MARKA 9

1“Thu dik ka hrilh a che u, heta dingho ṭhenkhatte hi, Pathian ram thiltihtheihna nêna lo thleng an hmuh hma loh chu thi lo tûr an awm,” a ti bawk a. #Mk. 13:30; Mt. 10:23; Lk. 22:18.

Isua hmêl danglam

(Mt. 17:1-13; Lk. 9:28-36)

2Tin, ni ruk hnu chuan Isuan Petera te, Johana te leh Jakoba te chu tlâng sâng takah hruaiin anmahni chauh a chhohpui a; an hmaah chuan a hmêl lan dân a lo danglam ta a. #2 Pet. 1:17,18. 3A silhfênte pawh chu, leia puan su tu rêng rêngin an sûk vâr theih loh khawpin a lo vâr ta sur mai a. #Mt. 28:3. 4Elija leh Mosia chu an hnênah an rawn inlâr a, Isua nên an inbia a. 5Petera chuan Isua hnênah, “Rabi, heta kan awm hi a ṭha e; bâwktê pathum kan khawh ang e, i tân pakhat, Mosia tân pakhat, Elija tân pakhat,” a ti a. 6An hlauh êm avângin sawi tûr ahleih pawh an hre lo va ni. 7Tin, chhûm a lo zîng a, anniho chu a rawn khuh a, chhûm aṭang chuan aw a lo chhuak a, “Hei hi ka Fapa, ka Duhtaka chu a ni, ama thu hi ngai rawh u,” tiin. 8Tichuan, an han en vêl thuai a, an zîngah chuan Isua chauh lo chu tu mah dang an hmu ta lo va.#Mt. 3:17; Mk. 1:11; Lk. 3:22; Jn. 12:28,29.

9Tlâng ata chu an chhuk laiin Mihring Fapa chu mitthi zîng ata a thawhleh hma chuan an thil hmuhte chu tu mah hrilh hauh lo tûrin a ti a. 10Tichuan, chu thu chu an vawng reng a, ‘Mitthi zîng ata thawhleh,’ tih chu eng tihna ni ang maw tiin an sawi ho ṭhîn a. 11Anni chuan, “Engtizia nge Dân zirtîrtuten, ‘Elija a lo kal hmasa zet tûr a ni’ an tih le?” tiin Isua chu an zâwt a.#Mal. 4:5; Mt. 11:14. 12Ani chuan, “Elija chu engkim siam ṭha tûra lo kal hmasa rêng tûr alâwm. Engtizia nge Mihring Fapa hi thil tam tak tuara hmuhsitin a awm dâwn a ni tih ziak a nih si le?#Mk. 8:31; 9:31; 10:33. 13Nimahsela, ka hrilh a che u, Elija chu a lo kal tawh a, a chanchin ziak ang ngei khân a chungah an duh duhin an tih kha,” a ti a.

Ramhuai man naupang tihdam

(Mt. 17:14-20; Lk. 9:37-43)

14Tin, zirtîrte hnên an zu thleng a, an vêla mipui nasa tak chu an hmu a, Dân zirtîrtute nên an lo inhnial a. 15Amah an hmuh veleh mipui zawng zawng chuan mak an ti hle a; a hnên lamah an tlân a, chibai an bûk a.

16Ani chuan an hnênah, “Hêngho nên hian eng thu-ah nge in lo inhnial?” a ti a. 17Mipui zînga pakhat chuan a chhâng a, “Zirtîrtu, ka fapa, ramhuai ṭawngtheilo pai chu, i hnênah ka rawn hruai a; 18a man apiangin a paih tlu ṭhîn a; a chil phuante a tla a, a hâte a ṭhial a, a khawng tlat mai ṭhîn. I zirtîrte hi hnawt chhuak tûrin ka ti a, an thei si lo,” a ti a. 19Ani chuan a chhâng a, “Ṭhangthar, rinna tlachhamte u, eng chen nge in hnêna ka awm anga, eng chen nge ka dawh theih dâwn che u? Ka hnênah han hruai teh u,” a ti a. 20A hnênah chuan an hruai a, ramhuai bawlhhlawh chuan Isua a hmuh veleh naupang chu a sawisa ta nghâl a; tichuan, leiah a tlu a, chilphuan tla zawih zawihin a tâl ta awrh awrh mai a. 21A pa chu, “Eng chen nge hetianga a awm tawh?” tiin a zâwt a. Ani chuan, “A naupan têt ata a ni. 22Meiah te, tuiah te amah tiboral tûrin a nam thlu fo ṭhîn; nimahsela, nangin engtin emaw tal i tih theih chuan khawngaih takin mi pui ang che,” a ti a.

23Isua chuan a hnênah, “I theih chuan â maw! Ringtu tân chuan engkim hi tih theih asin,” a ti a. #Mt. 17:20; Mk. 11:22-24; Lk. 17:6. 24Naupang pa chuan,#9:24 Mss ṭhenkhatah ‘ṭap chungin tih’ a tel. “Ka ring e. Rinna ka tlâkchham avâng hian min pui ang che,” tiin a au chhuak ta nghâl a. 25Mipui an lo tlân khâwm tup tup chu a hmuhin Isua chuan ramhuai bawlhhlawh chu a hau va, “Nang, ramhuai ṭawngtheilo leh bengngawng, thu ka pe a che, a chhûng ata kha lo chhuak la, lût leh tawh suh,” a ti a. 26Ramhuai chu a au chhuak a, a nghaisak nek hnuin a lo chhuak ta a. Naupang chu thi ang maiin a awm a, mi tam tak phei chuan, “A thi ta a ni,” an ti hial a. 27Isua erawh chuan a kut a chelh a, a kai tho va, a lo ding chhuak ta mai a.

28Isua chu inah a lût a, a zirtîrten, “Engati nge keinin kan hnawh chhuah theih loh le?” tiin a fâlin an zâwt a. 29Ani chuan, “Hetiang hi zawng ṭawngṭaina#9:29 Mss ṭhenkhatah ‘leh chaw nghei’ tih a tel. chauh lo chuan engti dang mahin a hnawh chhuah theih loh,” a ti a.

Isuan a thih tûr thu a sawi leh

(Mt. 17:22,23; Lk. 9:43-45)

30Tin, chuta ta chu an chhuak a, Galili ram chu an kal tlang a; chu chu tu ma hriat a duh lo, 31a zirtîrte chu thil zirtîr a nei a ni; an hnênah chuan, “Mihring Fapa hi mihringte kutah mantîr a ni dâwn a, an tihlum ang; mahse, an tihhlum hnu ni thum chinah a tho leh ang,” a ti a. #Mk. 8:31; 10:33. 32Anni chuan a thu sawi chu a ngaihna an hre lo va, amah lah chu an zâwt ngam bawk si lo. #Jn. 12:16.

Tu nge ropui ber?

(Mt. 18:1-5; Lk. 9:46-48)

33Kapernaum chu an lo thleng a, in chhûnga a luh hnu chuan an hnênah, “Kalkawngah khân eng thu-ah nge in inhnial le?” tiin a zâwt a. 34Kawngah chuan, ‘kan zîngah tu nge ropui ber ang?’ tia an lo inhnial avâng khân an ngawi ta reng hlawm a. #Lk. 22:24. 35Ani chu a ṭhu tê tê a, Sâwmpahnihte chu a ko va, an hnênah, “Tu pawh hmasa ber nih duh chu hnuhnûng berah an awm tûr a ni, mi zawng zawng rawngbâwltuah an awm bawk tûr a ni,” a ti a. #Mt. 20:26,27; 23:11; Mk. 10:43,44; Lk. 22:26. 36Naupang tê a kai a, an zîngah chuan a dintîr, a kuangkuah a, an hnênah, #Mk. 10:16. 37“Tu pawh ka hming avânga hetiang naupang tê pakhat pawh lâwm chu kei mi lâwm an ni; tu pawh kei mi lâwm chu kei mi lâwm ni lovin mi tîrtu lâwm an ni zâwk,” a ti a. #Mt. 10:40; Lk. 10:16; Jn. 12:44; 13:20.

Min dodâl lo chu kan lamṭang an ni

(Lk. 9:49,50)

38Johana chuan, “Zirtîrtu, tu emaw i hminga ramhuaite hnawt chhuak kan hmu a, kan zînga a zui ve loh che avângin khap kan lo tum asin,” tiin a han hrilh a. #Lk. 11:23; Mt. 12:30; Num. 11:27-29. 39Isua erawh chuan, “Khap suh u, tu mah ka hminga thil mak ti si-a mi rêl zui nghâl thei an awm lo. 40Min dodâl lo chu kan lamṭang an ni ngai e. 41Thu dik ka hrilh a che u, Krista mi in nih avânga tui in tûr no khat pe apiang che u chuan an lâwm man tûr an chân tawp lo vang. #Mt. 10:42.

Sual ti tûra thlêmna

(Mt. 18:6-9; Lk. 17:1,2)

42“Tu pawh hêng ringtu zînga tê ber pakhat pawh titlu chu, an nghâwngah chhangphut râwtna lung lian pui awrhtîrin tuifinriatah thlâk ni se an tân a ṭha zâwk ang. 43I kutin a tihtlûk che chuan tân mai rawh, kut pahnih neia Gehena mei mit thei lova kal ai chuan piangsuala nunnaa luh i tân a ṭha zâwk.#9:43 Mss ṭhenkhatah châng 44 leh 46 belh a ni hetiangin ‘chuta thil lung awmte chu a thi ngai lo va, mei pawh a’ mit ngai lo, tih a ni. #Mt. 5:30. 45I ke pawhin a tihtlûk che chuan tân mai rawh, ke pahnih neia Gehena-a paih nih ai chuan ke bûla nunnaa luh i tân a ṭha zâwk e. 47I mit pawhin a tihtlûk che chuan kher chhuak mai rawh, mit khing hnih neia, #Mt. 5:29. 48thil lungin a kher rengna hmun leh meiin a kan rengna hmun Gehena-a paih nih ai chuan, mit khing dela Pathian rama luh chu i tân a ṭha zâwk e.#Isa. 66:24. 49Mi tin meia tih thianghlim an ni dâwn si a. 50Chi hi a ṭha e; nimahsela, chi pawh hi da ta se, engin nge in tihal leh ang? Nangmahni ngeiah chi nei ula; tichuan, inngeih dial dial rawh u,” a ti a. #Mt. 5:13; Lk. 14:34,35; Kol. 4:6; 1 Thes. 5:13.

Currently Selected:

MARKA 9: MIZCLBSI

Highlight

Copy