ROM 1

Chibai bûkna

1Paula, Isua Krista bawih, tirhkoh atâna koh, Pathian Chanchin Ṭha hril tûra tihhrana chuan: 2chu Chanchin Ṭha chu Pathianin a zâwlneite hmangin a lehkha thianghlimah a lo tiam tawh a. #2 Samu. 7:12. 3A Fapa, kan Lalpa Isua Krista thu chu tisa lam chhui chuan Davida thlaha piang a ni a, 4thianghlimna thlarau lamah erawh chuan; mitthi zîng ata ropui taka kaihthawh a nihna chuan Pathian Fapa a nihzia a tilang chiang a; 5amah avâng chuan Pathianin hnam tin zînga mite ringa awihtîr tûrin tirhkoh nihna chanvo min hlân a ni.#Gal. 2:9. 6Nangni pawh chutianga Krista mite ni tûra koh in ni si a.

7Pathianin a duh tak, a mi thianghlim ni tûra a koh Rom khuaa#1:7 Mss ṭhenkhatah ‘Rom khua,’ tih bîk hi a tel lo. mite chibai ka bûk a che u. Pathian kan Pa leh Lalpa Isua Krista hnên ata khawngaihna leh remna in hnênah awm rawh se.

Rom tlawh Paulan a châk thu

8Ringtu in nih thu ram tina a than tâk huai huai avângin Isua Krista zârah nangmahni avângin Pathian hnênah lâwmthu ka sawi hmasa a ni. #Rom. 16:19. 9Ka ṭawngṭainaahte chuan ka hre reng ṭhîn che u a, tih tak meuhva a Fapa Chanchin Ṭha rawng ka bâwl Pathian chu mi hriatpuitu a ni. 10A remtih zâwng a nih chuan tûn ṭumah tal ka rawn tlawh theihna tûr che uin Pathian ka dîl ṭhîn a ni. 11In ngheh lehzual nân thlarau lam thilpêk dawntîr tûr che uin hmuh che u ka chak êm êm a ni, 12kei leh nangni hi rinnaa kan inchâwm tawna, kan inṭanpui tawn theihna tûrin.

13Unaute u, rawn tlawh che u ka tum fo va; mahse, rem lohna a awm leh ṭhîn a ni tih in hriat ka duh a ni. Jentail dang zînga ka hmuh ṭhin angin in zîngah pawh rah hmuh ve ka beisei. #Tirh. 19:21; Rom. 15:24. 14Grik mite leh Awze mite, mi fing leh mi mâwlte hnênah bat ka nei a; 15chuvângin, a ni, nangni Rom khuaa awmte hnênah pawh Chanchin Ṭha hi hril ka châk êm êm ni.

Chanchin Ṭha thiltihtheihna

16Chanchin Ṭha hi ka zahpui si lo va, tu pawh a ring apiangte chhandam nâna Pathian thiltihtheihna a ni si a; Juda-te tân a ni phawt a, Jentail-te tân pawh a ni leh a.#1 Kor. 1:18,24; Mk. 8:38. 17Hetah hian rinna avâng chauhva Pathianin mi thiam a chantîr dân a lo lang ta a ni, “Rinna avânga thiam chang chu a nung ang,”#1:17 ‘Mi fel chu rinnain a nung ang,’ tih theih a ni bawk. tih ziak ang khân. #Hab. 2:4; Gal. 3:11; Heb. 10:38.

Mihringte sualna

18Vân ata Pathian thinurna chu mihring, an sakhaw ngaihsak lohna leh suahsualna avânga thutak dodâl tlattute chungah chuan a lo lang a ni. #Efe. 5:6; Kol. 3:6. 19Pathian chanchin hriat theih tûr chi chu mihringte hnênah a lang reng a, chu chu Pathian ngeiin a tihlan a ni. 20A nihna, mita hmuh theih loh, a chatuan thiltihtheihna leh a Pathianzia chu khawvêl siam tirh ata a thil siamahte chuan chiang taka hmuh theihin a lang a. Phatna tûr rêng an nei lo.#Sam. 19:1-4; Job. 12:7-9. 21Pathian zawng an hria a ni; Pathian ang erawh chuan an chawimawi lo va, lâwmthu pawh an hrilh hek lo; an ngaihtuahna a khawlo zo va, an rilru lawilo tak chu a thim zo ta a ni. #Efe. 4:17,18; Thup. 14:7. 22Fing an inti nâ a, an â hle si a ni. #Jer. 10:14. 23Thi thei lo Pathian ropuina chu thi thei mihring te, sava te, ke pali nei te leh rannung lim ang lekah an chantîr a. #Tirh. 17:18; Deut. 4:15-19; Sam. 106:20.

24Chuvângin, an thinlung châkzâwng thil bawlhhlawhte ti tûrin Pathianin a hawisan a, zahpuiawm takin an awm ta a ni. 25Pathian thutak aiin dâwt an thlang a, a siamtu chu biak aiin a siama chu biain a rawng an bâwl ta zâwk a. A siamtu chu chatuana fakin awm rawh se. Amen.

26Chûng avâng chuan a ni Pathianin zahthlâk taka an hur phalin a hawisan tâk ni; an hmeichhiate chu an awm dân phung pêlin an khawsa a; 27an mipate lah hmeichhe hman dân pangngai bânsanin, hurin an inît tawn a, mipa leh mipa mawi lo takin an khawsa a. Anmahni taksa ngeiah an sual rah chu an hmu a ni. #Lev. 18:22; 20:13,14.

28Tichuan, Pathian hriatna dik chu an thlah tâk avângin an ngaihtuahna khawlo tak anga awm tûrin Pathianin a hawisan a, an tih loh tawp tûr pawh an ti ta a ni. 29Dik lohna chi tinrêngin an lo khat ta a, sualna te, duhâmna te leh suahsualna te, îtsîkna te, tual thah te, in erna te, inbumna te leh inhuatna tein an khat a. 30An inrêl a, an insawichhia a, Pathian an hua#1:30 Mss ṭhenkhatah ‘Pathian huatzâwng an ni,’ tih a ni. a, an intivei a, an chapo va, an uang a, thil ṭha lo thar an chîng chhuak zêl a; an nu leh pate an zah lo va, 31pawisak an nei lo va, lainatna lah an nei hek lo. 32Chutiang thil titute chu Pathianin a ruat ang ngeia thi tlâk an ni tih hre reng chungin, an ti lui zêl a, a ti vete pawh an ngaisâng lehnghâl a ni.

Currently Selected:

ROM 1: MIZCLBSI

Highlight

Copy