Kusintii Andunya 40

1Si anyii nŋu ŋau bɛ fei inɛ minji gɔ ŋa iyi à jɛ inɛ ngboi woo ce icɛi ilaalui Ezibitiu à raraa. Inɛ akã woo bu atɛ̃ɛi, inɛ akã mɔ inɛ ngboi woo ce pɛ̃ɛi. 2Ŋɔi idɔi Faraɔ̃ í kɔ̃ do amanɛ minjiɛ ŋau, 3nɔ í mu ŋa í dasi ŋa si ile piisɔ̃ɔi akawe nla ŋa, tengi bii Zozɛfu í wau. Si awɔi inɛ ngboi woo degbe inɛi piisɔ̃ɔ ŋaui í dasi ŋa, 4nɔ nŋu mɔ í so ŋa í daa Zozɛfu si awɔ ku maa cɔ ŋa. Nɔ à ce ajɔ minji ile piisɔ̃ɔ bɛ.

Zozɛfu í tusɛa inɛi piisɔ̃ɔ ŋa ala nŋa ŋa

5Ŋɔi idũ ajɔ akã gɔ woo bu atɛ̃i ilaaluu do inɛ ngboi woo ce pɛ̃ɛu à ce ala inɔ ile piisɔ̃ɔ bɛ. Aŋa fei à ce ala nŋai, nɔ ti inɛ fei kutusɛɛ ikã ikãi. 6Iyi iju í má daakɔ ŋɔi Zozɛfu í koo í cɔ ŋa nɔ í ba wee aŋa fei à wa si inɔ kufɔ. 7Ŋɔi í bee ŋa í ni, irei iŋɛ fei ì waa bɛjɛ waju bɛɛbɛ nnyi ŋa.

8Ŋɔi à jɛaa à ni, à laalai nɔ wee a kù ba inɛ iyi á tusɛ nwa yaaseɛ.

Ŋɔi Zozɛfu í bee ŋa má í ni, kù jɛ Ilaaɔ̃i í ya tusɛ yaasei mii fei ba. Na nŋu, i sisiim ala nŋɛ ŋau wa.

9Ŋɔi woo bu atɛ̃i ilaaluu í sisia Zozɛfu alaɛu í ni, si alam nɔu ǹ yɛ jĩi ndii rezɛ̃ɛ í fita si wajum. 10Jĩi nɔu í nɛ amaawɔ mɛɛta. Iyi í fita gbakã ŋɔi í ce koko nɔ í so nɔ isou í jĩa. 11Ǹ yɛ ǹ wa n mu kɔɔfui Faraɔ̃ si awɔm. Nɔ ǹ ka isoi rezɛ̃ɛ ŋau ǹ fɔ̃ inyiɛ si kɔɔfuu nɔ ǹ soo ǹ na Faraɔ̃.

12Ŋɔi Zozɛfu í sɔ̃ɔ í ni, yaasei alaɛu wee. Amaawɔ mɛɛtau ajɔ mɛɛta mbɛ. 13Ajɔ mɛɛtai í gbe bɛ Faraɔ̃ ku nyaɛ hai ile piisɔ̃ɔ nɔ ku sindoɛ si icɛɛ má. Aa ya buãa atɛ̃ má bɛi í ya tako í ce wo. 14Amma bii ì na ì lɔ si ididɔ̃u, ye gigim. Ǹ wa n tɔɔɛi i ceem didɔ̃, sisia Faraɔ̃ idem nɔ i nyam hai si ileu ihɛ̃. 15À ce ileem wai hai ilɛi Ebɛɛ ŋa à naam wa ihɛ̃. Si anyii nŋu, bii ǹ wau bɛ n kù ce nkãma iyi í to a dasim piisɔ̃ɔ.

16Iyi inɛ ngboi woo ce pɛ̃ɛu mɔ í gbɔ Zozɛfu í tusɛa inɛ ihɔ̃ alau do ide didɔ̃ ŋɔi í ni, si ala iyi amu mɔ ǹ ceu, ǹ wa n so kɔlɔ mɛɛta si iri iyi à nɛ pɛ̃ɛ si inɔ nŋa. 17Nɔ kɔlɔ mɛɛtasiau í kɔ̃ò dimii kaa ikã ikã fei iyi à sɔ̃a Faraɔ̃. Nɔ yɛi ŋa à naa à waa jɔɔ si antaii irim bɛ.

18Ŋɔi Zozɛfu í jɛaa í ni, yaasei alaɛu wee. Kɔlɔ mɛɛtau ajɔ mɛɛta mbɛ. 19Í gbe ajɔ mɛɛta iyi Faraɔ̃ á bu iriɛ nɔ ku bagãm dɛɛ, yɛi ŋa a jɛ iŋaɛ.

20Iyi ajɔ mɛɛtau í to ŋɔi Faraɔ̃ wa ce jingaui ajɔi kubíɛ nɔ í nya woo ce icɛ minjiɛ ŋau wa hai ile piisɔ̃ɔu nɔ í leekĩ ŋa si wajui woo ce icɛɛ ŋa iyi à gbe ŋau. 21Nɔ í sindo inɛ iyi í ya bu atɛ̃ ku náau si icɛɛ. 22Amma inɛ ngboi woo ce pɛ̃ɛu í jɔ̀ à bagãm dɛɛ si bɛi Zozɛfu í fɔu. 23Amma woo bu atɛ̃ɛu í gbɛjɛ idei Zozɛfuu kpata kpata.

Currently Selected:

Kusintii Andunya 40: MKL

Highlight

Copy