Kusintii Andunya 46

Zakɔbu do inɛɛ ŋa à bɔ Ezibiti

1Zakɔbu iyi à ya kpe Izirɛli í dasi kpãa do mii ŋa iyi í jɛ tɛɛ fei. Waati iyi í to Bɛɛseba í cea Ilaaɔ̃ Lafɛ̃ɛi Izaaki baaɛ kuwee. 2Nɔ si idũ akãu bɛ í ce kuyɛ. Si kuyɛɛu í ba wee Ilaaɔ̃ í naa í ba nŋu ide ku fɔ. Í kpoo í ni, Zakɔbu, Zakɔbu. Nɔ Zakɔbu í jɛ í ni, amu wee. 3Nɔ Ilaaɔ̃ í ni, amui ǹ jɛ Ilaaɔ̃, Lafɛ̃ɛi baaɛ. Maà jɔ̀ njo ku muɛ si Ezibiti ku bɔ, domi an jɔ̀ tɔkuɛ ŋa a kpɔ bututu a jɛ dimi nla nla. 4An siɛ si kukoo do kubaa fei. Waati iyi aa na i ku Zozɛfui á siɛ.

5Nɔ Zakɔbu do inɛɛ ŋa fei à dede hai Bɛɛseba bɛ. Nɔ amaɛ ŋa à jɔ̀ nŋu do amai aŋa taka nŋa ŋa do abo nŋa ŋa à lɔ sarɛti ŋa iyi Faraɔ̃ í na ŋa wa na isɛɛnɛ nŋau. 6Si anyiɛ nɔ à gbã mɛɛmu nŋa ŋa do amani ŋa iyi à ba wa hai ilɛi Kanaã fei nɔ à to Ezibiti. 7Bɛɛbɛi Zakɔbu í ce í lɔ wa si ilɛi Ezibiti, nŋu do nyaanzeɛ ŋa fei, ama inɛmɔkɔɛ ŋa do ama inaaboɛ ŋa do tɔkuɛ ŋa.

Nyaanzei Zakɔbu

8Irii inɛi Izirɛli ŋa iyi à nɛ ilɛi Ezibiti ŋau wee, hai Zakɔbu do amaɛ ŋa do tɔkuɛ ŋa. Rubɛ̃ɛi í jɛ yemmai Zakɔbu. 9Amai Rubɛ̃ɛ ŋa mɔi Enɔku do Palu do Esirɔ̃ɔ do Kaami. 10Amai Simeɔ̃ ŋa mɔi Yemuɛli do Yamɛɛ do Ohadi do Yakɛ̃ɛ do Sohaa do Saulu amai aboi Kanaã gɔ. 11Amai Levii ŋa mɔi Gɛɛsɔ̃ɔ do Kehati do Merari. 12Amai Zudaa ŋa mɔi Ɛɛ do Onaa do Sela do Perɛsi do Zera, amma Ɛɛ do Onaa à ku hai ilɛi Kanaã. Amai Perɛsi ŋa mɔi Hɛsirɔ̃ɔ do Hamulu. 13Amai Isakaa ŋa mɔi Tola do Puva do Yɔɔbu do Simirɔ̃ɔ. 14Amai Zabulɔ̃ɔ ŋa mɔi Serɛdi do Elɔ̃ɔ do Yaleɛli.

15Inɛ nŋu ŋau bɛ fei tɔkui Lea ŋai, amai ama inɛmɔkɔɛ ŋa iyi í bía Zakɔbu hai ilɛi Padan-Aramu. Nɔ wecĩ nŋa iyi à ya kpe Dinau mɔ, í wa si inɔ nŋa. Hai inɛmɔkɔ do inaabo ŋau, aŋa fei sãa sãa à wɛɛi aŋa kuntaa do mɛɛta. 16Amai Gadi ŋa mɔi Sifiɔ̃ɔ do Hagi do Suni do Esibɔ̃ɔ do Ɛɛ do Aradi do Areɛli. 17Amai Azɛɛ ŋa mɔi Yimuna do Yiseva do Yisevi do Beria do wecĩ nŋa Sera. Amai Beria ŋa mɔi Ebɛɛ do Malikiɛli.

18Inɛ nŋu ŋau bɛi à jɛ tɔkui Zilipa, abo iyi Labãa í so í na Lea ama inaaboɛ í jɛ woo ce icɛɛ. Aŋa fei à wɛɛi maatũ do akã.

19Amai Rasɛli ŋa mɔi Zozɛfu do Bɛnzamɛɛ. 20Si ilɛi Ezibiti bɛ, Asenati ama inaaboi Potifera woo weei ilui Ɔ̃ɔ í bía Zozɛfu Manasee do Efaraimu. 21Amai Bɛnzamɛɛ ŋa mɔi Bela do Bekɛɛ do Asibɛli do Gɛra do Naamaa do Ehi do Rɔsi do Mupimu do Hupimu do Aadu. 22Inɛ nŋu ŋau bɛi à jɛ tɔkui Rasɛli. Aŋa fei à wɛɛi aŋa maatɛ̃ɛ. 23Amai Dãa mɔi Husimu. 24Amai Nɛfitali ŋa mɔi Yaseɛli do Guni do Yesɛɛ do Silɛmu. 25Inɛ nŋu ŋau bɛi à jɛ tɔkui Biliha, abo iyi Labãa í so í na Rasɛli ama inaaboɛ í jɛ woo ce icɛɛu. Aŋa fei à wɛɛi aŋa mɛɛje.

26Inɛ ŋa iyi à jɛ nyaanzei Zakɔbu dee dee iyi à dede à nɛ ilɛi Ezibiti à wɛɛi aŋa kita do mɛɛfa, amma a kù ka aboi amaɛ ŋa si bɛ. 27Do ama minji iyi Zozɛfu í bí si ilɛi Ezibiti bɛ aŋa fei sãa sãa à dedei amanɛ kitaò fɛɛwa.

Zakɔbu do inɛɛ ŋa à wa Ezibiti

28Zakɔbu í bɛ Zudaa ku cua nŋu koo sɔ̃ Zozɛfu iyi nŋu wa bɔ ilɛi Gosɛni. Iyi Zakɔbu do inɛɛ ŋa à to wa Gosɛni, 29nɔ Zozɛfu í dĩ sarɛtiɛ í bɔ baaɛ ku ko. Iyi í hɔ̃nnɛɛ gbakã í kitai hai si antaii sarɛtiu í sɛi í koo í yaa wa kpataò. 30Nɔ Izirɛli í ni, bii í yɔkɔ n ku bɛbɛi, domi ì wɛɛ si hunde ǹ nɔ ǹ yɛɛ má. 31Nɔ Zozɛfu í sɔ̃ igbãɛ ŋa do nyaanzei baaɛ ŋau fei í ni, an koo n sɔ̃ Faraɔ̃ n ni igbãm ŋa do nyaanzei baam ŋa iyi à wa ilɛi Kanaã wo, aŋa fei à hãmɛɛm wa ihɛ̃. 32An sɔ̃ɔ n ni iŋɛ woo degbe mɛɛmu ŋai, i naaò kɛtɛ nŋɛ ŋa wai do angudã nŋɛ ŋa do mii ŋa iyi ì nɛ fei ŋa. 33Bii Faraɔ̃ í na í kpe ŋɛ, wa bee icɛ iyi ì ya ce ŋa, 34i sɔ̃ɔ i ni mɛɛmu ŋai iŋɛ woo ce icɛɛ ŋa ì ya degbe hai keeke nŋɛ hee ku baa nsɛi, bɛi bala nŋɛ ŋa à ya ce. Si bɛɛbɛ, á jɔ̀ i buba si ilɛi Gosɛni ŋa domi inɛi Ezibiti ŋa a ci ya bi woo degbe angudã do iwo kãma.

Currently Selected:

Kusintii Andunya 46: MKL

Highlight

Copy