1 JOHAN 4

Checheyu ea Madayu Rako

1Leshiyu Asakhemai, rako hrülaiye loucheso, ana rako sütaosü Ramai hinou vevemosa touyu sü zhuloure donou rakotaoye sü zhai zhukhaio. Daiolouzü madayu rachi paolamai alaosou deiphao hi veloure. 2Haibüyu vanou neletao nou Ramai vei Rakoho Rakomoe touyu sü süloulai süolouzü: Jisu Khrista hai vasou hilonou ve-e tea dua paopayu rako hrülaisü Ramai hinou ve-e. 3Ana Jisu vanou haisü dua paopa moyu rako hrülaisü Ramai hinou vemoe. Haisü Khristaye ngaobayu rakobaie, süsü velai tea süna vanou neletao nou chouloure, alia chuwo süsü deiphao hi velouloua bure.

4Ana Anah khe maitao, neletaowo Ramai hinou ve-e, alia puletaoye koloure, daiolouzü neletao lekhehi buyu Rako sünanou deiphao hi buyu rako süna jünou dukouhie. 5Puletao sü deiphao hinou ve-e, südonou puletao nou deiphao vei vanou chi paowe, alia deiphao mainou puletao chi keiwe daiolouzü puletaosü deiphao hinou ve. 6Ana Eletaowo Ramai hinou ve. Ramaiye süyu maitalinou Eh chi keipeiwe, alia Ramai hinou vemoyu maitalinou Eh chi keipei moe. Südonou hai vanou Eletao nou acheche vei Rako ea kao-zümoyu vei rakoye sü sükulouwe.

Ramai hai Leshi Nasüe

7Leshiyu sakhe maitao, Eletao alinou liye leshilou laikhe, daiolouzü leshi hai Ramai hinou ve. Maiye leshiyu puhsü Ramai hinou naloure ea Ramaiye süwe. 8Maiye leshi moyu puhsü Ramaiye sümoe, daiolouzü Ramaiwo leshina baie. 9Alia puh vanou Eletao hai hriloure donou Ramai nou puhvei likhuyu Nahpoutuye deiphao hi seikou peiwua, puh leshisü Eletao hi ngaopeiwure. 10Leshisü haire: haihai Ehnou Ramaiye leshiyu vanou moe, ana puhnou Eletaoye leshi peiyu vanoue ea Eletao mah khailu peiloure bo nasü souloure donou puh Nahpoutuye seive peire.

11Leshiyu sakhemaitao, Ramai nou haibüa Eletaoye leshi louzü, süthaisü Eletao-a alinou liye leshi züe. 12Maitalinoua Ramaiye ngaokhai mohie, ana Eletao nou alinou liye leshi louzü, Ramai sü Eletao hi tobai soumoa bue ea puh leshisü Eletao hinou southou lichewure.

13Hai vanou Eletao nou süvuzüe süolouzü Eletao sü puh hinou tobai soumoa bue ea puhsü Eletao hinou tobai soumoa bue, daiolouzü puhnou Eletao hi lah puhvei Rakosü peiwure. 14Alia Eletao nou ngaoloua zhopaoh souwe süolouzü Puo nou puhnah Poutuye deiphao vei khailu-apeio soupeire donou seive. 15Maitalinou Jisu hai Ramai Nahpoutue tea dua paopa louzü, Ramai nou puh hi tobai soumoa bue, alia puhsü Ramai hi tobai soumoa bue. 16Südonou Eletao nou Ramai nou Eletaoye donou leshi buyu nasü süwe ea louchewe.

Ramai hai leshina baie, alia leshi hinou tobai soumoa buyu puhsü Ramai hinou tobai soumoa bue, alia Ramai sü puh hi tobai soumoa bue. 17Eletao nou chikuyu Teitheki khuvei loure donou, leshi nasü Eletao hi southou liche peiwure; alia Eletao nou süsü ngaoloulai daiolouzü deiphao hainahi Eletao hrümai hai Khrista vei hrümai bübaie. 18Leshi hisü piyu hae; liche-a leshiyu sünanou piyu teiteiye sü hulaiwu baiwe. Südonou leshi hai pi-a buyu maitali hisü southou liche loumoe, daiolouzü piyu sü tudee ngaore bue.

19Eletao nou leshiwe daiolouzü puhnou Eletaoye rai-a leshipeie. 20Maitalinou, “E Ramaiye leshie,” tea paokhai-a, puh thaihou jüraiye ngaora louzü, puhsü madayu maibaie. Daiolouzü puhnou ngaoa buyu puh thaihou jüraiye leshi molouzü, puhnou ngaomoyu Ramaiye leshi louhoe. 21Khrista nou Eletao hi peikhai touyu chikha nasü haire; Ramaiye leshiyu maitalinou puh thaihou jüraiye-a leshi vuzülai.

Currently Selected:

1 JOHAN 4: POUMBSI

Highlight

Copy