ROM 15

Mahni ni lovin, mi dang tihlâwm

1Keini mi chak zâwkte hian mahni lâwmna zawng lovin, chak lo zâwkte chu an chak lohnaah kan ṭanpui tûr a ni. 2Intihsâwt tawn nân mahni vêngte tilâwmin an tâna ṭha tih i tum ṭheuh vang u. 3Krista pawhin mahni lâwmna a zawng si lo, “Nangmah chêksawlhtute chêksawlhna chu ka chungah a tla ta,” tih ziak ang khân a tuar zâwk a ni. #Sam. 69:9. 4Lehkha Thua lo ziak tawh rêng rêng chu min zirtîr tûra ziak a ni, thu ziak aṭanga chhelna leh thlamuanna kan dawn azâra beiseina kan neih theih nân. 5Tin, chhelna leh thlamuanna petu Pathian chuan, Krista Isua thu angin rilru hmunkhat puttîr che u sela, 6thinlung hmun khat pua thukhat vuain, kan Lalpa Isua Krista Pa leh Pathian chu in fak za thei dâwn nia.

Juda-te leh Jentail-te tân Chanchin Ṭha

7Pathian ropuina tûrin Krista chuan a lâwm che u ang khân inlâwm tawn rawh u. 8Ka hrilh a che u, Pathian rinawmzia tihchian nân thlahtute hnêna a thutiam hlenin, Krista chu serh tanho rawngbâwltuah a lo awm a. 9Jentail-te pawhin a khawngaihna avânga Pathian an chawimawi theihna tûrin:

“Tichuan, Jentail-te zîngah ka fak ang chia,

I hming fakin ka zai ang,”

tih ziak ang khân. #2 Samu. 22:50; Sam. 18:49.

10Hetiang hian a ti bawk,

“Jentail-te u, a mite nên lâwm rawh u.” #Deut. 32:43.

11Hetiang pawh hian a ti:

“Jentail zawng zawngte u,

Lalpa chu fak rawh u,

Ama mite zawng zawng pawhin fak rawh se.” #Sam. 117:1.

12Isaia pawhin heti hian a ti:

“Jesaia zung zâm chu a awm ang a,

Jentail-te lal tûrin a lo chhuak ang.

Amahah Jentail-te chuan an beiseina an nghat ang.” #Isa. 11:10 (LXX); Mt. 12:21.

13Thlarau Thianghlim thiltihtheihna azârah beiseinaa in khah theihna tûrin, beiseina hnâr Pathian chuan in rin avângin lâwmna leh thlamuanna tinrêngin vûr che u rawh se.

Paula tirhkoh a nih chhan

14Ka unaute u, nangniho hi ṭhatnaa khat, finna tinrêng ngaha, inzirtîr tawn thei tûr in nih ka ring tlat a; 15amaherawhchu, thil ṭhenkhat hriat nawntîr tûr che uin ka rawn ziak tho va. Jentail-te tâna thawk tûra Pathianin Krista rawngbâwl hna mi rawn hlan hi chhuangin ka ziak huai hle nghe nghe a. 16Jentail-te chu Thlarau Thianghlima Pathian hnêna lawm tlâka inthawina atân hlan tûrin Chanchin Ṭha hril hi ka puithiam hna a ni si a. 17Krista Isuaah chuan Pathian rawng ka bâwl hi ka chhuang hle a ni. 18,19Jentail-te awihtîr tûra thu leh thiltihte, chhinchhiahna leh thil mak tihtheihnate leh Thlarau Thianghlim thiltihtheihnatea Kristan keimah hmanga a thiltihte lo chu eng mah ka sawi ngam si lo. Jerusalem aṭangin Illurikon leh a chhehvêl thlengin Krista Chanchin Ṭha chu hmun tinah ka hril vek tawh.

20Mi dang lungphûm chunga rem chho ka nih loh nân, Krista la hriat lohna hmun apiangah Chanchin Ṭha puan hi ka duh dân a ni si a: #2 Kor. 10:15,16.

21“A chanchin la hril ngai lohnaa mite chuan

An hmu ang a,

La hre ngai lote chuan an hria ang,”

tih ziak ang khân hril ka tum zâwk ṭhîn a ni. #Isa. 52:15 (LXX).

Paulan Rom tlawh a tum dân

22Chuvâng chuan a ni, in hnêna lo kal ka ṭhulh leh ṭhin ni.#Rom. 1:13. 23Tûnah erawh chuan hêng lai ramah hian kalna tûr ka nei ta lo va; kum tam tak#15:23 Mss ṭhenkhatah, ‘tam tâwk tak,’ tih an ni. chhûng rawn tlawh che u ka châk tawh bawk nên; 24Spain ram kal pahin lo kal ka inbeisei a, nangni nên inpâwl kham tê tê ila, kal ka tumna lama mi thlah ka beisei bawk a ni. 25Tûnah tak hi chuan mi thianghlimho rawngbâwl tûrin Jerusalem khuaah ka kal rih dâwn. #1 Kor. 16:1-4; 2 Kor. 8:1-5; 9:2. 26Makedonia leh Akaia rama mite chuan phal takin Jerusalem khuaa mi thianghlimho zînga retheite tân thawhlâwm an thawh a. 27Phal taka ti an ni; amaherawhchu, an lakah bat an nei ve rêng a ni; Jentail-ten an thlarau lam thilte an ṭâwmpui chuan, khawvêl lam thilah anmahni chhawmdâwl ve thung âwm rêng an ni. #1 Kor. 9:11. 28Chu chu ka tiha, thawhlâwm chu an hnêna ka hlan fel hnuah, nangmahni tlawhin Spain ramah ka kal zêl ang. 29Tin, in hnêna ka lo kal hun chuan Krista malsâwmna famkim#15:29 Mss ṭhenkhatah, ‘Chanchin ṭha, zirtîrna,’ tihte a ni. nên ka lo kal ang tih ka hria. 30Unaute u, kan Lalpa Isua Krista leh Thlarau Thianghlim zâra in hmangaihnain Pathian hnêna mi ṭawngṭaipui ngat ngat tûrin ka ngên a che u. 31Judai rama ring lote laka ka him theih nân te, ka rawngbâwlna#15:31 Mss ṭhenkhatah, ‘Thilpêk’ tih a ni. hi Jerusalem-a mi thianghlimte tân thil lâwmawm tak a nih theih nân te, 32rilru hlim taka ka lo kal theiha, Pathianin rem a tih chuan kan intihharh tawn theih nân te mi ṭawngṭaisak rawh u. 33Remna Pathian chu in zaa hnênah awm rawh se. Amen.#15:33 Mss ṭhenkhatah, ‘Amen,’ tih a tel lo.

Currently Selected:

ROM 15: MIZCLBSI

Highlight

Copy