Kusintii Andunya 37
37
Zozɛfu do igbãɛ ŋa
1Zakɔbu í buba si ilɛi Kanaã bii baaɛ í tako í buba wa jɛ inɛ njoo wo. 2Faajii nyaanzei Zakɔbu wee.
Iyi Zozɛfu í ce adɔ̃ maatũ do minji mɛɛmu ŋai í ya maa degbe do igbãɛ ŋa. Í ya maa wai bi amai Biliha ŋa do ti Zilipa aboi baaɛ ŋa, ŋɔi Zozɛfu í ya sɔ̃ baaɛ ku maa ni igbãi nŋu ŋau à ya ce mii laalɔ.
3Zakɔbu iyi à ya kpe Izirɛli í bi Zozɛfu í re amaɛ ŋa iyi à gbe ŋau fei si na iyi í jɔ̀ si agboɛi í buu. Nɔ í sɔa tako ku nɛ ila ikã ikã. 4Iyi igbã ŋau à yɛ iyi baau í buu í re aŋa fei ŋɔi à dedeò kucéɛ. A ci ya yɔkɔ a sɔ̃ɔ ide do kubi má.
5-7Ajɔ nŋu gɔ Zozɛfu í ce ala, nɔ í sisia igbãɛ ŋau, í sɔ̃ ŋa í ni, i de itĩ n sisi nŋɛ alam nɔu. Iya kamboi à waa dĩ iko. Ŋɔi iya kambom í dede í leekĩ nɔ tu ŋɛ ŋa à na à kaako tom nɔu à waa sɛɛbataa.
Iyi à gbɔ alaɛu, ŋɔi à cóo à kɔ̃ɔsi má 8à ni, ì waa tamaa mà awɔi aa jɛ ilaalu nwa? Ì waa tamaa mà awɔi aa maa gbã wa? Nɔ à nyi à cóo má à kɔ̃ɔsi na alau do ide iyi í fɔu.
9Si anyiɛ í na í ce ala gɔ má, nɔ í sisia igbãɛ ŋa í ni, wee ǹ ce ala gɔ má. Si alau ǹ yɛ nunu do cukpa do leleaɔ̃ maatakã à waa sɛɛbataam.
10Ŋɔi í nyi í sisia baaɛ mɔ alau má. Ŋɔi baau í gbagba siɛ í sɔ̃ɔ í ni, yoomai í jɛ yaasei alaɛu ihɛ̃. Amu do iyeɛ do igbãɛ ŋa do ifɔɛ aa ka na ka sɛɛbataɛi? 11Ŋɔi igbãɛ ŋa à waa muu do idɔɔkɔ̃, amma baau í singa ide ŋau fei si idɔɛ.
À ta Zozɛfu à nɛòɛ Ezibiti
12Si anyiɛ igbãi Zozɛfu ŋau à na à bɔ mɛɛmui baa nŋa ku degbe ikpa Sikɛmu. Nɔ à kpɛ bɛ. 13Ŋɔi ajɔ nŋu gɔ Izirɛli í bee Zozɛfu í ni, kù jɛ ikpa Sikɛmui igbãɛ ŋa à bɔ degbe ya. Naa wa n bɛɛ bi tu ŋa. Ŋɔi Zozɛfu í jɛ í ni, to.
14Ŋɔi Izirɛli í sɔ̃ɔ í ni, koo cɔ mà igbãɛ ŋa à waa nɛ baani, nɔ i cɔ bii í jɛ mɛɛmu ŋau mɔ à waa nɛ baani nɔ i baa i na i sɔ̃m laabaau nŋa. Í bɔɔi hai angbɔɔi Eborɔ̃ɔ.
Iyi Zozɛfu í maai si ilui Sikɛmu 15ŋɔi mɔkɔ gɔ í kòo si waati iyi wa nɛ si sakou nɔ í beeɛ í ni, mii ì waa dɛdɛ.
16Ŋɔi Zozɛfu í jɛ í ni, igbãm ŋai ǹ wa n dɛdɛ. Aa yɔkɔ i sɔ̃m bii à waa degbe mɛɛmu nŋa?
17Mɔkɔu í sɔ̃ɔ í ni, à nɛ hai ihɛ̃ nɔ ǹ gbɔ à ni ikpa Dotãai aŋa aa bɔ. Ŋɔi Zozɛfu í too tuubai igbãɛ ŋau nɔ waati iyi í maai Dotãa í hɔ̃nnɛ ŋa.
18Amma hee ku maa to wa bi tu ŋa aŋa mɔ à hɔ̃nnɛɛ wa, ŋɔi à busi njɛ à ni aŋa a kpaa. 19À sɔ̃ njɛ à ni, woo ce ala nwau wee wa naa. 20I jɔ̀ ka kpaa ka dasiɛ lɔgɔ kusiiu ihɛ̃, nɔ ka ni mɛɛmui sako kugaabu gɔi í kpaa í ŋɔɔ. Nɔ ka cɔ bɛi alaɛu á jɛ.
21Iyi Rubɛ̃ɛ í gbɔ bɛɛbɛ, í bi nŋu ku gbaa hai si awɔ nŋa, ŋɔi í ni, i maà jɔ̀ ka kpaa. 22I maà nya hunde. I sɔsiɛ lɔgɔ kusii gbaau ihɛ̃. Nɔ i maà lesiɛ awɔ. Wee Rubɛ̃ɛ í wasi ku lasabu ku ba ku gbaa hai si awɔ nŋa ku sindaɛ ku nɛ ikpa bi baaɛ. 23Iyi Zozɛfu í to wa bi igbãɛ ŋau, ŋɔi à bɔ tako ku nɛ ila ikã ikã iyi wa dasiu. 24Nɔ à soo à dasiɛ inɔ lɔgɔ kusiiu. Wee inyi kù wa si, baa keeke.
25Iyi à tã nɔ à buba à waa jɛ. Iyi à wu iju à cɔ ilu ŋɔi à yɛ inɛi Isimaɛli ŋa nkpɔ nkpɔ à too njɛ à waa baa hai ilɛi Galaadi. À kãa kpookpo nŋa ŋa tuae do ikpo ku dɔ̃ inunu à waa bɔò ilɛi Ezibiti. 26Ŋɔi Zudaa í sɔ̃ igbã do ifɔɛ ŋa í ni, aranfãani yoomai aa ka nɛ bii à kpa ifɔ nwa à singa ikuɛ. 27I naa wa kaa taa inɛi Isimaɛli ŋa. Ka maà lesiɛ awɔ, domi ifɔ nwai njɛ akã. Ŋɔi à gbɔ ideɛu. 28Iyi woo nya sĩa ŋau à waa lɔ, ŋɔi igbãi Zozɛfu ŋau à faa wa à nyaa hai inɔ lɔgɔ kusiiu à taa inɛi Isimaɛli ŋau à gba isɔ fũfũ kpɛkɛlɛ kɔnfia, nɔ à nɛòɛ Ezibiti.
29Ŋɔi Rubɛ̃ɛ í nyi wa bi lɔgɔ kusiiu. Í nante í cɔ nɔ í ba Zozɛfu kù wa bɛ má. Ŋɔi í gagaga ibɔɛ na inɔ kufɔɛ. 30Nɔ í sinda í koo í ba ifɔɛ ŋau í ni, amau kù wa bɛ má ni, iwoi an lɔò kuwɛɛm.
31Ŋɔi à saka iwo kombo nɔ à jɔsi njɛɛ si ibɔi Zozɛfu. 32Ŋɔi à bɛ inɛ gɔ do ibɔ tako ku nɛ ila ikã ikãu bi baau koo sɔ̃ɔ ku ni, cɔ mii iyi à yɛ. Ibɔi amaɛi ba. Mà kù jɛ nŋu.
33Ŋɔi Zakɔbu í mà ibɔu nɔ í ni, ibɔi amam nii mbɛ. Iŋai sako gɔ í kpaa í ŋɔɔ. 34Ŋɔi í mu ibɔɛ í gaa na inɔ kufɔ nɔ í so saaki í we. Nɔ í ce akũi amaɛu ajɔ nkpɔ nkpɔ. 35Ama inɛmɔkɔ do ama inaaboɛ ŋa fei à naa siɛ à na a tũ idɔɛ, amma í kɔ̀ ku gbɔ ide nŋa. Í ni nŋu á maa kpata akũi ama nŋui hee nŋu koo yɔɔò bi kuwai iku ŋa. Nɔ í kpata akũi amaɛui waati sisɔ.
36Wee waati bɛɛbɛ inɛi Isimaɛli ŋau à to Ezibiti à koo à ta Zozɛfu bi Potifaa inɛ ngboi ciikui ilaalu Faraɔ̃ ŋa.
Currently Selected:
Kusintii Andunya 37: MKL
Highlight
Share
Copy
Want to have your highlights saved across all your devices? Sign up or sign in
2021, SIM International et UEEB
