TIRHKOHTE 20

Makedonia leh Grik rama Paula zin thu

1Buai chu a reh hnuin Paulan zirtîrte a ko khâwm a, a fuih a, chibai a bûk a, Makedonia rama kal tûrin a chhuak ta a. 2Chu ram chu a fang chhuak a, zirtîrhote chu nasa taka a fuih zawhin Grik ram a thleng ta a. 3Thla thum a thang hnu chuan Suria ram lama lawnga haw an tum a; nimahsela, Juda-ten thah an tum avângin Makedonia ram tlawh kual zâwnga haw a tum leh ta zâwk a. 4Pura fapa Sopatera, Beroia khaw mi te, Thesalonika khaw mi Aristarka leh Sekunda te, Derbe khaw mi Gaia te, Timothea te, Asia rama mi Tukika te leh Trofima ten an zui a. 5Chûngho chu an kal hmasa a, Troas khuaah min lo nghâk a. 6Keini pawh Chhang dawidim telh loh Kût zawhah chuan Filipi khua aṭangin lawngin kan chhuak a, ni nga hnuah Troas kan thleng ve a, chutah chuan ni sarih kan châm a.

Paulan Troas khua a tlawh hnuhnûn

7Pathiannia chhang phel tûra kan inkhâwmin, Paula chuan a tûka kal a tum avângin an hnênah thu a sawi a, zanlai thlengin a sawi a. #1 Kor. 16:2. 8In chhâwnga pindan kan inkhâwmnaah chuan khâwnvâr tam tak a awm a. 9Tlangvâl pakhat, Eutuka an tih chu, tukverhah a ṭhu a, Paulan thu a sawi rei tâk êm avângin a mut a chhuak ta hle a, a muthlu a muthlu a; in chhâwng thumna aṭang chuan a tla ta a, thi-in an chhar a. 10Paula chu a tlân thla a, a bawh a, a pawm a, “Thlaphâng teh suh u, a la nung e,” a ti a. #1 Lal. 17:21. 11An kal chho leh a, chhang an phel a, a ei a, rei tak, khawvâr thleng zakin thukhawchâng a sawipui a; tichuan, a kal chhuak ta a. 12Tlangvâl chu damin in lamah an hruai hâwng a, an thlamuang ta êm êm a.

Troas aṭanga Mileto pana zinna

13Keini chu Asso khaw panin lawngin kan lo kal hmasa a, Paula chuan kea lo kal a tum avângin Asso khuaah lawnga lo chuantîr kan tum a, chu chu ama remruat dân a ni. 14Asso khuaa min rawn fin chuan lawngah a lo chuang ve a, Mitulene khua kan thleng a. 15Chuta ṭang chuan lawngin kan kal leh a, a tûkah Kio thliarkâr zâwn kan thleng a, a tûk lehah Samo thliarkâr kan lût a, a tûk lehah chuan Mileto khua kan thleng ta a. 16Paulan Asia rama a awm rei loh nân Efesi chu lawnga kal pelh a tum a, a theih chuan Jerusalem-ah Pentikos Kût hman a tum a, a kal hmanhmawh deuh a ni.

Efesi upate hnêna Paula thu sawi

17Mileto aṭang chuan Efesi-ah mi a tîr a, kohhran upate a kohtîr a. 18An lo thlen chuan an hnênah, “Asia ram ka luh tirh ni aṭangin in hnêna ka awm chhûng zawnga ka awm dân kha in hria e. 19Juda-ten mi phiar avânga hrehawm mi delhtu phur chungin, thuhnuairawlh tak leh mittui nên Lalpa rawng ka bâwl ṭhin kha. 20In tâna sâwt tûr chu eng mah zêp lovin, vântlâng zîngah leh inahte ka hrilh ṭhîn che u a, ka zirtîr bawk ṭhin che u kha. 21Juda-te leh Grik-te hnênah pawh, sima Pathian lam hawi tûr leh kan Lalpa Isua ring tûrin urhsûn takin thu ka hril ṭhîn. 22Tûnah hian hre rawh u; Thlarauvin mi tirh tlat avângin Jerusalem-ah ka kal dâwn a, chutah chuan ka chunga thil lo thleng tûr chin ka hre lo ve.#Tirh. 19:21. 23Amaherawhchu, Thlarau Thianghlimin lung in tân leh hrehawm tuar ka hmabâk tih chauh khaw tinah mi hrilh ṭhîn. 24Lalpa Isua hnên ata ka hmuh rawngbâwl hna thawh tûr ka hmabâk, Pathian khawngaihna Chanchin Ṭha puan darh tûr hi ka hlen theih phawt chuan, ka nun pawh hi thlâkhlelh tûrah ka ngai lo. #1 Tim. 4:7.

25Tûnah hian hre rawh u, nangni zawng zawng, Pathian ram thu hrila ka vah ka vah ṭhinnate hian ka hmêl in hmu leh tawh lo vang tih ka hria e. 26Chuvângin, mi zawng zawng thisenah ka fihlîm tih vawiin hian ka hriattîr a che u.#Tirh. 18:6. 27Pathian remruat dân zawng zawng eng mah zêp lovin ka hrilh vek tawh che u kha. 28Pathian kohhran, ama tâna thisena a lei chu châwm tûrin nangmahni leh in berâmte tân fîmkhur rawh u; Thlarau Thianghlimin an chunga hotu-ah a dah che u hi. 29Ka kal hnuin chinghne kawlhte in zîngah an lo lût ang a, berâmte chu an zuah lo vang tih ka hria.#Mt. 7:15. 30Nangni zînga mi ngei pawh hi zirtîrhote mahni lama ṭantîr tumin thu hran sawi in la awm ang. #1 Jn. 2:19; Gal. 4:17. 31Chuvângin, invêng ngun rawh u, kum thum meuh a chhûn a zâna mittui nên mi tin ka zilh ṭhin che u kha hre reng rawh u. 32Tûnah hian Pathian hnênah leh a khawngaihna thu-ah ka hlân a che u; chu chuan a tipuitling thei che u a, mi thianghlimte zîngah rochan a neihtîr thei bawk ang che u. #Deut. 33:3. 33Tu ma tangka emaw, rangkachak emaw, silhfên emaw ka awh ngai loh kha.#1 Kor. 9:12; 1 Samu. 12:3. 34Hêng kutte hian keimah leh ka ṭhiante mamawh a thawh chhuah ṭhin kha nangmahni ngeiin in hria e. #Tirh. 18:3; 1 Thes. 2:9. 35Chutianga thawkrimin mi chak lote in ṭanpui tûr a ni tih kawng engkimah ka tihhmuh ṭhin che u kha; kan Lalpa ngeiin, ‘Lâk aiin pêk a hlâwk zâwk,’ a tih kha hre reng rawh u,” a ti a.

36Chûng thu a sawi zawh chuan an za-in a ṭhingṭhitpui a, an ṭawngṭai a. 37An vaiin an ṭap ta a, Paula nghâwngah an kuah a, an fâwp ngawih ngawih a.#Mk. 14:45; Rom. 16:16. 38An lung tichhetu ber chu a hmêl an hmuh leh tawh loh tûr thu a sawi chu a ni. Tichuan, lawng thlengin amah chu an thlah ta a.

Currently Selected:

TIRHKOHTE 20: MIZCLBSI

Highlight

Copy