Kusintii Andunya 48

Zakɔbu í weea amai Zozɛfu ŋa

1Si anyii nŋu ŋau bɛ nɔ à naa à sɔ̃ Zozɛfu à ni, baaɛ kù waa nɛ baani. Nɔ nŋu do ama minjiɛ ŋau Manasee do Efaraimu à dede à koo. 2Nɔ à sɔ̃ Zakɔbu à ni, Zozɛfu amaɛu wa naa ku cɔɛ. Ŋɔi Zakɔbu í ce kookaai í dede í buba si daayiɛ. 3Nɔ í sɔ̃ Zozɛfu í ni, Ilaaɔ̃ ilu gbugbã í naa sim Luzi si ilɛi Kanaã nɔ í weem. 4Í sɔ̃m í ni nŋu á muum ama nkpɔ nkpɔ, nɔ ku cem balai dimi nkpɔ. Tɔkum ŋai á na ku mua ilɛi Kanaã do ajɔ fei. 5Nsɛi, ama inɛmɔkɔ minjiɛ ŋa iyi ì bí si ilɛi Ezibitiu amu ǹ bɛi ǹ naa ihɛ̃, ǹ jilɛ ŋai bɛi amaabím ŋa, bɛi Rubɛ̃ɛ do Simeɔ̃. 6Amma amu ŋa iyi ì bí si anyi nŋa, inɛ nŋu ŋai à jɛ tɛɛ ŋa. Si ilɛi igbã nŋa ŋai aa baò tubu nŋa. 7Si waati iyi ǹ wa n baa hai ilɛi Padan-Aramu, Rasɛli iyeɛ í ku sim kɔkɔi Efarata si ilɛi Kanaã. Ǹ suui itĩ kpãai Efarata bɛ, waatɔ Betelehɛmu.

8Si waati nŋu Zakɔbu í yɛ amu ŋa iyi à too Zozɛfu wau nɔ í bee í ni, ama yooma ŋai ihɛ̃. 9Nɔ Zozɛfu í jɛ í ni, amu ŋa iyi Ilaaɔ̃ í muum si ilɛi Ezibiti ihɛ̃ mbɛ. Nɔ Zakɔbu í ni, naaò ŋa wa n wee nŋa. 10Zakɔbu wee ijuɛ kù nɛ gbugbã má na agboɛ, nɔ kù waa yɛ ilu sãa sãa. Nŋui í ce Zozɛfu í jɔ̀ amu ŋau à sɛkɛɛ siɛ wa. Nɔ Zakɔbu í ya ŋa si abɛɛ. 11Nɔ í sɔ̃ Zozɛfu í ni, n kù wa n tamaa n yɛɛ má mɔm, nɔ wee nsɛi Ilaaɔ̃ í jɔ̀ ǹ yɛɛ do amaɛ ŋa fei.

12Nɔ Zozɛfu í jɔ̀ amaɛ ŋau à fita hai si afei itãi baaɛu nɔ nŋu takaɛ í sɛɛbataa. 13Si anyiɛ ŋɔi í so Manasee si awɔ cangaɛ í jilɔɔ si awɔ njɛi Zakɔbu. Efaraimu mɔ í soo si awɔ njɛɛ í jilɔɔ si awɔ cangai baaɛ. 14Nɔ Zakɔbu í kpalɔ awɔɛ í so awɔ njɛɛ í lesi Efaraimu ifɔu, nɔ í so awɔ cangaɛ í lesi Manasee baa do iyi í jɛ yemma. 15Nɔ í weea Zozɛfu í ni,

ǹ wa n tɔɔ Ilaaɔ̃ ku weea amu ŋau ihɛ̃,

nŋu iyi balam Aburahamu do baam Izaaki

à tɔɔ si kuwɛɛ nŋa fei.

Nŋui í jɛ woo degbem hai waati iyi à bím hee ku baa nsɛi.

16 Amalekaɛ í faabam hai si laalɔ baa yooma fei.

Ǹ wa n tɔɔɛ ku weea amu ŋau ihɛ̃,

nɔ ku jɔ̀ a kpe ŋa do irii amu takam

do ti Izaaki baam do ti Aburahamu balam,

nɔ ku jɔ̀ a kpɔ a maa kɔ̃ɔsi si ilɛu.

17Iyi Zozɛfu í yɛ baai nŋu í kpalɔ awɔɛ í lesi awɔ njɛɛ si irii Efaraimu kù dɔ̃a si. Ŋɔi wa bi ku nyaa ku lesi irii Manasee. 18Nɔ í sɔ̃ baaɛu í ni, ì rara mbɛ. Lesi awɔ njɛɛ si inɛ ihɔ̃. I kù mà njɛi í jɛ yemma? 19Amma baaɛu í kɔ̀ í ni, ǹ mà sãa sãa. Tɔkui Manasee ŋa mɔ aa na a kpɔ. Do nŋu fei, ti Efaraimu ifɔu á kpɔ ku re. Inɛ nŋu ŋa aa kpɔi, dimi ikã ikã fei á wa si.

20Do yaase bɛɛbɛi í wee nŋa ajɔ nŋu. Nɔ í ni má,

do iri nŋɛi inɛi Izirɛli ŋa aa ya weea njɛ,

aa ya nii, Ilaaɔ̃ ku muuɛ didɔ̃

bɛi í mua Efaraimu do Manasee.

Amma Zakɔbu í jɔ̀ Efaraimu í jɛ inɛi waju. 21Nɔ í sɔ̃ Zozɛfu í ni, ǹ maai ku ku mbɛ bɛi. Amma Ilaaɔ̃ á maa wɛɛ do iŋɛ nɔ á na ku nyiò ŋɛ ilɛi bala nŋɛ ŋa má. 22Amui an muuɛ ilɛ ku re ti igbãɛ ŋa. An muuɛ ilui Sikɛmu má do ilɛɛkoɛ ŋa iyi ǹ gba hai bi inɛi Amɔre ŋa si waati iyi ǹ jɛ ŋa igũ do sobii taakubam do ti bioom.

Currently Selected:

Kusintii Andunya 48: MKL

Highlight

Copy