Kusintii Andunya 39

Zozɛfu í wa bi Potifaa

1Inɛi Isimaɛli ŋa iyi à bɔò Zozɛfu Ezibiti à koo à taa Potifaa inɛi Ezibiti bɛ. Potifaau ilu naanɛi bi ilaalu Faraɔ̃, nɔ nŋui í jɛ inɛ ngboi ciikuɛ ŋa. 2Nɔ Aɔ̃ Lafɛ̃ɛ í wɛɛ do Zozɛfu í jɔ̀ í jɛ ilu baaka. Nɔ inɔ ilei lafɛ̃ɛɛu mɔm nii í wa. 3Mɔkɔu í mà iyi Aɔ̃ Lafɛ̃ɛ í wɛɛ do Zozɛfu, nɔ andi mii iyi wa ce fei Aɔ̃ Lafɛ̃ɛ í ya fũaa kpãaɛi. 4Na ŋɔi í jɔ̀ í cɔɔ do iju jiida nɔ í coo inɛ ngboi inɛ ŋa iyi à waa ce icɛ inɔ kpasɛ̃ɛ ŋau fei nɔ mii iyi í nɛ fei í daa si awɔ. 5Hai waati nŋu, Aɔ̃ Lafɛ̃ɛ í weea Potifaa na irii Zozɛfu. Mii iyi í wa si kpasɛ̃ɛ do si ikoɛ fei í ba kuweei Aɔ̃ Lafɛ̃ɛ. 6Na nŋu, mii iyi í nɛ fei í daa Zozɛfu si awɔ. Kù waa ce wuãi ngɔgɔ má bii kù jɛ ijɛɛ iyi á jɛ nŋu akã baa si.

Zozɛfu do aboi Potifaa

Wee Zozɛfu mɔkɔ kusĩai. Araɛ do wajuɛ fei í sĩai jiida jiida. 7Na nŋu, si anyii mii ŋau ihɛ̃ fei, aboi lafɛ̃ɛɛ í kãsiɛ iju do binɛ í ni, jɔ̀ i sũòm. 8Amma Zozɛfu í kɔ̀. Í sɔ̃ aboi lafɛ̃ɛɛu í ni, nsɛi wee lafɛ̃ɛm kù mà yaasei idei kpasɛ̃ɛ kãma má, mii iyi í nɛ fei í daam si awɔ. 9Kù rem gbugbã si kpasɛ̃u kù nɔ kù ganjim nkãma bii kù jɛ awɔ akã si na iyi í jɔ̀ ì jɛ aboɛ. Bɛirei an ce n ce mii laalɔu ihɛ̃ n ce dulum nla nla bɛɛbɛ bi Ilaaɔ̃. 10Baa do iyi í ya maa lɛlɛ Zozɛfu ajɔ fei ku ba ku sũòɛ, Zozɛfu í kɔ̀. Ci ya bi baa aŋa a wa inya akã ajɔ mɔm.

11Ajɔ nŋu gɔ Zozɛfu í lɔ ile wa ce icɛɛ. Wee woo ce icɛ ŋau kãma nŋa kù wa bɛ. 12Ŋɔi abou í mu ibɔɛ í ni, jɔ̀ i sũòm. Amma Zozɛfu í jɔ̀a ibɔu í sa í fita waduude. 13Iyi abou í ba wee í sa í fita waduude í jɔ̀a nŋu ibɔɛu, 14ŋɔi í koo í kpe woo ce icɛ ŋau í ni, i naa i cɔ, mɔkɔm í naaò inɛi Ebɛɛ gɔ wa ihɛ̃ ku na ku yaako wa. Mɔkɔu wa bi ku sũòm amma ǹ dɔ̃ anu hee lele. 15Iyi í gbɔ ǹ dɔ̃ anu hee lele ŋɔi í jɔ̀ ibɔɛ kɔkɔm í sa í fita waduude.

16Ŋɔi abou í ce bi ku jilɛ ibɔu hee bii mɔkɔɛ í baa kpasɛ̃. 17Iyi í baa ŋɔi í sɔ̃ɔ í ni, inɛi Ebɛɛ aru iyi ì naa nwa wau í lɔ sim ku ba ku bɛjɛ irim. 18Ŋɔi ǹ dɔ̃ anu nɔ í jɔ̀ ibɔɛ kɔkɔm í sa í fita waduude.

19Iyi mɔkɔu í gbɔ ide iyi aboɛ í fɔ ŋɔi idɔɛ í kɔ̃ hee í caa. 20Ŋɔi í mu Zozɛfu í koo í dasiɛ ile piisɔ̃ɔ tengi bii akawe nla ŋa à wa.

Zozɛfu í wa ile piisɔ̃ɔ

Ile piisɔ̃ɔ bɛi Zozɛfu í wa. 21Amma Aɔ̃ Lafɛ̃ɛ í wɛɛ do nŋu nɔ í ceaa didɔ̃. Nɔ inɛ ngboi woo degbe ile piisɔ̃ɔu í buu jiida. 22Nɔ inɛi piisɔ̃ɔ ŋa iyi à wa bɛ fei í so ŋa í daa si awɔ má. Mii iyi aa ce bɛ fei nŋui í ya na woodaɛ. 23Inɛ ngboi woo degbe piisɔ̃ɔu baaɛ ci ya wa si do mii iyi Zozɛfu wa ce, domi Aɔ̃ Lafɛ̃ɛ í wɛɛ do nŋu, nɔ mii iyi wa ce fei í ya jɔ̀ ku nɛ baakai.

Currently Selected:

Kusintii Andunya 39: MKL

Highlight

Copy