Kusintii Andunya 41

Faraɔ̃ í ce ala

1Iyi í ce bɛi adɔ̃ minji ŋɔi Faraɔ̃ takaɛ í ce ala. Í yɛ wee nŋu í wa kɔkɔi ido iyi à ya kpe Nili. 2Ŋɔi kɛtɛ iye kusĩa mɛɛje gɔ ŋa iyi à la à fita wa hai inɔ idou à waa jɛ si itĩɛ. 3Nɔ kɛtɛ iye mɛɛje mmuɛ gɔ ŋa mɔ à fita wa hai inɔ idou à wũ a kù sĩa baa ku yɛ. Nɔ à leekĩ bi inɛ ihɔ̃ ŋau kɔkɔi idou. 4Ŋɔi kɛtɛ ŋa iyi à wũ a kù sĩa ku yɛu à mi kɛtɛ kusĩa nla ŋau. Ŋɔi Faraɔ̃ í jĩ hai si iri njoou. 5Ŋɔi í nyi í sĩ njoo má nɔ í laala gbeejisia. Si alaɛu í yɛ iya kpokpoo akã í nɛ iya sako mɛɛje iyi í nɛ iju jiida. 6Nɔ iya ngbɛ mɛɛje gɔ ŋa mɔ à fita abɛɛ bɛ nɔ fufui nunui daakɔ í jɔ̀ à gbɛ. 7Ŋɔi iya ngbɛu í mi iya iri jiidau. Ŋɔi Faraɔ̃ í jĩ má. Ala iyi í ce mbɛ.

8Iyi iju í má daadaakɔu idɔi Faraɔ̃ kù sũ. Í kpe woo ce alisi ŋa do ilu bisi ŋa iyi à wa Ezibiti bɛ fei. Í sisi nŋa alaɛ ŋau, amma baa inɛ akã nŋa kù yɔkɔ ku mà yaasei ala ŋau. 9Ŋɔi bɛbɛi woo bu atɛ̃i Faraɔ̃u í sɔ̃ɔ í ni, nnyi ǹ ye gigi iyi ǹ rara. 10Ajɔ nŋu gɔ ì wɛɛò idɔɔkɔ̃ do inɛ ngboi woo ce pɛ̃ɛu do amu takam, nɔ ì dasi wa ile piisɔ̃ɔi akawe ŋa. 11Idũ akã gɔ awa minji fei à laala nɔ alai awa minji fei í nɛ yaaseɛi ikã ikã. 12Awaò inɛi Ebɛɛ gɔi à wa bɛ, nŋui wa jɛ arui inɛ ngboi ciikuɛ ŋa. Iyi à sisiaa ala nwau ŋɔi í tusɛ nwa yaaseɛ. 13Nɔ ti awa fei í ce dee dee bɛi í sɔ̃ wau. Ì sindoom si icɛm nɔ ì jɔ̀ à bagãm inɛ ngboi woo ce pɛ̃ɛu mɔ.

Zozɛfu í tusɛa Faraɔ̃ alaɛ ŋa

14Ŋɔi Faraɔ̃ í ni a koo a kpe Zozɛfuu wa. Ŋɔi gbakã à koo à nyaa wa hai ile piisɔ̃ɔu. Nɔ í wa agbãɛ í kpaasi jĩnɛɛ ŋa í dede í bɔ bi Faraɔ̃. 15Ŋɔi Faraɔ̃ í sɔ̃ɔ í ni, ǹ laalai, nɔ inɛ gɔ kù yɔkɔ ku tusɛɛm alau. Amma ǹ gbɔ à ni bii à sisiɛ ala ì ya yɔkɔ i sɔ̃ inɛ yaaseɛ.

16Ŋɔi Zozɛfu í jɛa Faraɔ̃ í ni, kù jɛ amu, Ilaaɔ̃i á tusɛɛ do yaase jiida.

17Ŋɔi Faraɔ̃ í sɔ̃ Zozɛfu í ni, si alam nɔu ǹ yɛ iyi ǹ wa n leekĩ kɔkɔi idoi Niliu. 18Ŋɔi ǹ yɛ kɛtɛ iye kusĩa jiida mɛɛje à fita wa hai si inɔ idou à waa jɛ si itĩɛ. 19Nɔ kɛtɛ mɛɛje gɔ ŋa mɔ à fita wa do anyi nŋa à wũ hee a kù sĩa ku yɛ. Si ilɛi Ezibiti fei n kù yɛ dimii kɛtɛ sãmi bɛɛbɛ titã. 20Ŋɔi kɛtɛ ku wũ iyi a kù sĩa ku yɛ ŋau à mi kɛtɛ kusĩa mɛɛje ŋau. 21Amma baa do iyi à mi ŋa bɛɛbɛ, i kaa mà mà à mi ngɔgɔ mɔm, domi bɛi à wũ hai takou, bɛɛbɛ mɔi à wɛɛ nŋa bɛ. Ŋɔi ǹ jĩ. 22Ŋɔi ǹ nyi ǹ laala má. Si kpokpooi iya akã ǹ yɛ si iya sako mɛɛje iyi í nɛ iju jiida jiida. 23Ŋɔi iya sako ngbɛ mɛɛje gɔ ŋa mɔ à fita si abɛi inɛ ihɔ̃ ŋau. Iya sako ŋau à gbɛi na fufui nunui daakɔu. 24Ŋɔi iya sako ngbɛu í mi iya sako jiidau. Yaase bɛi ǹ ce ala ŋau mbɛ. Ŋɔi ǹ sisia woo ce alisim ŋa. Amma kãma nŋa kù yɔkɔ ku tusɛɛm yaaseɛ.

25Ŋɔi Zozɛfu í sɔ̃ Faraɔ̃ í ni, mii akãi ì laala si bɛ. Ilaaɔ̃i wa nyisiɛ mii iyi nŋu á na ku ce. 26Kɛtɛ kusĩa mɛɛje ŋau adɔ̃ meeje mbɛ. Iya sako jiida mɛɛjeu mɔ adɔ̃ mɛɛje mbɛ. Aŋa fei ala akãu mbɛ. 27Kɛtɛ ku wũ mɛɛje ŋa iyi a kù sĩa ku yɛ ŋau iyi à fita si anyii inɛ ihɔ̃ ŋau do iya sako ngbɛ mɛɛje iyi í gbɛ na fufui nunui daakɔu, adɔ̃ mɛɛje mbɛ si bii ari á ce. 28Faraɔ̃, si bɛi ǹ tako ǹ sɔ̃ɛu mbɛ, Ilaaɔ̃i wa nyisiɛ mii iyi nŋu á na ku ce. 29Wee si adɔ̃ mɛɛje iyi ihɛ̃ ayo á wɛɛi si ilɛi Ezibiti fei. 30Amma si anyii adɔ̃ mɛɛjeu ari á ce zakai adɔ̃ mɛɛje má hee a gbɛjɛ idei ayoi ilɛi Ezibitiu. Ariu á naaò are wai nla nla si ilɛu. 31Ari iyi á naau bɛ á la hee ku caa hee inɛ ŋa a kaa yɛ baa yaasei ayoi takou. 32Iyi í jɔ̀ awɔ Faraɔ̃ ì ce alau hee isɛ gbeeji, Ilaaɔ̃i í jilɔɔ bɛɛbɛ, kaa nɔ ku kpɛtɛ ku coo.

33Nsɛi, Faraɔ̃, á sĩa i dɛ ilu bisi gɔ iyi í nɛ laakai nɔ i coo inɛ ngbo si ilɛi Ezibiti fei. 34Nɔ i dɛ inɛ gɔ ŋa mɔ iyi aa ya dabii si ilɛi Ezibitiu fei si adɔ̃ mɛɛjei ayo ŋau a tɔtɔɔ amaajɛ ŋa wa. Si ikɔ miiu fei a ya gba si inɛ ŋa ikɔ akã, 35nɔ i jɔ̀ a ce kosĩai ijɛ ŋau si adɔ̃i ayo ŋa iyi aa na a naau. Jɔ̀ a singa fei ndɛɛ si ilu ŋau. 36Ijɛu á maa singai na irii amanɛ ŋa a maa degbeò arii adɔ̃ mɛɛje iyi wa naa si ilɛi Ezibitiu, ku ba ariu ku maà na ku kpa ilɛu fei.

À ce Zozɛfu inɛ ngbo si ilɛi Ezibiti

37Ŋɔi idei Zozɛfu í dɔ̃a Faraɔ̃ si hee do woo ce icɛɛ ŋa fei. 38Nɔ Faraɔ̃ í bee woo ce icɛɛ ŋa í ni, iwoi aa ka ba inɛ gɔ bɛi inɛɛu ihɛ̃ má iyi í nɛ hundei Ilaaɔ̃ #41:38 hundei Ilaaɔ̃ Inɛ gɔ ŋa à ni hundei iwɛ̃ ŋai. À ni bɛɛbɛi si na iyi í jɔ̀ à mà iyi Faraɔ̃ kù mà hundei Ilaaɔ̃.. 39Ŋɔi í sɔ̃ Zozɛfu í ni, si bɛi Ilaaɔ̃ í nyisiɛ fei ndɛɛu, inɛ gɔ kù wɛɛ iyi í nɛ bisi do laakai bii kù jɛ awɔ má. 40An ceɛ ilu kpasɛ̃m. Inɛm ŋa fei aa ya gbɔ ideɛ. Batai bommai ilaalum nŋu akãi an reɛ do. 41Nɔ í ni má, wee ǹ ceɛ inɛ ngbo si ilɛi Ezibiti fei. 42Ŋɔi í bɔ lɛlɛawɔɛ í daa Zozɛfu si awɔ. Nɔ í daa si jĩnɛ jiida. Si anyii nŋu nɔ í daa si sabai wura si kɔ̃ɔ. 43Ŋɔi í jɔ̀ Zozɛfu í gũ sarɛti gɔ iyi acĩ wa fa wa too ti nŋu takaɛ. Nɔ inɛ ŋa iyi à waa cuaa à waa dɔ̃ anu à ni, i gulɛ i gulɛ. Bɛɛbɛi Faraɔ̃ í ce Zozɛfu inɛ ngbo si ilɛi Ezibiti fei.

44Nɔ í sɔ̃ɔ má í ni, amui Faraɔ̃. Si ilɛi Ezibiti fei inɛ gɔ kaa yɔkɔ ku wu awɔ walakɔ ku wu kutɛ bii kù jɛ do woodaɛ. 45-46Ŋɔi í sɔ Zozɛfu Safinati-Panea. Nɔ í so Asenati ama inaaboi Potifera í mua ku ce abo. Potiferau nŋui í jɛ woo weei ilui Ɔ̃ɔ. Adɔ̃ kuntaai Zozɛfu í nɛ waati iyi Faraɔ̃ í coo ilaalu.

Si anyiɛ, ŋɔi Zozɛfu í koo í dabii í cɔ ilɛi Ezibitiu fei. 47Si adɔ̃ mɛɛjei ayou, ilɛu í ce ijɛi ntɔ ntɔ. 48Ŋɔi Zozɛfu í ce kosĩai amaajɛi ilɛi Ezibitiu fei í singaɛ si ilu ŋau si adɔ̃ mɛɛjeu. Amaajɛ ŋa iyi à gba wa hai ilɛɛko ŋau, si ilu nla ŋa iyi à wa kɔkɔ nŋa ŋa bɛi à jilɛ ŋa. 49Amaajɛ ŋa iyi Zozɛfu í tɔtɔɔu í kpɔ í caa bɛi sãai tenku hee inɛ ŋa à leekĩ a kù waa ce baa dooɛ má. Inɛ ŋa à leekĩò dooɛ ku cei si na iyi í jɔ̀ kù nɛ baa jia má.

50Hee adɔ̃i ariu ku maa to wa nɔ Asenati ama inaaboi Potifera í bía Zozɛfu ama inɛmɔkɔ minji. 51Nɔ Zozɛfu í sɔ ama yemmau Manasee#41:51 Manasee Bii ì gbɔ iriu, í ya jɔ bɛi à waa ni, ide ku gbɛjɛ do feei Ebɛɛ.. Í sɔɔ bɛɛbɛi domi í ni Ilaaɔ̃ í jɔ̀ nŋu í gbɛjɛ wahalai nŋu ŋa iyi nŋu í ce fei hee do bɛi nŋu do inɛi nŋu ŋa à fɛɛfɛɛ njɛ. 52Nɔ í sɔ minjisiau mɔ Efaraimu#41:52 Efaraimu Bii ì gbɔ iriu, í ya jɔ bɛi à waa ni, Ilaaɔ̃ í muum amu ŋa do feei Ebɛɛ.. Í sɔ nŋu mɔ bɛɛbɛi domi í ni Ilaaɔ̃ í mua nŋu amu ŋa si ilɛu ihɛ̃, tengi bii nŋu í yɛ wahala wo.

53Ŋɔi adɔ̃ mɛɛjei ayou í na í naa si ilɛi Ezibitiu hee í kpa iri. 54Nɔ adɔ̃ mɛɛjei ariu mɔ í to wa si bɛi Zozɛfu í fɔ wo. Nɔ ariu wa fangaa si ilɛ ŋau fei, amma si ilɛi Ezibitiu fei ijɛ kosĩa í wa bɛ. 55Waati iyi ariu í to si inɛi Ezibiti ŋau fei gbakã à ya koo a bee Faraɔ̃ mii ku jɛi. Nɔ nŋu mɔ í ya jɛa aŋa fei ku ni a bɔ bi Zozɛfu nɔ a ce bɛi á sɔ̃ ŋa. 56Ŋɔi ariu í baa í fangaa si ilɛi Ezibitiu fei. Nɔ Zozɛfu í cĩ aka nlaɛ ŋa fei bɛbɛi í lɔsi amaajɛ ku taa inɛi Ezibiti ŋa. Nɔ ariu í la wa kɔ̃ɔsi si ilɛi Ezibitiu. 57Nɔ inɛ ŋa à wasi ku naa ijɛ ku ra bi Zozɛfu hai bii fei, domi ariu í teese í buu wa kooi si ilɛ ŋau fei.

Currently Selected:

Kusintii Andunya 41: MKL

Highlight

Copy