Kusintii Andunya 45

Zozɛfu í tusɛ araɛ

1-2Iyi Zozɛfu í gbɔ idei Zudaau bɛɛbɛ, ŋɔi í mɔngɔ cikãajuɛ ku mu, ŋɔi í ni inɛ ŋa iyi à wa bɛu fei a fita. Iyi inɛ ŋa à fita, í gbe Zozɛfu nŋu akã bɛbɛi do igbãɛ ŋa do ifɔɛ. Nɔ í kpata wa dɔ̃ anu hee inɛi Ezibiti ŋau à gbɔ do inɛi kpasɛ̃i ilaalu Faraɔ̃ ŋau, í bɛi í tusɛ araɛ si wajui igbãɛ ŋau do ifɔɛu, 3í sɔ̃ ŋa í ni, amui Zozɛfu. Baam í wɛɛ si hunde hee nsɛi? Amma njo í mu inɛ ŋau hee à mɔngɔ ku jɛaa. 4Nɔ í sɔ̃ ŋa í ni a tɛkɛɛ si nŋu wa, nɔ à tɛkɛɛ siɛ. Nɔ í sisi í sɔ̃ ŋa má í ni, amui Zozɛfu ifɔ nŋɛu, amu iyi ì ta ŋa nɔ à naam wa ilɛi Ezibiti ihɛ̃. 5Nsɛi i maà jɔ̀ ideu ku fɔ inɔ nŋɛ, nɔ i maà yɛ taalei ara nŋɛ do iyi ì tam ŋa nɔ à naam wa ihɛ̃, domi Ilaaɔ̃i í naam wa ihɛ̃, í jɔ̀ ǹ cua nŋɛ wa ku ba n na n faaba hunde ŋa. 6Wee adɔ̃ minjii ihɛ̃ tã iyi ari wa ce si ilɛu ihɛ̃. Nɔ á nyi ku ce adɔ̃ miiu má iyi inɛ ŋa a kaa gbɛ̃ hee má jɛ a da. 7Ilaaɔ̃ í jɔ̀ ǹ cua nŋɛ wai ku ba i ba faaba nla nla ŋa, nɔ ku jɔ̀ nŋɛ tɔku ŋa iyi aa maa wɛɛ si andunyau ihɛ̃. 8Kù jɛ iŋɛi ì naam wa ihɛ̃. Ilaaɔ̃i í naam wa. Ilaaɔ̃i í jɔ̀ ǹ jɛ awɔ njɛi Faraɔ̃. Si kpasɛ̃ɛ fei amui ǹ jɛ inɛ ngbo, nɔ amui ǹ jɛ inɛ ngboi ilɛi Ezibiti fei. 9Nsɛi i ce ńya ńya i bɔ bi baam, nɔ i sɔ̃ɔ ŋa i ni, amu Zozɛfu amaɛu ǹ ni i sɔ̃ɔ ŋa iyi Ilaaɔ̃ í jilɛɛm inɛ ngbo si ilɛi Ezibiti fei. Na nŋu, ku naa wa bi tom ihɛ̃, ku maà jɔ̀ ku kpɛ. 10Ku naa wa ku na ku buba si ilɛi Gosɛni nɔ ku wa kɔkɔm, nŋu do amaɛ ŋa do tɔkuɛ ŋa do mɛɛmuɛ ŋa, hai angudãɛ ŋa do iwoɛ ŋa do kɛtɛɛ ŋa, andi mii iyi í jɛ mii ndɛɛ ŋa fei de. 11An ya n maa n woo tengi bɛ, domi ariu á nyi ku ce má zakai adɔ̃ miiu. Na nŋu, bii í wa kɔkɔm ihɛ̃ bukaatai mii iyi í nɛ fei, an naa, nŋu do inɛi kpasɛ̃ɛ ŋa do andi mii iyi í jɛ titɛɛ fei.

12Nɔ Zozɛfu í ni má, ì waa yɛm ŋa sãa sãa, nɔ Bɛnzamɛɛ ifɔm nɔu mɔ takaɛ wa yɛm. Iŋɛ fei ì mà ŋa iyi amui ǹ wa n ba ŋɛ ide ku fɔ. 13I koo i sisia baam bɛi gbugbãm í to si ilɛi Ezibiti, nɔ i sisia mii iyi ì yɛ fei ŋa. Nɔ i ce ńya ńya i koo i gbãa wa ihɛ̃ ŋa.

14Nɔ í fo í bata Bɛnzamɛɛ ifɔɛu wa baabaaɛ wa kpataò, nɔ Bɛnzamɛɛ mɔ wa kpata. 15Nɔ wa baabaa inɛ ŋa iyi à gbe ŋau mɔ do kukpata. Ŋɔi aŋa fei à bɛi à yɔkɔ à waa baa ide ku fɔ bɛbɛi.

Faraɔ̃ í kpe Zakɔbu Ezibiti

16Si inɔ kpasɛ̃i ilaaluu à gbɔ iyi igbãi Zozɛfu ŋa do ifɔɛ à naa, nɔ ideu í dɔ̃a Faraɔ̃ ilaaluu do woo ce icɛɛ ŋau fei si. 17Nɔ í sɔ̃ Zozɛfu í ni, sɔ̃ igbãɛ ŋau do ifɔɛu a kãa gbankɛlɛ nŋa ŋau mii ku jɛ ŋa nɔ a nɛ ilɛi Kanaã. 18Nɔ a so baa nŋa do nyaanze nŋa ŋa wa a naa wa bi tom ihɛ̃. An mu nŋa ilɛ iyi í jɛ jiida í re si ilɛi Ezibiti nɔ aa jɛ ijɛ jiidai ilɛu. 19Nɔ Faraɔ̃ í sɔ̃ Zozɛfu má í ni, ì nɛ kpãa i sɔ̃ igbãɛ ŋa do ifɔɛ i ni a so sarɛti ŋa hai ilɛi Ezibiti ihɛ̃ a koo a soò ama nŋa ŋa do abo nŋa ŋa do baa nŋɛ wa. 20A maà ce bɛgɛi mii ndu ŋɛ ŋa iyi aa jɔ̀ bɛ, domi mii jiida iyi í wa si ilɛi Ezibitiu fei á jɛ tu ŋa.

21Amai Izirɛli ŋau à ce bɛi à sɔ̃ ŋau. Zozɛfu í na ŋa sarɛti ŋa si bɛi Faraɔ̃ í fɔu. Nɔ í na ŋa kosĩa ŋa iyi aa mu si isɛɛnɛ nŋau. 22Nɔ í mua aŋa fei ibɔ titɔ̃ akã akã, amma Bɛnzamɛɛ inɛ nŋu ibɔ miiui í muaa do isɔ fũfũ kpɛkɛlɛ cĩɔ mɛɛta. 23Nɔ í sambaa baaɛ gbankɛlɛ mɛɛwa. Aŋa fei à waa so asoi mii jiidai ilɛi Ezibiti, nɔ í sambaa gbankɛlɛ abo mɛɛwa má. Aŋa mɔ à waa so bilee do pɛ̃ɛ do mii ku jɛ ikã ikã. Nŋui í jɛ kosĩa iyi aa maa jɛ bii à waa baa Ezibiti. 24Nɔ í sɔ̃ igbãɛ ŋau do ifɔɛu í ni a nɛ, amma a maà ti a na a ko a maà ce kakɔɔ si kpãa.

25Ŋɔi à dede hai ilɛi Ezibitiu à nɛ, nɔ à to ilɛi Kanaã bi Zakɔbu baa nŋa. 26Nɔ à sɔ̃ɔ à ni, Zozɛfu í wɛɛ si hunde hee nsɛi, nŋu mɔi í jɛ inɛ ngbo si ilɛi Ezibiti fei. Amma Zakɔbu kù ni ide kãma, wa cokoɛ domi kù dasi ide nŋau naanɛ.

27Amma iyi à sisiaa ide ŋa iyi Zozɛfu í sɔ̃ ŋa fei, nɔ í yɛ sarɛti ŋa iyi í samba wa iyi aa ceò isɛɛnɛu, ŋɔi laakaiɛ í sũ, 28nɔ í ni, í to bɛɛbɛ. Ǹ mà bɛbɛi iyi Zozɛfu amam nɔu í wɛɛ si hunde hee nsɛi. An koo n koo n yɔɔ hee n maa n ku.

Currently Selected:

Kusintii Andunya 45: MKL

Highlight

Copy