ROM 14

I unau sawisêl suh

1Rinnaa mi chak lo chu, a ngaih dân hnial tum kher lovin lâwm rawh. #Kol. 2:16. 2Mi pakhatin engkim ei hi thiangin a ring a, mi chak lo erawh chuan thlai chauh a ei a. 3Engkim ei mi chuan a ei lo chu hmusit suh se; a ei lo pawhin a ei mi chu sawisêl suh se, Pathianin ani chu a lâwm tho a ni. 4Mi dang chhiahhlawh lo sawisêltu chu tu nge maw i nih le? A din ngheh emaw, a tlûk emaw chu ama pu thu thu a ni. A ding nghet ngei ang; Lalpa#14:4 Mss ṭhenkhatah ‘Pathian’ tih a ni. chuan a din chhuahtîr thei si a. #Jak. 4:11.

5Tin, mi dangin ni khat hi ni dang aiin a ngaihlu bîk a, mi dangin ni zawng zawng hi inang ṭheuhvin a ngai thung a. Mi tinin mahni ngaih dân bulfûk mumal neih tûr a ni. 6Ni pakhat serh bîktu chuan Lalpa chawimawi nân a serh a ni; engkim eitu chuan, Pathian hnêna lâwmthu sawi zeta ei a nih avângin Lalpa chu a chawimawi a ni. Ei lama insûm mi pawh chuan Pathian hnêna lâwmthu a sawi tho avângin Lalpa chawimawi nân a ti a ni. 7Tu mah mahni tâna nung kan ni lo va, tu mah mahni tâna thi kan ni hek lo; 8kan nun chuan Lalpa tân kan nung a ni a, kan thih pawhin Lalpa tân kan thi a ni; chuvângin, kan nun pawhin, kan thih pawhin Lalpa ta kan ni. #1 Thes. 5:10. 9Tichuan, mi nung leh mitthi Lal a nih theih nân Krista chu a thi a, a nung leh ta#14:9 Mss ṭhenkhatah ‘a tholeh’ tih a tel. a ni. 10Engtizia nge nangin i unaupa i sawisêl mai? Engati nge nang pawh i unaupa chu i hmuhsit mai? Pathian rorêlna ṭhutthlêng hmaah chuan kan la ding ṭheuh dâwn asin:

11“Minunga chu ka ni,

Mi tinrêng ka hmaah an ṭhingṭhi ang a.

Lei tinrêngin Pathian ka nih an puang ang,’

Lalpan a ti,”

tih ziak a ni. #Isa. 45:23 (LXX). 12Tichuan, kan za-in Pathian hmaah mahni chanchin kan sawi ṭheuh dâwn a ni.

I unau titlu suh

13Tichuan, insawisêl chîng tawh suh u, tu pawhin mahni unau tlûkna tûr emaw, lungnihlohna tûr emaw siam loh tum zâwk rawh u. 14Lalpa Isuaah chuan thil rêng rêng amah ngawtah chuan thiang lo eng mah a awm lo tih ka hre chiang a ni; amaherawhchu, thil ṭhenkhat chu, thiang lova ngaitu tân chuan a thiang lo a ni mai.#Mt. 15:11; Tirh. 10:15. 15I englo ei avânga i unau rilru a nat chuan, hmangaihna kawng i zawh tawh lo va ni. A thih ai Kristan a thihsaka chhiatna chu i thil eiin thlen suh. #1 Kor. 8:11-13. 16Ṭha in tih zâwng chu mi sawichhiat lam chi ni suh se. 17Pathian ram chu ei leh in lam thu a ni si lo va, Thlarau Thianghlim zâra thiam channa te, remna te, lâwmna te a ni zâwk e. #Lk. 17:20. 18Chutianga Krista rawngbâwltu tawh phawt chu Pathian lâwmzâwng mi a ni a, mihring fak pawh a hlawh ṭhîn. 19Tichuan, inremna tûr leh intihsâwt tawnna tûr thilte chu i ûm ang u. 20I thil ei avângin Pathian hnathawh tichhe suh. Thil engkim ei hi thian zawng a thiang a ni; mahse, mi dang tlûk theihna thil ei erawh chu a ṭha lo. 21Sa ei te, zu in te, unau tlûk theihna tûr thil rêng rêng tih hi chîn loh a ṭha a ni. 22I rin dân chuan ring mai la, Pathian nêna in inkâr thu a ni. Mahni rin ang zâwng tia, inthiam lohna nei lo chu a nihlawh e. 23Inthiam lo chunga ei chuan thiam loh a chang reng tawh a ni; a rin dân anga ti a nih loh avângin. Eng pawh rinna lova tih chu sual a ni. #Tit. 1:15.

Currently Selected:

ROM 14: MIZCLBSI

Highlight

Copy