1 JOHAN 5
5
Deiphaoye Eletao nou Veilouyu
1Jisu hai Khristae tea loucheyu mai hrülaisü Ramai nah-e, alia puoye leshiyu maitalinou puh nahye-a leshiwe. 2Eletao nou Ramaiye leshiyu ea puh chikhatao züa buyu vanou Eletao nou Eletao hai Ramai nahtaoye leshiwe touyu sü süwe. 3Daiolouzü Eletao nou Ramaiye leshiyu süvei kowo louzü puh chikhatao züyu süsüe. Alia puh chikhataohai Eletaoye donou tatei leyu süna moe, 4daiolouzü Ramai hinou nalouyu mai hrülainou deiphaoye koloue. Alia Eletao lü vanou Eletao nou deiphaoye kolouwe. 5Deiphaoye thaohnou kolousüe? Jisu hai Ramai Nahpoutue tea loucheyu mai süna likheinou kolousüe.
Jisu Khrista vanou Zhopaoh Souyu
6Jisu Khrista hai puhvei dzükhao dayu dzü ea puh athai vei zhe sünaye koa ve. Puhsü dzü likheiye koa vebai moe, ana dzü ea zhe ahaiye koa ve. Alia lah Rakonou-a haisü chekhaoe tea zhopaoh souwe, daiolouzü Rako hai cheche baie. 7Zhopaoh mai asü bue; 8Rako, dzü ea zhe sütaoe; alia haitao asünou kheihao-a zhopaoh souwe. 9Eletao nou emai vei zhopaohsü louchewe; ana Ramai vei zhopaoh nanou chihkou shohie, alia puhnou zhopaoh hainasü puhnah Poutu vanou peie. 10Südonou Ramai Nah Poutuye loucheyu mai talisü lah puh lekhehi zhopaoh hainasü bue; ana Ramaiye louche moyu mai talinou puhye sü dayumai soupeire, daiolouzü Ramai nou puhnah Poutuwo vanou paoyu sü puhnou louche peimoe. 11Alia zhopaoh nasü haire: Ramai nou Eletao hi teisa ahri peire, alia ahri hainasü puhnah Poutuwo hinou ve-e. 12Nah Poutuye polouyu puh hisü ahri haina bue; Ramainah Poutuye polou moyu maitali hisü ahri hae.
Teisa Ahri
13Neletao nou neletao hai teisa ahri bue touyu süloure donou Enou haisü Ramainah Poutu zhih hi louche-a buyu neletao hi rüwe. 14Eletao sü Ramai nghojünou khuvei-a bue, daiolouzü Eletao nou süvuzüe süolouzü puh leli thaifüa hatali Eletao nou puh hinou kholouzü puhnou Eletaoye keipeie. 15Eletao nou puh hi khoyutsü hisü puhnou Eletaoye keipeie; alia haisü cheche-e touyu sü Eletao nou sü-a buyu donou, Eletao nou puh hinou khoyu sü puhnou Eletao hi peie touyu süsü-a Eletao nou süwe.
16Ne thaihou jüraimai alinou thailou veiyu mah moyu mahli soua buyu sü nenou ngaolouzü, nenou Ramai hi veachi paopeilai, alia puhnou puh hi ahrisü peilai. Haisü thailou veiyu mah soumoyu puletaoye donou paobaie. Ana thailou veiyu mah bue, alia süvanou nenou Ramai hi veachi paolai tea Enou paomoe. 17Soumahyu teitei hai mah-e, ana thailou veiyu mah moyu-a bue.
18Eletao nou süwe süolouzü Ramai hinou nalouyu maitalinou mah soua bumoe; daiolouzü Ramai Nah Poutuwo nou puhye sü khotoupeia bue, alia ashi nanou puhye sü soushi louhoe.
19Eletao hai Ramai veie touyu sü Ehnou süwe, alia deiphao teiteiwo Ashinavei khakhe hinou bue.
20Eletao nou süwe süolouzü Ramai Nah Poutusü velou loure ea Eletao nou checheyu Ramaiye sü süloure donou Eletao hi süloure tsü nasü peiwure. Alia Eletao sü checheyu Ramai puhye koa buloure, süolouzü Puhnah Poutu Jisu Khristaye koa alisoua buloure. Puhsü checheyu Ramai ea teisa ahri nasüe.
21Leshiyu Anah khe maitao, neletao lahnou bashara hinou tarei talo!
Currently Selected:
1 JOHAN 5: POUMBSI
Highlight
Share
Copy
Want to have your highlights saved across all your devices? Sign up or sign in
Poumai Naga Bible - SHEEYU BAIBEL
Copyright © 2009 by The Bible Society of India
Used by permission. All rights reserved worldwide.
