TIRHKOHTE 21

Paulan Jerusalem a tlawh

1Kan inthlah fel hnu chuan lawngin kan chhuak a, ngîl takin Kaw thliarkâr kan thleng a, a tûkah Rodo thliarkâr kan thleng a, chuta ṭang chuan Patara khua kan thleng a. 2Foiniki rama kal tûr lawng pakhat kan hmu a, kan chuang a, kan kal leh ta a. 3Kupra thliarkâr kan hmu a, vei lamah kan pêl a. Suria ram panin Tura khua kan thleng a, chutah chuan lawng bungrua thiar chhuah tûr a ni. 4Zirtîrhote kan zawng chhuak a, an hnênah ni sarih kan châm a, anni chuan Thlarauvin a hrilh anga Paula chu Jerusalem-a kal lo tûrin an ti a. #Tirh. 11:12; 20:23. 5Nimahsela, chûng zawhah chuan kan chhuak a, kan kal chu zirtîrte chuan an vaiin, an nupui fanaute nên kawtchhuah thlengin min thlah a, tuipui kamah chuan kan ṭhingṭhi a, kan ṭawngṭai a. 6Chibai kan inbûk a, lawngah kan chuang a, anni chu in lamah an haw leh ta a.

7Tura aṭang chuan lawngin Tolemai khua kan thleng a, unaute chibai kan bûk a, an hnênah ni khat kan châm a. 8A tûkah kan chhuak leh a, Kaisari khua kan thleng a, Chanchin Ṭha hriltu Filipa inah kan lût a; ani chu upa pasarihte zînga mi kha a ni. A inah kan thleng ta a. #Tirh. 6:8; 8:5. 9Fanu, nula thianghlim pali a nei a, Pathian thu an hril ṭhîn a. 10Ni rei tak kan châm a, kan châm chhûng chuan Judai ram aṭangin zâwlnei pakhat Agaba a lo chhuk a. #Tirh. 11:28. 11Kan hnênah a lo kal a, Paula kâwnghrên chu a la a, a ke leh a kut a inphuar a, “Jerusalem-a Juda-ten hetiang hian he kâwnghrên neitu hi an phuar ang a, Jentail-te kutah an pe ang, Thlarau Thianghlimin a ti a ni,” a ti a.

12Chûng thu chu kan hriatin keini leh chu khuaa mite chuan Paula chu Jerusalem-a kal lo tûrin kan ngên chiam a. 13Paula chuan, “Engtizia nge in ṭah in ṭaha, mi tihlungchhiata mi tihzâm in tum? Lalpa Isua hming avâng chuan Jerusalem-a phuar chang ka huam hlei nêm, thih pawh ka huam asin,” tiin min chhâng a. 14Thlêm thlûk rual a nih loh ahnu chuan, ‘Lalpa thu thu ni rawh se,’ kan ti a, kan bâng ta a.

15Chûng hnuah chuan kan insiam a, Jerusalem-ah kan chho ta a. 16Kaisari khuaa zirtîr ṭhenkhatten min zui a, kan thlenna tûr Nasona inah min hruai a; ani chu Kupra thliarkâra zirtîr hmasate zînga mi a ni.

Paulan Jakoba a tlawh

17Jerusalem kan thlen chuan unauten hlim takin min lo lâwm a. 18A tûkah chuan Paula hovin Jakoba hnênah kan lêng a. Kohhran upa zawng zawng pawh an lo awm a. 19Paulan anni chu chibai a bûk zawhin a rawngbâwlna hmanga Pathianin Jentail-te zînga thil a tih apiang chu kimchang takin a hrilh a. 20Unaute chuan chûng thu chu an hriatin Pathian an fak a. Paula hnênah chuan, “Unaupa, Juda-te zîngah ringtu an tam tâkzia i hmu a, kan Dân ngaina tak vek an ni si a. 21Nangin Jentail-te zînga Juda awm zawng zawng chu Mosia Dân bânsana, an fate serh tan lo tûr leh Juda-te dân zâwm lo tûrin i zirtîr ṭhîn tih mi sawi an hria a ni. #Tirh. 16:3. 22Engtin nge ni ta ang le? I lo thleng tih an hre ngei dâwn si a. 23Tichuan, i hnênah kan sawi ang hian ti ta che: Thutiam nei lai kan zîngah mipa pali an awm a. #Num. 6:13-26; Tirh. 18:18. 24Chûng mite chu hruai la, an zîngah inthian ve la, lu an meh man tumsak rawh; tichuan, mi zawng zawngin i chanchin an hriat hi dâwt a ni a, nangmah ngei pawh Dân zâwmin Dân ang takin i la awm zêl zâwk a ni tih an hre dâwn nia. 25Jentail-te zînga ringtute chungchâng thu zawng, milem biakna thil ei lo tûr te, sa thisen ei lo tûr te, sa reh hlum sa ei lo tûr te leh, inngaih bânsan tûra kan thu rêlte kan thawn kha,” an ti a. #Tirh. 15:29.

26Tichuan, a tûkah Paulan chu mite chu a hruai a, an rual chuan a inthian ve ta a. Tin, Tempulah a lût a, an inthen zawh hun tûr ni leh an hming kima inthawina a hlansak hun tûr ni puithiam a hriattîr a. #Tirh. 6:13; Ezek. 44:7.

Tempulah Paula an man

27Ni sarih a tlin dâwn ruaiin Asia rama Juda-ten Paula chu Tempulah an hmu a. Mipui zawng zawng an fuihpawrh a, Paula chu an man ta a. 28“Israel mite u, min pui rawh u. He mi hi kan chi te, kan Dân te leh he hmun kalh zâwnga ram tina mi zawng zawng zirtîr ṭhîna kha a nih hi, tûnah pawh Tempulah hian Grik mite a luhpui a, he Hmun Thianghlim hi a tibawlhhlawh a ni,” an ti a. 29Efesi khaw mi Trofima chu khawpuiah amah nên an hmuh hmasak tawh avângin, Paulan ani chu Tempulah a hruai lût emaw an ti a ni. #Tirh. 20:4. 30A khuain an buai zo ta a, mipui an lo tlân khâwm tup tup a; Paula chu an man a, Tempul ata an hnûk chhuak a, kawngte an khâr ta nghâl a. 31Ani chu thah an tum lai chuan Jerusalem khaw pum a buai tih sipai hotu lalberin a lo hria a. 32Ani chu sipaite leh sipai za hotute hruaiin an zîngah a tlân thla a. Mipui chuan sipai hotu lalber leh sipaite chu an hmuh veleh Paula vuak an bâng ta a. 33Sipai hotu lalber chuan a rawn hnaih a, Paula chu a man a, khaidiat pahnihin a hlintîr a, tu nge a niha, eng nge a tih a zâwt a. 34Mipui zînga a ṭhen thu khatin an au va, a ṭhen thu dangin an au bawk si a, buai avâng chuan a eng mah chu a hre chiang thei ta lo va; kulhbîng chhûngah a hruaitîr ta a. 35Kailâwn an thlen chuan mipuiin an bawh nasat êm avângin Paula chu sipaiten an chawi kâng a. 36Mipui tam takin, “Tiboral rawh u,” tia auvin an zui hum hum si a. #Lk. 23:18.

Paulan a thiam thu a sawi

37Kulhbînga an hruai luh dâwn lai chuan Paulan sipai hotu lalber hnênah, “I hnênah thu kam khat ka sawi thei ang em?” a ti a. Ani chuan, “Grik ṭawng i thiam a ni maw? 38Chuti chu, Aigupta mi pakhat hmân deuhva helna chawk chhuaka mi thah chîng sângli rual thlalêra hruai chhuaktu kha i ni lo maw?” a ti a. #Tirh. 8:36. 39Paula chuan, “Kei zawng, Juda mi, Kilikia rama Tarsa khaw mi ka ni, khaw narâna mi ka ni lo; khawngaih takin mipui hnênah hian thu mi sawitîr rawh,” a ti a. 40A remtih veleh Paula chu kailâwnah chuan a ding a, mipui chu ngawi tûrin a kutin a zâp a, an ngawi ta ṭhuap a, Hebrai ṭawngin thu a sawi ta a.

Currently Selected:

TIRHKOHTE 21: MIZCLBSI

Highlight

Copy