ROM 2

Pathian rorêlna dik

1Aw mihring, tu pawh ni la, mi dang thiam loh chantîr thei i ni bîk hlei nêm, mi i thiam lohna ngei chu nang pawhin i ti ve tho si a, mahni leh mahni thiam loh inchantîr mai i ni. #Mt. 7:1; Lk. 6:37. 2Chutiang ti mite chu Pathianin thiam loh a chantîr chuan a tidik a ni tih kan hria; 3nangin i tih ṭhin ang tite i thiam loh si chuan, Pathianin a demna che chu pumpelh i inring em ni? 4A nih loh leh, simtîr che a duh avângin Pathian chuan ngilnei takin a nghâk ṭhîn che tih hre lovin, ṭhatna a ngahzia leh a dawhtheihzia leh a entheihzia chu i ngainêp em ni? #2 Pet. 3:11. 5I luhlul leh i thinlung khauh avângin thinurna ni, dik taka Pathianin ro a rêlna ni atân chuan mahni tân hremna chhêk khâwl lek i ni asin. 6Pathian chuan mi tin an thiltih ang zêlin a rêlsak dâwn si a. #Sam. 62:12; Thuf. 24:12; Mt. 16:27; 1 Kor. 3:8; 2 Kor. 5:10; Thup. 22:12. 7Ropuina te, chawimawina te leh boral theih lohna te zawnga thil ṭha ti fan fante chu chatuan nunna a pe ang; 8nimahsela, mahni hma chauh siala, thutak hnara, thil dik lo zâwm zâwkte chungah chuan Pathian thinurna leh thinrimna a lo thleng ang. 9Thil sual ti apiangte tân hrehawmna te, lungngaihna te a awm dâwn - Juda-te tân a awm phawt ang a, Grik mite tân pawh a awm ang; 10thil ṭha ti apiangte erawh chuan Pathian hnên aṭangin ropuina te, chawimawina te leh thlamuanna te an dawng ang. Juda-ten an dawng phawt ang a, Grik mite pawhin an dawng ang.

11Pathianin mi duhsak bîk a nei si lo va. #Deut. 10:17; 2 Chr. 19:7; Tirh. 10:34; Gal. 2:6; Efe. 6:9; 1 Pet. 1:7. 12Dân hnuaia awm loten thil sual an tih chuan Dân lovin an thi ang: Dân hnuaia awmten thil sual an tih chuan Dân angin an chungthu rêl a ni ang. 13Dân hriat vâng ni lovin, zawma zawm vâng zâwkin Pathian hmaah chuan thiam chan theih a ni. 14Jentail-te chuan Dân chu an hre ve lo na a, Dân thu tum chu an pianpui ze phung remzâwng a nih avângin an ti a, Dân chu an hnêna pêk ni ve lo mah se, Dân nei ang an ni. 15An chhia leh ṭha hriatnaah thiam inchantîr leh inchantîr loh nachâng an inhriat dân aṭang hian Dân thupêk chu an thinlungah a inziak a ni tih a lang. 16Pathianin Isua Krista hmanga mihringte thurûk a ngaihtuah ni-ah chuan Chanchin Ṭha ka hril ang hian a rêl dâwn a ni. #Thuh. 12:14.

Juda-te leh Dân

17A nih, nang, Juda mi i inti a; Dân chu i rinchhan a, Pathian chu i chhuang hle a: 18Pathian duhzâwng pawh i hria a. Dân i hriat avângin a chhia leh a ṭha pawh i hria a; 19mitdelte hruaitu, thima awmte tâna êng, 20mi mâwlte hruai fing theitu, naupangte#2:20 ‘Ring thar thil hre lo’ tihna a ni thei. zirtîrtu ber ni-ah i inngai ṭhîn; hriat tûr leh thutak zawng zawng chu Dân thu-ah hian a awm vek tih i ring a. 21Mi dang ka zirtîr e i ti a, engati nge mahni i inzirtîr si loh? Ru lo tûrin mi i zirtîr a, nangin i ru si maw? #Sam. 50:16-21; Mt. 23:3,4. 22Uire i khap a, nang i uire si em ni? Milem haw hle siin milem biakna Tempul i rawk duh si maw? 23Dân chu chhuang hle siin, Dân chu bawhchhiain Pathian i tihmingchhe ṭhîn maw? 24“Nangmahni avângin Pathian hming chu Jentail-te zîngah sawichhiat a ni,” tih ziak ang khân. #Isa. 52:5 (LXX); Ezek. 36:20.

25Dân zâwm la chu i serh tan pawh kha a sâwt hle tûr; Dân i bawhchhiat si chuan serh tan loh ang chiah i ni a. #Jer. 9:25. 26Serh tan lohvin Dân a zawm si chuan serh tan anga ngaih a ni dâwn lâwm ni? #Gal. 5:6; 1 Kor. 7:19; Tirh. 10:35. 27Nangnin serh in tan a, Dân thu ziak pawh in nei a; mahse, Dân thu chu in bawhchhe si, Jentail, tisa serh tan lohte chuan Dân thu chu an zâwm tlat zâwk si a, thiam loh an chantîr dâwn che u a ni. 28A lang maia Juda mi ni chu Juda mi tak tak a ni lo va, tisa maia serh tan chu serh tan tak tak a ni bawk hek lo; 29amaherawhchu, chhûng rila Juda mi ni chu Juda tak tak chu a ni a, serh tan tak tak pawh chu thinlung lamah a ni, lehkhaa ziak maiah ni lovin, thlarau lamah a ni zâwk. Chutiang mi chu mihringin chawimawi lo mah se, Pathianin a chawimawi ang. #Deut. 30:6; Kol. 2:11.

Currently Selected:

ROM 2: MIZCLBSI

Highlight

Copy