Kusintii Andunya 50
50
Kusii Zakɔbu
1Waati iyi Zakɔbu í ku gbakã ŋɔi Zozɛfu í koo wa kpata, wa cɔ̃ɔcɔ̃ɔɛ nɔ cikãajuɛ ŋau wa tontoo si wajui ikui baaɛu. 2-3Si anyiɛ nɔ í kpe lokotoo ŋa iyi à waa ceaa icɛu í ni a teese arai baai nŋu ku ba ku maà sãmi. Nɔ lokotoo ŋau à ce ajɔ ciiji à ya maa jɔsi arau iwɔ si bɛi í jɛ dɔ̃ɔnɛ nŋa. Nɔ inɛi Ezibiti ŋau à ce akũi Zakɔbu ajɔ kitaò fɛɛwa.
4Waati iyi akũi Izirɛliu í tã, ŋɔi Zozɛfu í koo í sɔ̃ inɛi kpasɛ̃i Faraɔ̃ ŋa í ni, bii í jɛ ì nɛ kubim ŋai, ǹ wa n tɔɔ ŋɛ, i koo i sɔ̃ Faraɔ̃ 5i ni hai waati iyi baam kù ku í sɔ̃m í ni bii nŋu í na í ku n so ikui nŋu n koo n suu ilɛi Kanaã si balɛ iyi nŋu takai nŋu í teese. Í nɔ í sɔ̃m í ni n gbasi ntɔ ntɔ. Amu mɔ ǹ nɔ ǹ gbasi ǹ ni an coo. Na nŋu, ǹ wa n bi n koo n koo n si baam nɔu nɔ n nyi wa.
6Iyi Faraɔ̃ í gbɔ ideu, ŋɔi í jɛsi Zozɛfu ku koo koo si baaɛu si bɛi í jɛsi í ni nŋu á coo. 7Nɔ Zozɛfu í dasi kpãa wa bɔ baaɛ ku si. Ŋɔi akawei Faraɔ̃ ŋau fei à waa suu, do inɛ ngboi ilɛi Ezibiti ŋau fei, 8do nyaanzei nŋu takaɛ ŋa do igbãɛ ŋa do ifɔɛ, do nyaanzei baaɛ ŋau má. Ama keeke ŋa aŋa akãi à gbe si ilɛi Gosɛniu do mɛɛmu ŋa. 9Ilu sarɛti gɔ ŋa do masa gɔ ŋa mɔ à si Zozɛfu waati iyi wa koou, nɔ zamaau í la hee í caa.
10Iyi à to bii à ya kpokpo iyau si ilui Atadi do icei idoi Zuudɛ̃ɛu, nɔ à kpata akũu bɛ má ntɔ ntɔ. Nɔ tengi bɛ Zozɛfu í nyi í buba ajɔ mɛɛje í kpata na ikui baaɛu má. 11Iyi inɛi Kanaã ŋa à yɛ bɛi inɛ ŋau à wasi ku kpata ŋɔi à ni, inɛ nla gɔ í ku si inɔi inɛi Ezibiti ŋa. Na ŋɔi í jɔ̀ à sɔ inyau Abɛli-Misiraimu#50:11 Abɛli-Misiraimu Bii ì gbɔ iriu, í ya jɔ bɛi à waa ni, kukpatai inɛi Ezibiti ŋa do feei Ebɛɛ..
12Bɛɛbɛi amai Izirɛli ŋau à ce bɛi baa nŋa í sɔ̃ ŋau dee dee. 13À soo à nɛɛ ilɛi Kanaã, à koo à suu si isai kuta iyi í wa Makpela kɔkɔi Mareeu si iko iyi Aburahamu í ra hai bi Eforɔ̃ɔ inɛi Hɛtiu í jɛ bi ku si ikuɛ ŋa.
14Iyi Zozɛfu í si baaɛu í tã nɔ í sinda í nyi Ezibiti, nŋu do igbãɛ ŋa do ifɔɛ do inɛ ŋa iyi à suu wau fei.
Zozɛfu í tũ idɔi igbãɛ ŋa
15Si anyii ikui Zakɔbu igbãi Zozɛfu ŋau à wasi ku fɔ aŋa duusɔ̃ɔ à ni, Zozɛfu á yɔkɔ ku sinda si wa nɔ ku ce nwa laalɔ ŋa iyi à tako à ceaa wo fei. 16Nɔ à bɛ ama à ni koo sɔ̃ Zozɛfu ku ni, hee baaɛ ku maa ku í sɔ̃ wa idei ankãanyiu ihɛ̃ í ni 17a sɔ̃ɛ idei nŋu. Í ni nŋu wa tɔɔɛ suuru i kpa idei kurarai awa igbãɛ ŋau do dulum du wa, domi à ceɛ laalɔ. Na nŋu nsɛi, kpa idei kurara nwau, awa iyi à waa tɔɔ Ilaaɔ̃ akã do baaɛ.
Iyi Zozɛfu í gbɔ ideu ŋɔi wa kpata. 18Si anyiɛ nɔ igbãɛ ŋau aŋa taka nŋa à koo à baa à gulɛ si wajuɛ nɔ à ni, à jɛ aruɛ ŋa.
19Amma Zozɛfu í jɛ nŋa í ni, i maà ce njo ŋa. N kaa n jilɛ aram si agbɛi Ilaaɔ̃. 20Iŋɛ ì bi i ceem laalɔ ŋa, amma Ilaaɔ̃ í kpaasi laalɔu í baa í jɛ jiida. Í ce bɛɛbɛi ku ba ku faaba kuwɛɛi zamaa nkpɔ nkpɔ bɛi ì waa yɔɔ nnyi ŋa. 21I maà ce njo kãma ŋa. Amui an maa n cɔ baani nŋɛ do ama nŋɛ ŋa fei.
Do ide didɔ̃ ŋau bɛi í tũò idɔ nŋa í mu nŋa gbugbã.
Ikui Zozɛfu
22Si bɛɛbɛi Zozɛfu do inɛɛ ŋau à wa Ezibiti. Jiai adɔ̃i Zozɛfu si kuwɛɛɛ fei í dedei adɔ̃ cĩɔ do mɛɛwa (110). 23Nɔ í yɛ amai Efaraimu ŋa hee ku koo si tɔku gbɛɛtasia. Nɔ amu ŋa mɔ iyi à jɛ amai Makii tɔkuɛ í so ŋa à jɛ bɛi amaɛ ŋa. Makiiu amai Manaseei wa jɛ.
24Ajɔ nŋu gɔ Zozɛfu í sɔ̃ igbãɛ ŋau í ni, ǹ maai ku ku. Amma Ilaaɔ̃i á maa cɔ ŋɛ. Á na ku nya ŋɛ hai ilɛi Ezibitiu ihɛ̃ nɔ ku bɔò ŋɛ si ilɛ iyi í wãò Aburahamu do Izaaki do Zakɔbu. 25Ǹ wa n tɔɔ ŋɛ i gbasi do irii Ilaaɔ̃ ŋa waati iyi á na ku nya ŋɛ hai ilɛu ihɛ̃ ŋa, i so kũkũm ŋa hai ihɛ̃ i nɛò ŋa.
26Si adɔ̃ cĩɔ do mɛɛwai Zozɛfu í ku, nɔ à jɔsi arau iwɔ gɔ iyi á jɔ̀ ku maà sãmi à bɛi à dasi ikuɛ si kpako Ezibiti bɛ.
Currently Selected:
Kusintii Andunya 50: MKL
Highlight
Share
Copy
Want to have your highlights saved across all your devices? Sign up or sign in
2021, SIM International et UEEB
