Kusintii Andunya 49
49
Zakɔbu í weea ama maateejiɛ ŋau
1Si anyiɛ ŋɔi Zakɔbu í kpe amaɛ ŋa í ni, i tɔtɔɔ wa ŋa. An sisi nŋɛ mii iyi á na ku ba ŋɛ. 2Iŋɛ amam ŋa, i tɔtɔɔ wa i gbɔ iyi ǹ wa n fɔ.
3Rubɛ̃ɛ, awɔi ì jɛ ama yemmam
iyi ǹ tako ǹ bí
hai waati iyi ǹ wa n nɛ gbugbã.
Awɔi ì re ifɔɛ ŋa
do bɛɛrɛ do gbugbã.
4Amma ì yɛi bɛi inyi iyi wa tãngãm,
i ci ya saku,
nɔ ì sũ do abo akãm.
Si ideu bɛ ì kayem.
Na nŋu, i kaa jɛ inɛ ngboi ifɔɛ ŋa.
5Awɔ Simeɔ̃ do ifɔɛ Levii,
daa nŋɛ akãi,
domi ì ce anu tɔɔsi
ì koo ì ce laalɔ do taakuba nŋɛ ŋa.
6Si idɔɔkɔ̃ nŋɛ ì kpa amanɛ ŋa.
Nɔ si inɔ sãmi nŋɛ
ì da atĩi kɔbisii kɛtɛ kombo ŋa.
Na nŋu, idɔm ku maà na ku lɔ si akabuu nŋɛ,
nɔ lasabum ku maà too si anu tɔɔsi nŋɛ.
7Ikpei í jɛ tu ŋɛ
na idɔɔkɔ̃ hai nɛ yaase nŋɛ.
Ikpe í jɛ tu ŋɛ
na inɔ sãmi hai nɛ araare nŋɛ.
An fangaa tɔku nŋɛ ŋa si ilɛu.
An fangaa ŋai si ilɛi Izirɛliu fei.
8Awɔ Zudaa, igbã do ifɔɛ ŋa aa saabuɛ,
nɔ aa naa a gulɛ si wajuɛ.
Aa jɛ mbɛɛɛ ŋa igũ.
9Ì nɛ gbugbã bɛi ama muusu nla
iyi í koo í kpa iŋa wa,
nɔ í sinda í baa koloɛ í naa í sũ sɛ̃ɛ.
Yooi á tilasiɛ ku dede má.
10Batai bomma kaa fita hai si dimii Zudaa.
Akpai bommau á maa wɛɛa tɔkuɛ ŋa
hee Siloo#49:10 Siloo Do feei Ebɛɛ yaasei ideu ku gbɔɛ í gaabu. koo toò wa.
Nŋui zamaa á sũa iri ilɛ.
11Jĩi ndii rezɛ̃ɛ ŋa aa kpɔ
hee inɛ ŋa a maa so gbankɛlɛ nŋa ŋa si ŋa.
Nɔ ama gbankɛlɛ ŋa mɔ
aa maa so ŋai si jĩi ndii rezɛ̃ɛ ŋa iyi à sĩa à re.
Vɛ̃ɛ iyi aa ceò á kpɔ
hee ku to bɛi inɛ ŋa aa fɔò ibɔ nŋa ŋa.
Nɔ inyiɛ iyi aa fɔ̃,
á to bɛi inɛ ŋa aa fɔò acɔ nŋa ŋa.
12Si bɛi atɛ̃ vɛ̃ɛ á kpɔ,
ŋɔi á jɔ̀ ijuɛ ŋa ku kpã.
Nɔ amɔ mɔ á na ku kpɔ
ku teese ku fũuta inyíɛ ŋa.
13Awɔ Zabulɔ̃ɔ aa bubai itĩ tenkuu
tengi bii akɔi inyi ŋa à ya leekĩ.
Nɔ kɔɔi ilɛɛu nŋui í bɔ hee ilui Sidɔ̃ɔ.
14Awɔ Isakaa ì yɛi bɛi gbankɛlɛ kaasãanɛ
iyi í ya maa sũ sɛ̃ɛ si afei kaa minji.
15Ì yɛ iyi inyau í sĩa,
ilɛu mɔ í jɛ jiida.
Na nŋu, ì jɛsi i so aso
nɔ i ce icɛi aru.
16Dãa, awɔi aa kiiti zamaaɛ ŋa
bɛi dimii inɛi Izirɛli ŋa fei à waa ce.
17Aa yɛi bɛi njo wukuku
iyi í wa si kpãa
ku maa ya kutɛi acĩ ŋa
ku ba masa ŋau a ya cuku.
18Aɔ̃ Lafɛ̃ɛ, ǹ wa n cɔ kpãai faabaɛ.
19Awɔ mɔ Gadi, mbɛɛɛ ŋa aa na a cuku siɛ,
amma aa kãmia ŋa i lele ŋa.
20Awɔ Azɛɛ ilɛɛ á ce ijɛ jiida.
Ijɛi ilaalu ŋai aa ya jɛ.
21Awɔ Nɛfitali aa yɛi bɛi kabua
iyi í nɛ araɛ,
nɔ ama jiida ŋai aa ya nɛ.
22Awɔ Zozɛfu mɔ í yɛi bɛi jĩi
iyi í wa kɔkɔi isɔ̃
iyi í ya so iso jiida.
Amaawɔɛ ŋa í kua kua idĩ ŋa bii fei.
23Woo ta afa ŋau à naa siɛ,
à dɛdɛ anuɛ, à taɛ afa.
24Amma ì ya katee biooɛi dim dim,
nɔ awɔɛ ŋa a ci ya yaya
na saabui Ilaaɔ̃ Lafɛ̃ɛm ilu gbugbã,
nŋu iyi í jɛ woo degbe
nɔ í jɛ kuta nlai Izirɛli.
25Ilaaɔ̃ Lafɛ̃ɛm á sobiɛ,
Ilaaɔ̃ ilu gbugbã á weeɛ si mii fei.
Á jɔ̀ ijĩ ku ya wɔ si ilɛɛ ŋa jiida jiida,
nɔ isɔ̃ɛ ŋa a ya maa kɔ̃ do inyi.
Aboi dimiɛ ŋa do mɛɛmu nŋɛ ŋa
aa bí nkpɔ nkpɔ.
26Kuweei baaɛ í la.
Nɔ í gboka í re iri kuta ŋa iyi à wɛɛ hee do ajɔ fei,
nɔ í re amaajɛ ŋa iyi à wa si geetei tako ŋau.
Kuweeu, á maa wɛɛ do awɔ Zozɛfu,
awɔ iyi ǹ cica ǹ nyaɛ ikã
hai si igbãɛ ŋa.
27Awɔ Bɛnzamɛɛ mɔ ì yɛi bɛi mbo buu.
Daadaakɔ ì ya maa ŋɔ iŋa iyi ì kpa,
alɛ mɔ ì kpɛ̃ iyi í gbe.
28Do yaase bɛɛbɛi Zakɔbu í weea amaɛ ŋa, aŋa iyi aa na a jɛ dimi maateejii inɛi Izirɛli ŋau. Í cea inɛ fei kuweeɛi ikã ikã.
Ikui Zakɔbu
29-30Si anyiɛ ŋɔi Zakɔbu í sɔ̃ amaɛ ŋau í ni, ǹ maai ku ku mbɛ n nyi bi balam ŋa. Na nŋu, ide iyi ǹ wa n jilɛ nŋɛ wee. Bii ǹ na ǹ ku, i koo i sim si balɛi balam ŋa si isai kuta iyi í wa Makpela, si ikoi Eforɔ̃ɔ inɛi Hɛtiu, kɔkɔi Maree si ilɛi Kanaã. Ikou nŋui Aburahamu í ra bi Eforɔ̃ɔu ku jɛ bi ku si inɛɛ ŋa. 31Bɛi à si Aburahamu takaɛ do Sara aboɛ. Bɛ mɔi à si Izaaki do Rebeka aboɛ. Nɔ bɛi amu takam ǹ si Lea. 32Ikou do isa iyi í wa bɛu fei, bi inɛi Hɛti ŋai à raa.
33Waati iyi Zakɔbu í sɔ̃ amaɛ ŋa ideu í tã, ŋɔi í bɛi í sũ í ku í bɔ bi balaɛ ŋa.
Currently Selected:
Kusintii Andunya 49: MKL
Highlight
Share
Copy
Want to have your highlights saved across all your devices? Sign up or sign in
2021, SIM International et UEEB
