü peiloure donou Ramai nou puhye sü Süthai-apeio ea Khailu-apeio panou soure donou puh bah zhoulo vahi pokhe khaipeire. 32Alia Eletaowo haitaovei zhopaoh maitaoe, ea sübüa Ramai nou puh chi züyu maitaohi peikhai touyu Rako Mashi-a zhopaoh souwe.”

Gamaliel vei Chipao

33Puletao nou chi haina hai choulouyu kisü rarousholoua sei-atamai taoye southea nüsho loure. 34Ana tsüme hrohinou Phariseemai ali soua maikhemai hrülainou khuhao-a buyu razhai dou-apeio Gamaliel nou tashu laloua sei-atamai taoye phajü donou vakou sapa khailoure kharochi peire. 35Süthaisü puhnou puletao hi paoe, “Israel maitao, neletao nou mai haitao hisü dai soulaiwe neletao lah leikeilo. 36Daiolouzü raikia Theudas nou puh lah puhyenou adumai alie tea tashuloua poutumai kaidaipha puhye koa tae; ana puhye southeayu thaisü puh thaifü maitaosü porarou taloua süsü haliamo baire. 37Puhthai-a Galilee hi mai Judas nou maipei phouyu teile hinou tashuloua mai taoliye ku save puh hi khailoue. Ana puhye-a southeare ea puh thaifümai hrülai-a porarou tare. 38Südonou chu hainahia Enou neletao hi paowe, mai haitao pei hi bah khakhaiso ea puletaoye phapeio, daiolouzü tsüdo moa vah haina hai mai hinou vewe toulouzü süsü hata bailai; 39ana haina hai Ramai hinou vewe toulouzü neletao nou puletaoye souha louhoe; neletao lah neletao sü Ramaiye hrai-a ngaolou bailai!”

40Südonou puletao nou puhvei chi sü poloure, alia puletao nou sei-atamai taoye kulouloua puletaoye sü dapeiwu-a ea Jisu zhih hinou hatalia paokhaiso tea tukhatsü peiwu-a puletaoye phapeire. 41Süthaisü puletao nou zhih süna vanou ahrao ngaozüe touyu sü Ramai nou choloure tea sasa-a tsümeye thaowu-a tare. 42Alia teithetsü Rathoki hinou ea ki ki hinou Jisu hai Khristae tea tobai soumoa puletao nou doupeia ea paodoua bue.

Currently Selected:

SEI-ATAMAI VAHTAO 5: POUMBSI

Highlight

Copy