Kusintii Andunya 38

Zudaa do Tamaa

1Si anyii nŋu, Zudaa í nɛ í jɔ̀ igbã do ifɔɛ ŋa nɔ í bɔ bi inɛi Adulamu gɔ iyi à ya kpe Hira. 2Tengi bɛi í yɛ ama inaaboi Kanaã gɔ. Ama inaabou amai mɔkɔ gɔ iyi à ya kpe Suai, nɔ í soo í jɛ aboɛ, nɔ aŋaò à tɔtɔɔ. 3Abou í na í nɛ asĩ nɔ í bí ama inɛmɔkɔ, nɔ à sɔɔ Ɛɛ. 4Abou í na í bí ama inɛmɔkɔ mmuɛ má nɔ í sɔɔ Onaa. 5Abou í nyi í bí ama inɛmɔkɔ mmuɛ má nɔ í sɔ nŋu mɔ Sela. Ilui Kezibui Zudaa í wa waati iyi aboɛ í bí inɛ nŋu.

6Zudaa í soa Ɛɛ ama yemmaɛu abo gɔ iyi à ya kpe Tamaa. 7Ɛɛ í na í jɛ inɛ laalɔ si wajui Aɔ̃ Lafɛ̃ɛ, nɔ Aɔ̃ Lafɛ̃ɛ í jɔ̀ í ku. 8Ŋɔi Zudaa í sɔ̃ Onaa í ni, i jɔ i mà kuce nwa ya. Na nŋu, so jaaɔ̃i igbãɛu ku jɛ aboɛ. Nɔ hai bi tɛɛ igbãɛu mɔ ku ba dimi.

9Amma Onaa í mà bii nŋu do abou aŋa à tɔtɔɔ, ama iyi abou á na ku bíu kaa jɛ ti nŋu. Na ŋɔi í jɔ̀ waati iyi nŋu do abou à waa tɔtɔɔ fei mii iyi bii í lɔ si inɔi inaabo á jɔ̀ ku nɛ asĩu í ya jɔ̀ ku nikã ilɛi ku ba abou ku maà nɛ asĩ hee ku bí ama si agbɛi igbãɛu. 10Bɛi nŋu mɔ í ceu kù dɔ̃a Aɔ̃ Lafɛ̃ɛ si, nɔ í jɔ̀ nŋu mɔ í ku. 11Ŋɔi Zudaa í sɔ̃ Tamaa jaaɔ̃i amaɛu í ni, koo buba jaaɔ̃ kpasɛ̃i baaɛ bɛ titã hee Sela ama inɛmɔkɔm nɔu ku la.

Amma do njoi wa fɔɔu. Wa lɛlɛ aboui domi kù waa naanɛ Sela mɔ ku na ku ce bɛi igbãɛ ŋa nɔ nŋu mɔ ku ku. Tamaa í bɔ ide í koo wa buba jaaɔ̃ kpasɛ̃i baaɛ bɛ.

12Ŋɔi ajɔ í lɔ wa koo, nɔ aboi Zudaa ama inaaboi Suau í na í ku. Waati iyi ara kuroi ikuu í na í lɔ hee idɔi Zudaa í tũ, nɔ í dede í bɔ ikpa ilui Timuna bi inɛ ŋa iyi à waa bu ntoi angudãɛ ŋa, nŋu do kpaasiɛ Hira inɛi Adulamuu.

13Ŋɔi inɛ gɔ í koo í sɔ̃ Tamaa í ni, anaɛ wee wa bɔ Timuna ntoi angudãɛ ŋa ku bu. 14Nɔ í bɔ jĩnɛi jaaɔ̃ ŋau í jilɔɔ, nɔ í bii wajuɛ do fuugɛsɛ, í koo í buba anu koofai ilu iyi à ya kpe Enaimu si itĩ kpãai Timuna, domi waati bɛɛbɛ í yɛ Sela í la nɔ baaɛu kù jɔ̀ kù so nŋu.

15Iyi Zudaa wa lɔ, ŋɔi í yɔɔ nɔ í tamaa bɛi inaabo à ta icu gɔi si bɛi wajuɛ wa bii kù ba kù waa yɔɔ. 16Si bɛi kù mà mà aboi amai nŋui, ŋɔi í koo í baa itĩ kpãa bii wa bubau nɔ í sɔ̃ɔ í ni, jɔ̀ n naa ileɛ awaɛ ka sũ. Nɔ í jɛaa í ni, mii aa muum.

17Nɔ Zudaa í jɛaa í ni, an muuɛ ama iwo akã hai si inɔi mɛɛmu gaam ŋa. Nɔ Tamaa í jɛ í ni, í sĩa, amma nam mii ndɛɛ gɔ wa iyi an maa n mu ku ba n mà iyi ntɔ ntɔ aa na i nam ama iwou. 18-19Zudaa í beeɛ í ni, mii ì bɛi ì bi n naɛ i ba i mà ntɔi ideu. Nɔ abou í jɛ í ni, ǹ bi i nam lɛlɛawɔ iyi í nɛ nyindaɛu do ikũɛ do golo iyi ì waa mu si awɔu. Nɔ í naa mii ŋa iyi í fãau fei aŋaò à bɛi à tɔtɔɔ sɛ̃ɛ. Si anyiɛ abou í dede í nɛ. Nɔ í koo í bɔ fuugɛsɛ iyi í biiò wajuɛu í jilɔɔ, nɔ í so jĩnɛi jaaɔ̃ɛu í dasi má. Si anyiɛ nɔ í ba wee nŋu í nɛ asĩ. 20Waati iyi Zudaa í nyi ide, ŋɔi í bɛ inɛi Adulamu kpaasiɛu ku kooò ama iwo iyi í cea abou kuwãɛ nɔ ku gbaa mii ndɛɛ ŋa iyi í naau wa. Amma iyi í koo kù yɛ abou má. 21Ŋɔi í bee inɛi Enaimu ŋa í ni, hee iwoi inaabo à ta icu iyi wa buba itĩ kpãa ihɛ̃u í wa. Nɔ à jɛaa à ni, inaabo à ta icu kãma kù wa ihɛ̃.

22Ŋɔi kpaasii Zudaau í sinda í nyi í koo í sɔ̃ɔ í ni, n kù yɔɔ, nɔ inɛi bɛ ŋau à sɔ̃m à ni inaabo à ta icu kãma kù wa bɛ mɔ wo.

23Nɔ Zudaa í ni, to. Ka jɔ̀aa mii ŋau bɛ, inɛ ŋau a maà nyaanyi wa. Amu de ǹ ni i kooò ama iwo iyi ǹ cea kuwãɛu i kù bɛi i kù yɔɔ.

24Iyi í ce zakai cukpa mɛɛta ŋɔi inɛ gɔ í naa í sɔ̃ Zudaa í ni, Tamaa jaaɔ̃i amaɛu í ce sakara, wee nsɛi í nɛ asĩ. Nɔ Zudaa í ni a koo a muu a joo njaawɛ.

25Waati iyi à muu à waa kooòɛ nɔ í bɛ ama koo sɔ̃ Zudaa anaɛu ku ni, cɔ mii ŋau ihɛ̃. Lɛlɛawɔu ihɛ̃ do ikũu do golou ihɛ̃ fei, fei ndɛɛ inɛ iyi í kãam asĩu ihɛ̃ nŋui í nam ku mu. Ti yooi.

26Iyi Zudaa í yɛ mii ŋau í mà iyi mii ndii nŋu ŋai, nɔ í ni, abou í jirima wooda í rem. Ntɔi, Sela ama inɛmɔkɔm nii ǹ nɛ n na wo ku jɛ aboɛ, nɔ wee n kù ce bɛɛbɛ.

Hai waati bɛɛbɛ aŋaò a kù tɔtɔɔ sɛ̃ɛ má.

27Iyi waatii kubíɛ í to ŋɔi à mà iyi sika ŋai à wa inɔɛ. 28Ŋɔi inɛ akã í yɔ ikpaɛ wa, ŋɔi inaabo woo bí inɛ iyi í wa tengi bi kubíu í mu ikpau í dĩ si jaaɛ nkpa gɔ. Nɔ í ni, inɛ ihɛ̃i í jɛ inɛ sinte iyi à bí.

29Amma amau í nyi í fa ikpaɛ má, nɔ inɛ iyi kù yɔ ikpaɛ waui í tako í naa si andunya. Ŋɔi inaabo woo bí inɛu í ni, ì naa kpãa ku cĩ? Nɔ à kpoo Perɛsi#38:29 Perɛsi Yaasei iriui í jɛ kpãa ku cĩ.. 30Nɔ ama iyi ihɔ̃u mɔ í naa do jaaɛ nkpaɛ si ikpa nɔ à kpe nŋu mɔ Zera.

Currently Selected:

Kusintii Andunya 38: MKL

Highlight

Copy