Kusintii Andunya 47
47
1-2Si anyiɛ ŋɔi Zozɛfu í gbã inɛ miiu si inɔi igbãɛ ŋa í koo í nyisi Faraɔ̃, nɔ í sɔ̃ɔ í ni, igbãm ŋa do ifɔm do baam à to wa hai ilɛi Kanaã do angudã nŋa ŋa do kɛtɛ nŋa ŋa do mii iyi à nɛ fei, à wa ilɛi Gosɛni. 3Nɔ Faraɔ̃ í bee ŋa í ni, icɛ dimi mii ì ya ce ŋa. Nɔ à jɛaa à ni, awa woo ce icɛɛ ŋa degbei à ya ka ce bɛi bala nwa ŋa à tako à ce wo. 4Nɔ à sɔ̃ Faraɔ̃ má à ni, ariu í la í caa si ilɛi Kanaã hee baa mii iyi mɛɛmu nwa ŋa aa jɛ kù wɛɛ má. Na nŋu, à naai ka naa ka buba si ilɛu ihɛ̃. À waa tɔɔɛi, jɔ̀ ka buba si ilɛi Gosɛni.
5Nɔ Faraɔ̃ í sɔ̃ Zozɛfu í ni, nsɛi si bɛi baaɛ do igbãɛ ŋa do ifɔɛ à naa à baɛ ihɛ̃, 6ilɛi Ezibitiu fei awɔi ì nɔɔ. Cica inya iyi í jɛ jiida í re si ilɛu i jɔ̀ a buba bɛ. Aa yɔkɔ a buba si ilɛi Gosɛni bii à bi. Nɔ si inɔ nŋa bii ì yɛ inɛ ŋa iyi aa yɔkɔ, so ŋa a jɛ woo degbe mɛɛmum ŋa.
7Si anyiɛ ŋɔi Zozɛfu í gbã Zakɔbu baaɛu mɔ í koo í nyisi Faraɔ̃, nɔ Zakɔbu í weea Faraɔ̃. 8Faraɔ̃ í bee Zakɔbu í ni, adɔ̃ fɛloi ì nɛ. 9Nɔ Zakɔbu í jɛa Faraɔ̃ í ni, adɔ̃ cifaò fɛɛwai ǹ nɛ. Adɔ̃m kù kpɔ nɔ fei ndɛɛ do wahalai. Kukpɔɛ kù to ti balam ŋa iyi à ce isɛɛnɛ bɛi amu mɔ ǹ ce. 10Zakɔbu í nyi í weea Faraɔ̃ má í bɛi í fita hai bi tɛɛ.
11Zozɛfu í jilɛ baaɛ do igbãɛ ŋa do ifɔɛ si inya iyi í jɛ jiida í re si ilɛi Ezibiti, si ilɛi Ramusɛsi bɛi Faraɔ̃ í fɔu. 12Zozɛfu í na baaɛu do inɛ ŋa iyi à wa inɔ kpasɛ̃ bɛ fei mii ku jɛ ŋa si bɛi kukpɔ nŋa í to.
Bisi iyi Zozɛfu í ce si waatii ariu
13Ariu í la wa kɔ̃ɔsi hee mii ku jɛ gɔ kù wa si ilɛu bii kãma má. Inɛi Ezibiti do inɛi Kanaã ŋa fei à waa ku na ariu. 14À raò fia nŋa fei mii ku jɛ, nɔ Zozɛfu í tɔtɔɔ fiau í koo í jilɔɔ kpasɛ̃i Faraɔ̃. 15Waati iyi fia kù na kù wa si ilɛi Ezibiti nɔ kù wa ilɛi Kanaã, ŋɔi inɛi Ezibiti ŋa fei à naa à ba Zozɛfu à sɔ̃ɔ à ni, mu nwa mii ku jɛ ŋa. Mà si na iyi í jɔ̀ a kù nɛ fia má aa jɔ̀ ka kuò ari si wajuɛi? 16Nɔ Zozɛfu í jɛ nŋa í ni, bii i kù nɛ fia má ŋa, i naaò mɛɛmu nŋɛ ŋa wa ka kpaasi, n bɛi n na ŋɛ mii ku jɛ ŋa. 17Ŋɔi à ya maa naaò mɛɛmu nŋa ŋa wa bi Zozɛfu, nŋu mɔ ku bɛi ku maa na ŋa mii ku jɛ ŋa. À ya maa kpaasii do acĩ nŋa ŋa do angudã nŋa ŋa do iwo nŋa ŋa do kɛtɛ nŋa ŋa do gbankɛlɛ nŋa ŋa. Si adɔ̃ nŋu bɛi í na ŋa mii ku jɛ a kpaasiò mɛɛmu nŋa ŋa fei.
18Iyi adɔ̃ nŋu í lɔ nɔ à naa à ba Zozɛfu má à sɔ̃ɔ à ni, lafɛ̃ɛ, a kù bi ka singaɛ iyi a kù nɛ fia má, nɔ mɛɛmu nwa ŋa fei à jɛ tɛɛ tã. Nkãma kù gbe nwa má iyi aa ka kpaasiò, í gbe awa taka nwa do ilɛ nwa ŋa. 19Aa ka kuò ari si wajuɛ nɔ ilɛ nwa ŋa a wɛɛ ngbɛ? Ra awa taka nwa do ilɛ nwa ŋa, nɔ i maa na wa mii iyi aa ka maa jɛ. Nɔ awa do ilɛ nwa ŋa fei ka jɛ ti Faraɔ̃. Mu nwa dimi ŋa iyi aa ka gbɛ̃ ku ba ka maa wɛɛ si hunde, domi a kù bi ka ku, nɔ ilɛ nwa ŋa a kpɔò gbaa. 20Zozɛfu í raa Faraɔ̃ ikoi inɛi Ezibiti ŋau fei, domi inɛi Ezibiti ŋau fei à waa ta iko nŋa ŋai si na iyi í jɔ̀ ariu í la wa kɔ̃ɔsi. Nɔ ilɛi Ezibitiu fei í baa í jɛ ti Faraɔ̃. 21Nɔ Zozɛfu í ce inɛ ŋau fei aru hai bii ilɛu í sinti hee ku bɔ iri ku kpaɛ. 22Andi ilɛ iyi kù ra nŋu akã nŋui í jɛ ti woo wee ŋau, si na iyi í jɔ̀ baa hai tako mɔ wo Faraɔ̃ í jilɛ wooda iyi nŋui á ya maa na ŋa sɔnda adɔ̃ do adɔ̃. Na ŋɔi í jɔ̀ a kù ta ilɛ nŋa ŋa.
23Zozɛfu wa ba inɛ ŋau ide ku fɔ wa ni, nsɛi iyi ǹ ra ŋɛ, iŋɛ do ilɛ nŋɛ ŋa fei ì jɛ ti Faraɔ̃ ŋa, an na ŋɛ dimi ŋa iyi aa gbɛ̃ si iko nŋɛ ŋau. 24Amma bii amaajɛ nŋɛ ŋau à na à jĩa, aa kpɔ̃ɔ ikɔ miiu ŋai. Nɔ si miiu fei akã ti Faraɔ̃i á jɛ. Mɛɛ ŋa iyi à gbe ŋau mɔ a jɛ tu ŋɛ. Si bɛi aa ba dimi iyi aa gbɛ̃ ŋa, do iyi aa jɛ do ama nŋɛ ŋa do inɛ ŋa iyi à wa kpasɛ̃ nŋɛ ŋa fei. 25Ŋɔi à ni, lafɛ̃ɛ, ì waa faaba wa si kuwɛɛ nwai. Si na iyi í jɔ̀ ì waa nyisi wa jiida ku jɛɛ, à jɛsi ka jɛ arui ilaalu Faraɔ̃. 26Bɛɛbɛi Zozɛfu í jilɛ woodau í ni, si ilɛi Ezibiti bii à da amaajɛi ilɛ ŋa, si ikɔ miiu fei ikɔ akã ti Faraɔ̃i á ya jɛ. Nɔ hee nsɛi woodau í wɛɛ. Ilɛi woo wee ŋa nŋu akãi kù jɛ ti Faraɔ̃.
Mii iyi Zakɔbu í bi a cea nŋu bii í na í ku
27Zakɔbu nŋu iyi à ya kpe Izirɛliu, nŋu do inɛɛ ŋa à buba ilɛi Ezibiti si ilɛi Gosɛni. À nɛ ilɛ ŋa do amu ŋa nɔ à kpɔ ntɔ ntɔ. 28Adɔ̃ maatũ do minjii Zakɔbu í ce ilɛi Ezibiti bɛ. Nɔ jiai adɔ̃ɛ fei í dedei cije do mɛɛje (147). 29Iyi Zakɔbu í yɛ nŋu í maai ku ku, í kpe Zozɛfu amaɛu nɔ í sɔ̃ɔ í ni, bii ì nɛ kubim nii, nyisim kubiu do dee dee ku jɛɛ. Bii ǹ na ǹ ku, maà sim Ezibiti ihɛ̃. Na nŋu ceem kuwã, i dasi awɔɛ si lɛlɛi itãm. 30Bii ǹ na ǹ ku, som hai Ezibiti ihɛ̃ i koo sim si balɛi balam ŋa. Nɔ Zozɛfu í jɛaa í ni, an ce bɛi ì sɔ̃m.
31Zakɔbu í wasi ku fɔ í ni ku gbasi ntɔ ntɔ. Nɔ Zozɛfu í gbasi. Si anyiɛ nɔ Zakɔbu í sɛɛbata si ikpoi daayiɛ.
Currently Selected:
Kusintii Andunya 47: MKL
Highlight
Share
Copy
Want to have your highlights saved across all your devices? Sign up or sign in
2021, SIM International et UEEB
