SAM 106
106
A mite tân Lalpa ṭhatna
1 Lalpa chu fak rawh u, Lalpa chu a ṭhat êm avângin lâwmthu hrilh rawh u,
Ngil a nei kumkhua si a. #1 Chr. 16:34; 2 Chr. 5:13; 7:3; Ezra 3:11; Sam. 105:5; 107:1; 136:1; Jer. 33:11.
2Tu nge Lalpa thiltih ropuizia hi sawi thei anga,
A fakawmzia hril sêng ang le?
3Eng lai pawha dik taka awma,
Thil ṭha ti ṭhînte chu an nihlawh e.
4 Lalpa, i mite chunga ṭhat i chhuah hunah min hre reng la,
I chhan chhuah hunah chuan min telh ve ngei ang che;
5I thlante nihlawhna hmua,
I hnam thlante lâwma ka hlimpui theih nân leh,
I rochanten an chhuan che anga
Ka chhuan ve theih nân che.
6Kan pute ang bawkin thil kan tisual a,
Kan khawlo va, kan sual a ni.
7Aigupta ramah khân kan pute chuan,
I thil mak tih an hrethiam duh lo va,
I ngilneih nasatzia pawh an hre duh lo,
Tuipui Sen kamah khân an hel tâk kha.#106:7 Heb. ‘tuipui kamah’ tih a tel. #Exod. 14:10-12.
8Mahse, i hming avângin i chawimawi a,
I thiltihtheihziate i hriattîr tho a ni.
9Tuipui Sen chu thu a pe a, a chat ta a,
A mite chu leichârah chuan a kal tlangtîr ta a. #Exod. 14:21-31. #Exod. 15:1-21.
10Anmahni hawtute kut ata chu a chhan chhuak a,
An hmêlmate kut ata ngei chu.
11Tui chuan an hmêlmate a chîm pil a,
Pakhat tê mah dam chhuak an awm loh kha.
12A mite chuan a thu an ring ta a,
A fak nân hla an sa.
13Mahse, a thiltihte an theihnghilh leh ta thuai a,
A remruat chu an ngaichâng duh leh ta lo.
14Thlalêrah an râwp ta êm êm a,
Ram rovah chuan Pathian an fiah ta a. #Num. 11:4-34.
15An dîl ngei chu a han pe a,
An râwp a tihrehsak ta a.#106:15 ‘natna râpthlâk tak a pe tel’ tih theih a ni.
16Mahse, Mosia leh mi thianghlim Arona chu,
An riahna hmunah chuan an îtsîk ta a.#Num. 16:1-35.
17Lei a khi chat phuk a.
Dathana chu a tla ta a,
Abirama pawh, a hote nên, an pil zo ta.
18An zîngah chuan mei a lo chhuak a,
Mi sualte chu an kâng hlum ta vek a.
19Horeb tlângah pawh khân bâwngno lem an din a,
An thil chhûn chu an be ta a.#Exod. 32:1-14.
20An ropuina#106:20 ‘anmahni tiropuitu’ tia ngaih theih a ni. Pathian chu
Hnim pet, bâwng ang lekah an chan ta a.
21Aigupta rama thil ropui tak tak titu,
An chhandamtu Pathian an theihnghilh ta.
22Aigupta ram chhûnga a thil mak tih te leh,
Tuipui Sena thil râpthlâk tak a tihte pawh.
23A mi thlan Mosia chuan,
A thinur tireh tûrin
An kâra bân pharin ngensak lo se chu
Tihboral vek a tum tâk kha.
24A thutiam chu an rin tâwk loh avângin,
Ram duhawm tak chu an ngainêp a. #Num. 14:1-35.
25An puan inah chuan an phunnawi a,
Lalpa aw chu an ngaithla duh ta lo.
26Bân phar meuhvin thu a tiam a,
“Thlalêrah in tlu hlum ang a,
27Ram dang daihah ka tidarh ang che u a,
Hnam dang zîngah in thlahte an thi ang,”
A ti ta hial a ni. #Lev. 26:33.
28Peor-ah khân Baal an bia a,
Milem pathian hnêna inthawina sa an ei ve ta.#106:28 Heb. ‘mitthi hnêna inthawina.’ #Num. 25:1-13.
29An thil tih chuan ani chu a tithinur a,
An zîngah chuan hripui a lêng ta a.
30Finehasa chu a tho va, ngaihdam a dîlsak a,
Hri chu a reh thei ta.
31Chu chu a thil tih ṭhaa ngaih a ni ta a,
Kumkhuaa ṭhangtharten an hriat zêl tûrin.
32Meriba tuiah Lalpa an tithinur leh a,
Anmahni avângin Mosia meuh pawh a buai ta a. #Num. 20:2-13; Exod. 17:1-7.
33Ani chu an tithinur a,
Thu hnu dâwn lovin a ṭawng ta a.
34 Lalpan tihlum tûra thu a pêk angin
Chûng rama awmte chu an tihlum duh lo. #Deut. 7:2,16.
35Chûngho nên chuan an inneih pawlh ta a.#106:35 Heb. ‘awm pawlh’
An tih dânte chu an zir ve ta zâwk a ni.
36An milemte an be ve ta a,
Thangah an âwk ta a ni. #Ro. 2:1-3; 3:5,6.
37An fanu te, an fapa te,
Ramhuai hnêna inthawi nân an hmang ta a.#2 Lal. 17:17.
38Pawi khawih lo thisen chhuah an chîng a,
Kanan mite milem hnênah thisen an hlân a,
An fanu te, an fapa te thisen chuan
Ram chu an tibawrhbâng zo ta. #Num. 35:33.
39An thiltih avâng chuan an bawlhhlawh zo ta a,
An thil chîn avâng chuan an uire zo ta a ni.
40A mite chungah Lalpa thin a thawk a,
A rochante chu a ten ta êm êm a. #Ro. 2:14-18.
41Hnam dang hnênah a pe a,
Anmahni hawtuten an chungah ro an rêl ta a,
42Hnam dangten an rap bet a,
An thuhnuaiah an kûn ta a ni.
43Vawi tam tak chu a chhan chhuak a,
Mahse, an hel lui zêl a,
An sualnaah chuan an pil ta a ni.
44Mahse, an han mangan meuh chuan a ngaihsak a,
An au thâwm chu a lo ngaithla ṭhîn.
45Anmahni avângin a thuthlung a hre reng a,
Ngil a neih êm avângin pawi a ti ṭhîn.
46Sala mantu zawng zawngte chu
Anmahni a khawngaihtîr fo ṭhîn.
47Aw Lalpa, kan Pathian, min chhan chhuak la,
Hnam dang zîng ata hi min hruai khâwm leh ang che.
I hming thianghlim kan fak ang a,
Ropui takin kan chawimawi bawk ang che.
48 Lalpa, Israel-te Pathian chu fak rawh u,
Chatuan chatuanin fak ula,
Mi zawng zawngin, ‘Amen,’ ti rawh se.
Lalpa chu fak rawh u. #1 Chr. 16:35,36.
BU V (107-150)
Currently Selected:
SAM 106: MIZCLBSI
Highlight
Share
Copy
Want to have your highlights saved across all your devices? Sign up or sign in
Mizo (Lushai) C.L. Bible - PATHIAN LEHKHABU THIANGHLIM
Copyright © 1995 by The Bible Society of India
Used by permission. All rights reserved worldwide.
